تاراز قالاسىندا «Balqarag`ai» ەمدەۋ-ساۋىقتىرۋ ورتالىعى جۇمىس جاسايدى. وڭىردەگى تۇڭعىش فيتوباردا تۇتىنۋشىلارعا ارنالىپ ەمدىك وسىمدىكتەردەن دايىندالعان تاعامدار مەن سۋسىندار، دەنساۋلىقتى جاقسارتاتىن ديەتالىق ونىمدەردىڭ ءتۇر-تۇرى ۇسىنىلادى، دەپ جازادى Qamshy.kz اقپارات اگەنتتىگى. 

جامبىلدىقتاردىڭ جانىنا سايا، دەرتىنە داۋ بولار بۇل فيتوباردى اشۋ جوباسىن وبلىس اكىمى اسقار مىرزاحمەتوۆتىڭ يدەياسىمەن تانىمال كاسىپكەر قادىرحان ابدۋللايەۆ قولعا الدى. قۇرىلىس جۇمىستارى 1 جىلعا جۋىق مەرزىمدە اياقتالعان نىساننىڭ اشىلۋ سالتانى دا ۇلىستىڭ ۇلى كۇنىمەن تۇسپا-تۇس كەلگەنىن كوپشىلىك جاقسىلىق بالادى. سايكەسىنشە مەديسينا سالاسىنىڭ ماماندارى دا فيتوبار ۇسىناتىن سۋسىنداردىڭ شىن مانىندە ادام دەنساۋلىعى ءۇشىن پايدالى ەكەنىن اتاپ ءوتتى.

–فيتوباردىڭ ءوز تۇتىنۋشىلارىنا ازىرلەگەن ءمازىرىن نەگىزىنەن ەمدىك شوپتەردەن جاسالعان تاعامدار مەن سالاتتار قۇرايدى. ءوز كەزەگىندە مۇنداي تاعامدار مەن سالاتتار ادام دەنساۋلىعىنا وتە پايدالى. سوڭعى جىلدارى ءار ءتۇرلى سوزىلمالى اۋرۋلارمەن ديسپانسەرلىك ەسەپتە تۇراتىن جامبىلدىقتاردىڭ سانى ارتتى. ال مەديسينا ولاردى ەمدەۋدە شيپالى شوپتەردى قولدانۋ مۇمكىندىگىن جوققا شىعارمايدى. ءارى «Balqarag`ai» ەمدەۋ-ساۋىقتىرۋ ورتالىعىنا كەلگەندەرگە ەمدىك شوپتەردىڭ قاي ءتۇرىن جانە قانداي ادىسپەن قولدانۋ قاجەتتىلىگىن ارنايى ماماندار تاعايىندايدى. سونىمەن بىرگە مۇنداعى ەم الۋشىلارعا تەراپيەۆت، پەدياتر سىندى بىلىكتى ماماندار كەڭەس بەرەدى، –دەيدى وبلىس اكىمدىگى دەنساۋلىق ساقتاۋ باسقارماسىنىڭ باسشىسى مارات جامانقۇلوۆ.

فيتوبارداعى ەمدىك شارالارڭى تەك سەرتيفيكاتتالعان جانە تاجىريبەلى ماماندار ازىرلەگەن شيپالى شوپتەر عانا ازىرلەنەدى ەكەن. مۇنداعى ەمدىك شوپتەردى وتاندىق نارىقتاعى ەمدىك شوپتەردى ازىرلەۋ ءىسىنىڭ كوشباسشىسى سانالاتىن «زەردە-فيتو» فارماسيەۆتيكالىق كومپانياسى جەتكىزەدى.

–ەمدەۋ شارالارىنا قولدانۋ ماقساتىندا بىزگە اكەلىنگەن ءاربىر شوپكە زەرتحانالىق زەرتتەۋ جۇرگىزىلەدى. شيكىزاتتى قايتا وڭدەۋگە جىبەرۋ ءۇشىن زەرتحاناداعى زەرتتەۋدە وڭ ناتيجەگە قول جەتكىزىلۋى كەرەك. دارىلىك شوپتەر دايىن بولعاننان كەيىن دە ارنايى ماماندار ولاردىڭ قۇرامىن تولىق تەكسەرىپ بارىپ ساتىلىمعا شىعارادى، –دەيدى «زەردە فيتو» كومپانياسى ديرەكتورىنىڭ ءوندىرىس جونىندەگى ورىنباسارى ماقسات جۇماتايەۆ.

جالپى ەمدەۋ-ساۋىقتىرۋ ورتالىعىنداعى ەمدەۋ شارالارىنا 100-دەن استام ءشوپ ءتۇرى قولدانىلادى. ورتالىقتا تۇتىنۋشىلارعا ساپالى قىزمەت ۇسىنۋ ءىسىن 30-35 ادامنان تۇراتىن ۇجىم اتقارادى. ولاردىڭ كومەگىمەن فيتوباردا ءبىر تاۋلىكتە 150-200 ادامعا قىزمەت كورسەتىلەدى.