مەملەكەت باسشىسى قاسىم-جومارت توقايەۆ «سىندارلى قوعامدىق ديالوگ-قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا ماڭىزدى باعىتتار قاتارىندا ءبىلىم بەرۋ ساپاسىن جاقسارتۋعا دا نازار اۋدارعانى بەلگىلى. بۇل تۇرعىدا پرەزيدەنت «ءبىز وقۋشىلاردىڭ قابىلەتىن ايقىنداپ، كاسىبي باعىت-باعدار بەرۋ ساياساتىنا كوشۋىمىز قاجەت.

بۇل ساياسات ورتا ءبىلىم بەرۋدىڭ ۇلتتىق ستاندارتىنىڭ نەگىزى بولۋى ءتيىس.

ەكونوميكامىزدا تەحنيكا سالاسىنىڭ ماماندارىنا سۇرانىس وتە جوعارى، ءبىراق مۇمكىندىكتەر از. كاسىپورىندار ءتيىستى مامانداردى شەتەلدەن شاقىرۋعا ءماجبۇر. وسىنداي كەلەڭسىز جاعدايدى جەدەل تۇزەتۋىمىز كەرەك.

قالا مەن اۋىل مەكتەپتەرى اراسىنداعى ورتا ءبىلىم ساپاسى الشاقتاپ بارادى.

نەگىزگى ماسەلە – اۋىلدىق جەرلەردەگى بىلىكتى پەداگوگ كادرلاردىڭ تاپشىلىعى.

سوندىقتان، «ديپلوممەن – اۋىلعا» باعدارلاماسىنىڭ اياسىن كەڭەيتىپ، جۇمىستى جاڭا دەڭگەيدە جالعاستىرۋىمىز قاجەت. ۇكىمەتكە كەلەسى جىلدان باستاپ وسى باعدارلامانى قارجىلاندىرۋدى 20 ميلليارد تەڭگەگە جەتكىزۋدى تاپسىرامىندەپ اتاپ كورسەتتى.

ءبىلىم بەرۋ ساپاسىن ارتتىرۋ باعىتىندا مەكتەپكە دەيىنگى مەكەمەلەرگە دە ارتىلاتىن جاۋاپكەرشىلىك جۇگى جەڭىل ەمەس. جىلدىڭ باستى قۇجاتىندا ايقىندالعان مىندەتتەر اياسىندا تاراز قالاسىندا دا جۇمىر جوسپار ءتۇزىلىپ، جۇيەلى جۇمىستار جاندانا تۇسۋدە.

قازىرگى تاڭدا كونە شاھاردا 64 مەملەكەتتىك جانە 69 جەكەمەنشىك مەكتەپكە دەيىنگى ءبىلىم بەرۋ مەكەمەلەرى قىزمەت اتقارادى. بۇگىندە وندا 19 451 بالا تاربيەلەنۋدە. وسى ورايدا 1 مەن 6 جاس ارالىعىنداعى بالالاردى مەكتەپكە دەيىنگى ءبىلىم بەرۋ، تاربيەمەن قامتۋ 79،6 پايىز بولسا، 3 پەن 6 جاس ارالىعىنداعى بالاردى قامتۋ 98،0% پايىزدى قۇرايدى. وتكەن جىلعا قاراعاندا اجەپتەۋىر ىلگەرىلەۋ بار.

جالپى مەكتەپكە دەيىنگى مەكەمەلەردىڭ ىشىندە 69 جەكەمەنشىك ۇيىمدارىندا 6032 بالا تاربيەلەنۋدە. بۇل 31،0 پايىزدى قۇرايدى. ال كەزەككە تىركەلگەن بالالار سانى 18177. ونىڭ ىشىندە 3-6 جاستاعىلارى – 392 بالا. دەيتۇرعانمەن جەرگىلىكتى بيلىك تاراپىنان بۇل باعىتتا ناتيجەلى جۇمىستار اتقارىلۋدا. مىسالى، 2019 جىلعا 1454 ورىن جوسپارلانسا، ناقتىلى كەزەڭدە 1534 ورىن اشىلىپ وتىر. ياعني، جوسپار 80 ورىنعا ارتىق ورىندالعان.

سونىمەن قاتار وسى ماقساتتا مەملەكەتتىك ءبىلىم بەرۋ تاپسىرىستارىنان بولەك، مەملەكەتتىك-جەكەشەلىك ارىپتەستىكتىڭ تەتىكتەرى ىسكە اسىرىلاتىن بولادى.