جامبىل وبلىسىنداعى جۋالى اۋدانى-نەگىزىنەن اۋىل شارۋاشىلىعىنا بەيىمدەلگەن ايماق. مۇندا ەگىن ەگىپ، مال ءوسىرىپ، سول ارقىلى تۇرمىسىن تىكتەپ وتىرعان تۇرعىنداردىڭ قاراسى قالىڭ. وسى ورايدا مەملەكەت باسشىسى قاسىم-جومارت كەمەل ۇلى توقايەۆ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا اگروونەركاسىپ كەشەنىن دامىتۋ تۋرالى تاپسىرماسى جۋالىلىقتاردىڭ ويىن ءدوپ باسقانداي.

بۇل تۇرعىدا پرەزيدەنت: «اۋىل شارۋاشىلىعى – ءبىزدىڭ نەگىزگى رەسۋرسىمىز، ءبىراق ونىڭ الەۋەتى تولىق پايدالانىلماي وتىر.

ەل ىشىندە عانا ەمەس، شەتەلدە دە سۇرانىسقا يە ورگانيكالىق جانە ەكولوگيالىق تازا ءونىم ءوندىرۋ ءۇشىن زور مۇمكىندىكتەر بار.

ءبىز سۋارمالى جەر كولەمىن كەزەڭ-كەزەڭمەن 2030 جىلعا قاراي 3 ميلليون گەكتارعا دەيىن ۇلعايتۋىمىز كەرەك.

بۇل اۋىل شارۋاشىلىعى ءونىمىنىڭ كولەمىن 4،5 ەسە ارتتىرۋعا مۇمكىندىك بەرەدى.

ساۋدا جانە ينتەگراسيا، اۋىل شارۋاشىلىعى مينيسترلىكتەرى فەرمەرلەرگە ءوز ءونىمىن سىرتقا شىعارىپ ساتۋ ءۇشىن بارىنشا قولداۋ كورسەتۋى ءتيىس.

وسىعان وراي ۇكىمەتكە ءتيىستى تاپسىرما بەرىلدى. بۇل – ماڭىزدى مىندەت،

اۋىل شارۋاشىلىعى ءونىمىن ەكسپورتتاۋ ىسىندە شيكىزاتقا نەگىزدەلۋدەن باس تارتۋ كەرەك» دەپ اتاپ كورسەتكەن بولاتىن. بۇگىندە جىلدىڭ باستى قۇجاتىنان تۋىندايتىن مىندەتتەر جۋالى جەرىندە دە كەزەڭ-كەزەڭىمەن ىسكە اسۋدا.

-اۋىل شارۋاشىلىعى – ءبىزدىڭ نەگىزگى رەسۋرسىمىز. اۋدان ەگىن وسىرۋگە دە، مال باپتاۋعا دا گەوگرافيالىق تۇرعىدان وتە قولايلى ايماق. ەسەپتى مەرزىمدە اۋىل شارۋاشىلىعى ءونىمىنىڭ جالپى شىعارىمى 9 ميلليارد 720،7 ميلليون تەڭگەنى قۇرادى ونىڭ ىشىندە تۇتاستاي كولەمىن مال شارۋاشىلىعى ونىمدەرى قۇراپ وتىر. شەت مەملەكەتتەن، ناقتىراق ايتقاندا چەحيادان اسىل تۇقىمدى ءسۇتتى، ەتتى باعىتتاعى 64 باس ءمۇيىزدى ءىرى قارا ساتىپ الىنىپ، جۇمىستار جۇرگىزىلۋدە،-دەيدى جۋالى اۋدانىنىڭ اكىمى نارباي ەرگەبەكوۆ.

بۇگىندە اۋداندا اۋىل شارۋاشىلىعى ونىمدەرىن قايتا وڭدەيتىن بەس كاسىپورىن جۇمىس ىستەۋدە. ولاردىڭ ۇشەۋى ءسۇت، بىرەۋى ەت ءونىمىن، تاعى بىرەۋى وسىمدىك مايىن وڭدەۋگە ماماندانعان.

تاعى ءبىر ايتا كەتەرلىگى، ەلباسىنىڭ ۇستىمىزدەگى جىلدىڭ 30 قاڭتاردا ۇكىمەتتىڭ كەڭەيتىلگەن وتىرىسىندا وڭىرلەردە سكرينينگ وتكىزۋ تۋرالى تاپسىرماسى اياسىندا اۋدانداعى 49 ەلدى مەكەندەگى 10 144 اۋلا زەردەلەنىپ، ساۋالنامالار تولتىرىلىپتى. سونىڭ ناتيجەسىندە جالپى قۇنى 983 716،2 مىڭ تەڭگە كولەمىندە 171 جوبا ۇسىنىلعان.