مەملەكەت باسشىسى قاسىم-جومارت توقايەۆ مەملەكەتتىك قىزمەتشىلەردىڭ جالپى حالىق الدىنداعى جاۋاپكەرشىلىكتى سەزىنىپ، اركەز ادال ءارى اشىق قىزمەت كورسەتۋىن باستى تالاپ ەتكەنى ءمالىم. وسىعان وراي جامبىل وبلىسىنداعى اۋدانداردا «سەرۆيستىك اكىمدىك» ورتالىعى اشىلىپ، «Open space» جوباسى قولعا الىنۋدا، دەپ جازادى Qamshy.kz اقپارات اگەنتتىگى. 

ماسەلەن شۋ قالاسى اكىمدىگى عيماراتىنىڭ ءبىرىنشى قاباتىندا جۇمىس جاسايتىن «سەرۆيستى اكىمدىك» ورتالىقتا شۋ اۋدانى اكىمدىگىنىڭ ساۋلەت جانە قالا قۇرىلىسى، تۇرعىن ءۇي ينسپەكسياسى، تۇرعىن ۇي-كوممۋنالدىق شارۋاشىلىعى بولىمدەرى مەن كوممۋنالىق قىزمەتتەر كورسەتەتىن مەكەمەلەردىڭ ماماندارى قىزمەت كورسەتەدى. مۇنداي ورتالىقتار مەركى اۋدانى اكىمدىگى عيماراتىنىڭ 1 قاباتىندا دا اشىلدى. جالپى اۋماعى 56 شارشى مەتردى قۇرايتىن ورتالىقتا اۋدان اكىمدىگىنىڭ ساۋلەت، قالا قۇرىلىسى جانە قۇرىلىس، جەر قاتىناستارى، تۇرعىن ۇي-كوممۋنالدىق شارۋاشىلىق، جول كولىگى، اۆتوموبيل جولدارى، اۋىل شارۋاشىلىق ءبولىمى جانە وبلىستىق ينۆەستورلارعا قىزمەت كورسەتۋ، جوبالىق باسقارۋ، سيفرلاندىرۋ ورتالىعىنىڭ مەركى اۋداندىق بولىمشەسى ورنالاسقان. سونداي-اق وبلىس ورتالىعىنداعى سۋمەن قامتۋ جۇيەلەرىنە جاۋاپتى «تاراز سۋ» كاسىپورنىندا سەرۆيستىك قىزمەت كورسەتۋ ورتالىعى اشىلعان. وسى ورتالىق كومەگىمەن قالانىڭ كەز-كەلگەن تۇرعىنى جەكە شارتتار جاساۋ، تەحنيكالىق سيپاتتاعى ماسەلەلەر، تۇتىنىلعان سۋ مەن كارىز ءۇشىن تولەم شوتتارىن سالىستىرۋ، پاتەرلەرگە جانە ۇيلەردە ورناتىلعان سۋ ەسەپتەگىش قۇرالدارىن تىركەۋگە ءوتىنىش بەرە الادى. سونىڭ ناتيجەسىندە ءبىر مەزەتتە جۇزگە جۋىق ابونەنتتى ءارتۇرلى ماسەلەسى بويىنشا قابىلداۋ مۇمكىندىگى تۋدى. تاراز قالاسىندا دا ساۋلەت جانە قالا قۇرىلىسى مەن جەر قاتىناستارى ماسەلەلەرى بويىنشا قىزمەت كورسەتەتىن «سەرۆيستىك اكىمدىك» اشىلدى.

سونىمەن قاتار بايزاق اۋدانى مەن تاراز قالاسى اكىمدىگىندە «وpen space» فورماتىنداعى كەڭسەلەر قىزمەت كورسەتە باستادى. بۇل جوبا تالاس اۋدانى اكىمدىگى دە قولداۋ ءبىلدىردى. وندا اۋىل شارۋاشىلىعى، جەر قاتىناستارى مەن قالالىق ساۋلەت جانە قالا قۇرىلىسى ءبولىمىنىڭ ماماندارى حالىققا قىزمەت كورسەتەدى. قازاقستان رەسپۋبليكاسىنىڭ مەملەكەتتىك قىزمەت ىستەرى اگەنتتىگىنىڭ جامبىل وبلىسى بويىنشا دەپارتامەنتى دە «وpen space» فورماتىندا جۇمىس جاساۋعا كوشتى. دەپارتامەنت باسشىلىق قۇرامى ازاماتتاردى تولىقتاي اشىق اينەكتەرمەن جابدىقتالعان كابينەتتەردە قابىلداپ جاتىر.