قازاقستان رەسپۋبليكاسى پرەزيدەنتى اكىمشىلىگى جانىنداعى بالالاردىڭ قۇقىقتارى مەن زاڭدى مۇددەلەرىن قورعاۋدى قامتاماسىز ەتۋ جۇيەسىن جەتىلدىرۋ تۋرالى ۇسىنىستاردى زەردەلەۋ جانە جيناقتاۋ ماسەلەلەرى جونىندەگى جۇمىس توبى جامبىل وبلىسى جۋالى اۋدانىندا،ى جۇمىس ساپارى كەزىندە ءبىلىم ءبولىمىنىڭ پسيحيكالىق-پەداگوگيكالىق تۇزەتۋ كابينەتىنە ايالداپ، مۇمكىندىگى شەكتەۋلى بالالاردى وڭالتۋ شارالارىنىڭ بارىسىنا قانىقتى، دەپ جازادى Qamshy.kz اقپارات اگەنتتىگى. 

توپ باسشىسى مانسيا يسكازينانى مەكەمەدە بالالار سەرەبرالدى ءپاراليچى، اۋتيزم، داۋن سيندرومى اۋرۋلارىنا شالدىققان بالالارمەن جاسالاتىن پەداگوگيكالىق-پسيحولوگيالىق تۇزەتۋ جۇمىستارى قىزىقتىردى. وليگوفرەنوپەداگوگ، لوگوپەد، پسيحولوگ جانە دەفەكتولوگ مامانداردىڭ كابينەتتەرىنە جەكە-جەكە كىرىپ كورىپ، ولاردىڭ جۇمىسىنا زەر سالدى. № 15 مەكتەپ-ليسەيدە از قامتىلعان وتباسىلاردان 50 وقۋشى ءبىر مەزگىل ىستىق تاماقپەن قامتىلعان. مۇندا توپ باسشىسى اسحانانىڭ اس مازىرىنەن باستاپ، تازالىعى، تاعامداردىڭ دايىندالۋى، ءبولىنۋى مەن تاراتىلۋىنا دەيىنگى جۇمىسىنىڭ بارىسىن قاداعالادى.

اۋدان اكىمدىگىنىڭ ءماجىلىس زالىندا جۇمىس توبىنىڭ مۇشەلەرىنىڭ قاتىسۋىمەن اۋدانداعى بالالار قۇقىعى مەن زاڭدى مۇددەلەرىن قورعاۋعا قاتىسى بار مەكەمەلەر باسشىلارىمەن جانە مەكتەپ ديرەكتورلارىمەن وتكەن جيىندا اۋداندىق پوليسيا ءبولىمىنىڭ باستىعى، پوليسيا پودپولكوۆنيگى مەرگەنباي قويكەنوۆ پەن اۋدان اكىمدىگى ءبىلىم ءبولىمىنىڭ باسشىسى ءماجيت ايجانوۆ، قۇقىق قورعاۋ ورگاندارى مەن ءبىلىم بەرۋ مەكەمەلەرى تاراپىنان اۋداندا كامەلەتكە تولماعاندارمەن جانە ءسۋيسيدتىڭ الدىن الۋ جۇمىسىنىڭ بارىسى، اۋدان اكىمدىگى جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى كەرىمحان تورەقۇلوۆ اتاۋلى الەۋمەتتىك كومەك الۋشىلار وتباسىلاردىڭ جاعدايى، اۋداندىق ورتالىق اۋرۋحانا باس دارىگەرىنىڭ م.ا. نۇرباي ەرگەبەكوۆ اۋدانداعى انالار مەن بالالار دەنساۋلىعى، كامەلەتكە تولماعاندار اراسىندا ەرتە جۇكتىلىكتىڭ الدىن الۋ، ءتۇرلى پسيحيكالىق اۋرۋلارعا شالدىققان بالالارمەن جۇمىس تۋرالى بايانداپ بەردى.

جۇمىس توبى اۋداندىق ورتالىق اۋرۋحانانىڭ قابىلداۋ ءبولىمىن، كۇندىزگى ستاسيوناردى جانە بالالار ءبولىمىن ارالادى. مانسيا اياپبەرگەن قىزى پروفيلاكتيكالىق ەكپەنىڭ حالىقتىڭ دەنساۋلىعى ءۇشىن ماڭىزىن ايتا كەلە، ولاردان باس تارتقان ازاماتتارمەن جۇمىستىڭ قاي دەڭگەيدە جۇرگىزىلىپ جاتقانىن سۇراستىردى.

كەلەسى كەزەكتە جۇمىس توبى نۇرلىكەنت اۋىلىندا مەملەكەتتەن اتاۋلى الەۋمەتتىك كومەك الۋشى التى بالانىڭ اناسى رايحان اقجىگىتوۆانىڭ وتباسىندا بولىپ، ونىڭ تۇرمىس جاعدايىمەن تانىستى. رايحان اقجىگىتوۆا بالالارىنا الەۋمەتتىك جاردەماقىمەن قاتار مەكتەپ كيىمى، سپورت كيىمدەرى بەرىلەتىنىن، مەكتەپتە ءبىر مەزگىل ىستىق تاماقپەن قامتاماسىز ەتىلىپ وتىرعانىن ريزاشىلىق سەزىممەن ايتتى. تاعى ءبىر قۋانىشتى جاعداي، جاقىندا ونىڭ بانك الدىنداعى قارىزدارى دا وتەلگەن ەكەن. وتاناسى كورسەتىلگەن كومەك-قولداۋ ءۇشىن مەملەكەت باسشىسىنا زور العىسىن ءبىلدىردى. مانسيا يسكازينا اۋىلدىق وكرۋگ اكىمى نۇرجىگىت بولەكبايەۆقا، اۋدان اكىمدىگى جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى كەرىمحان تورەقۇلوۆقا كوپبالالى وتباسىنىڭ قوسىمشا تابىسىن ارتتىرۋ ءۇشىن جۇمىسپەن قامتۋ شارالارىنا تارتۋ قاجەتتىگىن تاپسىردى.