الەۋمەتتىك سالانى دامىتۋ-مەملەكەت ءمان بەرىپ وتىرعان ستراتەگيالىق ماقساتتاردىڭ ءبىرى. سوندىقتان دا بولار، پرەزيدەنت قاسىم-جومارت توقايەۆ «سىندارلى قوعامدىق ديالوگ-قازاقستان تۇراقتىلىعى مەن وركەندەۋىنىڭ نەگىزى» اتتى جولداۋىندا وسى سالاعا ايرىقشا نازار اۋداردى.

«مەملەكەت مۇقتاج جاندارعا كومەك كورسەتۋ ءۇشىن بارلىق قاجەتتى شارالاردى قابىلداۋدا.

الايدا، ءبىرقاتار شەشىمدەر جان-جاقتى ساراپتالماي قابىلداندى.

ناتيجەسىندە بۇل پاتەرناليستىك پيعىلدىڭ ايتارلىقتاي ارتۋىنا اكەپ سوقتىردى. سوڭعى 5 جىلدا قازاقستاندا اتاۋلى الەۋمەتتىك كومەك الاتىندار سانى 77 مىڭنان 1،4 ميلليوننان استام ادامعا ارتقان.

الەۋمەتتىك كومەككە بيۋدجەتتەن بولىنەتىن قاراجات كولەمى 2017 جىلدان بەرى 17 ەسە كوبەيدى جانە ودان دا ارتا ءتۇستى.

باسقاشا ايتقاندا، جۇمىس ىستەگىسى كەلمەيتىن ادامدار نەمەسە الەۋمەتتىك كومەك الۋ ءۇشىن وزدەرىنىڭ تابىسىن جاسىراتىندار كوبەيدى. جاعدايى بار وتباسىلاردىڭ الەۋمەتتىك كومەك الاتىنى تۋرالى دەرەكتەر بۇعان دەيىن بۇقارالىق اقپارات قۇرالدارىندا جاريالانعان بولاتىن.

تاعى دا اتاپ وتەمىن. كونستيتۋسيا بويىنشا ءبىزدىڭ ەلىمىز – الەۋمەتتىك مەملەكەت. سوندىقتان مەملەكەتىمىز ازاماتتار الدىنداعى مىندەتتەرىن ورىنداۋى ءتيىس»،دەدى پرەزيدەنت ءوز جولداۋىندا.

قازىرگى تاڭدا تاراز قالاسىندا تۇرمىسى تومەن وتباسىلارعا، ونىڭ ىشىندە كوپ بالالى جانۇيالارعا قولداۋ كورسەتۋ ماقساتىندا ناقتى جۇمىستار جۇرگىزىلۋدە. وسى ورايدا اعىمداعى جىلى كوپبالالى وتباسىلارىنا كەمىندە 3 بولمەلى پاتەردىڭ كولەمى 60 – 90 شارشى مەتردەن كەم بولمايتىن، سوماسى 8 ميلليون 400،0 مىڭ تەڭگەدەن اسپايتىن، 142 پاتەر ساتىپ الۋعا رەسپۋبليكالىق بيۋدجەتتەن 1 ميلليارد 191،0 ميلليون تەڭگە قارجى قاراستىرىلىپ، قازىرگى تاڭدا مەملەكەتتىك ساتىپ الۋ جۇمىستار جۇرگىزىلۋدە.

وتكەن جىلدان بەرى تاراز قالاسىندا 42،5 مىڭ تەڭگەدەن تومەن جالاقى الاتىن جۇمىسكەرلەرى بار كاسىپورىندار مەن ءىرى كاسىپورىندارداعى جۇمىسكەرلەردىڭ جالاقىسىن كوتەرۋ بويىنشا دا كوپ تىرلىك اتقارىلىپ جاتقانىن ايتۋ كەرەك. سونىڭ ناتيجەسىندە 33 114 جۇمىسشىسى بار 510 كاسىپورىن جالاقىسىن كوتەردى. 2019 جىلدىڭ باسىنان 42500 تەڭگەدەن تومەن جالاقى تولەگەن 335 كاسىپورىن انىقتالعان. اتالعان ماسەلە بويىنشا تاراز قالاسى اكىمدىگى تاراپىنان اتالعان كاسىپورىندارمەن تۇسىندىرمە جۇمىستارىن جۇرگىزۋ بارىسىندا 218 كاسىپورىننىڭ تومەن جالاقىنى تولەۋ سەبەپتەرى انىقتالىپ، كاسىپورىندار تاراپىنان جالاقىنى كوتەرۋ جوسپارلانۋدا.

جالپى تاراز قالاسىندا بۇگىنگى كۇنگە 4923 كاسىپورىن جۇمىس ىستەپ تۇرسا، ونىڭ 1101ء-ى ۇجىمدىق شارتتارعا تۇرعان. بۇل جالپى كورسەتكىشتىڭ 22،4 پايىزىن قۇراپ وتىر.