جامبىل وبلىسى شۋ اۋدانىندا بۇگىنگى تاڭعا 24 اۋىلدىق، 6 قالالىق پوشتا بايلانىس تورابى جانە بولتىرىك، ەڭبەكشى، جيەنبەت اۋىلدارىنداعى پوشتا پۋنكتتەرى جەرگىلىكتى حالىقتىڭ يگىلىگى جولىندا لايىقتى قىزمەت كورسەتىپ كەلەدى. سوڭعى جىلدارى جاڭا تەحنولوگيالار كۇننەن-كۇنگە قارىشتاپ دامىپ، ەلىمىز سيفرلىق جۇيەگە كوشۋىنە وراي، پوشتا قىزمەتى دە زاماناۋي قوسىمشا قىزمەتتەرمەن تولىعۋ ۇستىندە، دەپ جازادى Qamshy.kz اقپارات اگەنتتىگى.  نەگىزى سوڭعى جىلدارى جەرگىلىكتى پوشتا قىزمەتىندە ورىن العان جاڭاشىلدىقتار از ەمەس. مىسالى، جۋىردا اۋداندىق پوشتا بايلانىس تورابىنا ءار وڭىردەن كەلگەن سالەمدەمەلەردى پوستاماد ارقىلى يەلەرىنە جەتكىزۋ جولعا قويىلماق. ول ءۇشىن اۋەلى سالەمدەمەنى الۋشى ادامنىڭ ۇيالى تەلەفونىنا سالەمدەمەنى جىبەرگەن فيرمادان نەمەسە باسقا دا ورىننان ونىڭ اتىنا سالەمدەمە كەلگەندىگى تۋرالى حابارلاما تۇسەدى. ءبىر ارتىقشىلىعى، حابارلاما ارقىلى سەنبى-جەكسەنبىگە قاراماي، سالەمدەمەنى الۋشى كەز كەلگەن ۋاقىتتا، كەزەكسىز ءارى وزىنە-وزى قىزمەت كورسەتە وتىرىپ، پوستاماد ورنالاسقان كەز كەلگەن دۇكەن نەمەسە ساۋدا ورىندارىنان زاتىن الا الادى. پوستامادتىڭ ارنايى جاشىكتەرى بار. سالەمدەمە سول جاشىكتە ساقتالادى. انارحان تايباعار قىزىنىڭ ايتۋىنشا، مۇنداي پوستاماد وبلىس اۋماعىنداعى اۋداندار بويىنشا شۋ جانە كورشىلەس قورداي اۋدانىندا بار ەكەن. شۋ اۋدانىندا مۇنداي قىزمەت كورسەتۋ جابدىعى ءبىر عانا تولە بي اۋىلىنداعى «دياس» دۇكەنىنىڭ ىشىندە ورنالاسقان. اتالمىش ەكى اۋداندا جۋىردا عانا جولعا قويىلعان پوستاماد قىزمەتىن باستاپقىدا استانا، الماتى، تاراز قالالارىنان كەلگەن ارنايى ماماندار ىسكە قوسىپ بەرسە، ءارى قاراي جۇمىس جاساۋ جولىن جەرگىلىكتى باعدارلاماشى ماماندار رەتتەپ وتىراتىن بولادى.

جاڭاشىلدىقتىڭ تاعى ءبىرى – «ە-كوم» كارتوچكاسىنىڭ قولدانىسقا ەنگىزىلۋى. شامامەن وسىدان ءۇش-تورت اي بۇرىن قولعا بەرىلە باستاعان بۇل كارتوچكامەن دە «كاسپيي گولد» كارتوچكاسى سىندى ءتۇرلى تولەمدەردى جۇزەگە اسىرۋعا بولادى.تولەمدەردىڭ ءبىر پايىزى كارتوچكا يەسىنىڭ ءوز ەسەپشوتىنا ءتۇسىپ وتىرادى. ول ءۇشىن اۋەلى ءار ازامات جەرگىلىكتى پوشتاعا كەلىپ، ءوز اتىنان ءوتىنىش جازادى، مۇنان كەيىن ءۇش-تورت كۇن ىشىندە كارتوچكاسىن قولىنا الادى.

تاعى ءبىر ايتا كەتەتىن ءجايت، «ەۋرازيا»، «الفا بانك»، «حوۋم كرەديت»، «اتف» جانە «ازيا» بانكتەرىنەن پوشتا ارقىلى نەسيە راسىمدەۋگە جانە «حوۋم كرەديت»، «تۇرعىن ءۇي قۇرىلىس جيناق» بانكتەرىنەن دەپوزيت اشۋعا بولادى. سونداي-اق، العا، كوكتوبە، قونايەۆ، بەلباسار اۋىلدارىنىڭ وزىندە پوشتا قىزمەتكەرلەرى ارقىلى نەسيە راسىمدەۋ بۇگىنگى تاڭدا جۇزەگە اسىرىلۋدا. سونىمەن قاتار، زەينەتاقى قورى بويىنشا مالىمەتتەردى انىقتاۋ دا پوشتا قىزمەتىنە ەنگىزىلگەن.

مۇنىڭ بارلىعى جاڭاشىلدىقتى جاتسىنباي، اۋداننىڭ الەۋمەتتىك-ەكونوميكالىق دامۋىنا، ونىڭ ىشىندە پوشتا قىزمەتىنىڭ جەتىلۋىنە قوماقتى ۇلەسىن قوسىپ جۇرگەن اۋداندىق پوشتا بايلانىس تورابى ۇجىمىنىڭ ەرەن ەڭبەگىنىڭ جارقىن جەمىسى دەۋگە بولادى. سول سەبەپتەن، پوشتا ۇجىمىنىڭ قىزمەتى كەلەشەكتە دە تولاعاي تابىستارعا تولى بولسىن دەمەكپىز.