قازاقستان جاستار كونگرەسى مەن قازاقستان حالقى اسسامبلەياسى ۇيىمداستىرىپ جاتقان «قحا جاستار سينەرگياسى فورۋمى» جاس ءىت-ماماندارى قولداۋ جوباسى جامبىل وبلىسىندا جالعاسىن تاپتى. م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ بازاسىندا وتكەن وبلىستىق ىرىكتەۋدە جوعارى، ارناۋلى ورتا وقۋ ورىندارىنىڭ ستۋدەنتتەرى مەن بىرگە اۋىل مەكتەپتەرىنىڭ وقۋشىلارى ب ا ق سىنادى. ناتيجەسىندە 5 ۇزدىك جوبا رەسپۋبليكالىق بىرىنشىلىككە جولداما الدى، دەپ جازادى Qamshy.kz اقپارات اگەنتتىگى. 

وبلىستىق ىرىكتەۋدىڭ اشىلۋ سالتاناتىنا نۇر-سۇلتان قالاسىنان ارنايى كەلگەن جوبا مەنەدجەرى ماۋلەن مولدابەكوۆ «قحا جاستار سينەرگياسى فورۋمى» جاس ءىت-ماماندارى قولداۋ شاراسىنىڭ رەسپۋبليكالىق دەڭگەيىنە ەلىمىزدىڭ ءار ايماعىنان ىرىكتەلگەن ەڭ ۇزدىك 80 جوبانىڭ قاتىساتىنىن ايتادى.

–نۇر-سۇلتان قالاسىندا وتەتىن جوبانىڭ اقتىق كەزەڭىنە ەلباسى-تۇڭعىش پرەزيدەنت نۇرسۇلتان نازاربايەۆ قاتىسادى. ەڭ ۇزدىك جوبالاردىڭ اۆتورلارى قارجىلاي سىياقىعا يە بولىپ قانا قويماي سونداعى مىقتى ينۆەستورلارمەن جۇمىس جاساۋعا كەلىسىم شارتقا دا قول جەتكىزبەك،–دەيدى جوبا مەنەدجەرى.

ال م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ رەكتورى ماحمەتعالي سارىبەكوۆ بۇل شارانىڭ جاستار جىلى اياسىندا ويى ۇشقىر، جاڭا تەحنولوگيانى جەتىك مەڭگەرگەن ورەندەردىڭ مۇمكىندىگىن باعامداپ، جان-جاقتى قولداۋ كورسەتۋدەگى رولىنە ايرىقشا توقتالىپ ءوتتى.

–جالپى ءبىزدىڭ ۋنيۆەرسيتەتتە جاستار جىلى باستالعالى اقپاراتتىق تەحنولوگيالار سالاسىنداعى دارىندى ستۋدەنتتەردى تانۋ ماقساتىندا بىرنەشە IT جوبالار بايقاۋى وتكىزىلدى. العاشىندا قالالىق دەڭگەيدە وتكىزىلىپ جۇرگەن بۇل سايىستىڭ اۋقىمى كەڭەيىپ بۇگىندە ايماقتىق سيپات الدى. جاقىندا ستۋدەنتتەر مەن وقۋشىلار اراسىندا روبوتوتەحنيكا بويىنشا بايقاۋعا ۇيىمداستىردىق. ۋنيەرسيتەتىمىزدىڭ تالانتتى جاستارىنان قۇرالعان Enactus TarSU كومانداسى الەمنىڭ 38 مەملەكەتىنەن كەلگەن ورەندەرمەن بىرگە امەريكا قۇراما شتاتتارىنىڭ سان-حوسە قالاسىندا وتكەن بۇكىلالەمدىك چەمپيوناتقا قاتىستى. بۇل وڭىرلىك دەڭگەيدەگى ۋنيۆەرسيتەت ستۋدەنتتەرى ءۇشىن ۇلكەن جەتىستىك،–دەيدى ماحمەتعالي نۇرعالي ۇلى.

كەلەسى ساتتە وبلىستىق ىرىكتەۋ بايقاۋىنا قاتىسۋشىلار م.ح. دۋلاتي اتىنداعى تاراز مەملەكەتتىك ۋنيۆەرسيتەتى «اقپاراتتىق جۇيەلەر» كافەدراسىنىڭ وقىتۋشىسى ەربول مۋسينوۆتىڭ «web-تەحنولوگيالار» تاقىرىبىنداعى شەبەرلىك ءدارىسىن تىڭدادى. مۇنان سوڭ قاتىسۋشىلار ءوز جوبالارىن قورعادى. ءتۇس اۋا بارلىق جوبالاردى سارالاپ شىققان كونكۋرستىق كوميسسيا جالپى 9جوبانىڭ 5-ەۋىن رەسپۋبليكالىق كەزەڭگە جىبەرۋگە بولادى دەپ تانىدى.