قازاقستان رەسپۋبليكاسى پرەزيدەنتى قاسىم-جومارت توقايەۆتىڭ جامبىل وبلىسىنا جاساعان ساپارىندا الماتى، شىمكەنت قالالارى مەن الماتى، جامبىل،تۇركىستان وبلىستارىندا وتەتىن «جاڭا جىبەك جولى» ەكسپەديسيالىق باعىتىن تۋريستىك الەۋەتىن ارتتىرۋدا پايدالانۋ، بۇل باعىتتا ينفراقۇرىلىمداردى جەتىلدىرۋدە ينۆەستيسيا تارتۋ سەكىلدى جۇيەلى جۇمىستاردى ۇيىمداستىرۋدى تاپسىرعان بولاتىن. پرەزيدەنت پارمەن بەرگەن تاپسىرمانى ورىنداۋ ماقساتىندا وبلىس اكىمدىگى تۋريزم باسقارماسىنىڭ «جاڭا جىبەك جولى» تۋريستىك جوباسىن جاساپ، رەسپۋبليكانىڭ وڭتۇستىك وڭىرلەرىن قامتىعان ەكسكۋرسيا ۇيىمداستىرۋدا، دەپ جازادى Qamshy.kz اقپارات اگەنتتىگى. 

اتالعان ەكسكۋرسيا اياسىنا سالا ماماندارى جاڭا تۋريستىك باعىتتاردى ءتۇزۋ ءۇشىن وڭىرلەردەگى كيەلى جەرلەردى، تاريحي، مادەني ورىنداردى ارالاپ، ولاردا زەرتتەۋ جۇمىستارىن جۇرگىزەدى. سونداي-اق ىشكى ءتۋريزمدى دامىتۋدىڭ العىشارتى سانالاتىن بۇل شارا اياسىندا وبلىستاردىڭ اۋماعىنداعى، شەكارالارىندا تۇرعان تۋريستىك نىساندار فوتوسۋرەتتەرگە مەن ۆيدەوروليكتەرگە تۇسىرىلمەك. ولاردىڭ قازىرگى حال-احۋالى جايىنداعى اقپاراتتار دا جيناقتالاتىن بولادى. تۋريزم باسقارماسى قولعا العان جوبانىڭ اۋماعى حالىقارالىق سيپات الاتىن سىڭايلى.

–«جاڭا جىبەك جولى» تۋريستىك باعىتى قىتايدىڭ سينسزيان-ۇيعىر اۆتونوميالىق اۋدانىنان باستالىپ، ەلىمىزدەگى الماتى، جامبىل، تۇركىستان وبلىستارى مەن الماتى، شىمكەنت قالالارىن قامتيدى. سونىمەن بىرگە جاڭا حالىقارالىق تۋريستىك باعىتقا وزبەكستان رەسپۋبليكاسىنىڭ اۋماعىنداعى تاريحي-مادەني ورىندار ەنگىزىلەدى،–دەيدى وبلىس اكىمدىگى تۋريزم باسقارماسىنىڭ باسشىسى قارلىعاش ارالبەكوۆا.

جاڭا تۋريستىك باعىتقا ەنەتىن نىسانداردى ينفراقۇرىلىمدىق تۇرعىدان جەتىلدىرۋ ءىسىن وبلىستىق تۋريزم باسقارمسى كورشىلەس وبلىستار مەن شىمكەنت، الماتى قالالارىنداعى ارىپتەستەرىمەن بىرلەسە تالقىلادى. بۇل ماسەلەلەر ءوڭىرارالىق جۇمىس توبى وتىرىسىنىڭ كۇن تارتىبىنە قويىلدى. اتالعان جۇمىس توبىنىڭ وتىرىسىنا وبلىستار مەن قالالاردان كەلگەن وكىلدەرى ءوز ايماقتارىندا جاڭا تۋريستىك باعىتقا ەنگەن نىسانداردىڭ تاريحي ماڭىزى، ونىڭ بۇگىنگى جاعدايى تۋراسىندا مالىمەتتەرىمەن ءبولىستى. 3 كۇنگە سوزىلعان جيىن قوناقتارى جاڭا تۋريستىك باعىتقا جامبىل وبلىسىنان ەنگەن نىسانداردىڭ دا جاي-كۇيىمەن تانىسۋ ماقساتىندا تاراز قالاسى، ت.رىسقۇلوۆ، مەركى، شۋ،قورداي اۋداندارىندا بولدى. بۇل ءىسساپارلاردا ىشكى ءتۋريزمدى دامىتۋ ماسەلەسىنە قاتىستى ۇسىنىستار مەن وزەكتى ماسەلەلەردى شەشۋ جايى تالقىلاندى.