مەملەكەت باسشىسى ق.توقايەۆتىڭ قازاقستان حالقىنا العاشقى جولداۋىندا ءمان بەرگەن ماڭىزدى ماسەلەلەردىڭ قاتارىندا ينفراقۇرىلىمدى دامىتۋ جايى دا بار. وسى ورايدا پرەزيدەنت «الداعى ءۇش جىل ىشىندە تۇرعىنداردى تازا اۋىز سۋمەن جانە سۋ جەتكىزۋمەن قامتاماسىز ەتۋگە شامامەن 250 ميلليارد تەڭگە بولىنەدى.

اتقارۋشى بيلىك ورگاندارى «نۇرلى جول» باعدارلاماسىن تولىق جانە ساپالى ىسكە اسىرۋعا باسا ءمان بەرۋى كەرەك.

بۇل – ستراتەگيالىق جوبا. سونىڭ ارقاسىندا بۇكىل كولىك ينفراقۇرىلىمى جاڭعىرتىلادى.

وسى ماقساتقا وراي، مەملەكەت 2022 جىلعا دەيىن 1،2 تريلليون تەڭگەدەن استام ينۆەستيسيا سالادى.

ۇكىمەت بۇعان دەيىن دە كوپ قاراجات بولگەن بولاتىن، ءبىراق ونىڭ كوبى قۇمعا سىڭگەن سۋداي جوق بولىپ كەتتى. اشىعىن ايتساق، شەنەۋنىكتەردىڭ قالتاسىنا كەتتى، ال تازا سۋ، جول جانە باسقا دا ينفراقۇرىلىمنىڭ جاعدايى ءالى دە سول كۇيىندە.

بۇل جولى ۇكىمەت پەن پارلامەنت ەسەپ كوميتەتىمەن بىرلەسىپ، بيۋدجەت قاراجاتىن تولىعىمەن ءتيىمدى پايدالانۋدى قامتاماسىز ەتۋى ءتيىس» دەپ اتاپ ءوتتى.

بۇگىندە جۋالى اۋدانىندا ەلدى مەكەندەردى اۋىزسۋمەن، گازبەن قامتۋ، اۆتوموبيل جولدارىن جاڭعىرتۋ جۇمىستارى جاندانا تۇسۋدە.

-پرەزيدەنت تۇرعىنداردىڭ تازا اۋىز سۋعا، تابيعي گازعا، كولىك ينفراقۇرىلىمىنا بىركەلكى قول جەتكىزۋدى تاپسىردى. اۋداندا 49 ەلدى مەكەننىڭ 15ء-ى نەمەسە 31 پايىزى گازداندىرىلعان. 2027 جىلعا دەيىن تاعى دا 19 ەلدى مەكەندى گازداندىرۋ جوسپارلانۋدا.

ەلدى مەكەندەردىڭ 31 پايىزى نەمەسە 5 اۋىل ورتالىقتاندىرىلعان اۋىز سۋمەن، 10 اۋىل ورتالىقتاندىرىلماعان سۋمەن قامتىلعان. 2023 جىلى اۋدان تۇرعىندارىن 85،7 پايىز تازا اۋىز سۋمەن قامتۋ جوسپارلانىپ وتىر. سەبەبى جەتى ەلدى مەكەندە ءۇي سانى 50-دەن كەم بولۋىنا بايلانىستى اۋىز سۋمەن قامتاماسىز ەتۋ ءتيىمسىز،-دەيدى جۋالى اۋدانىنىڭ اكىمى نارباي ەرگەبەكوۆ.

جالپى، جۋالى وڭىرىندە «نۇرلى جول» باعدارلاماسى اياسىندا 2019 جىلى ەكى جوبا ىسكە اسىرىلۋدا. بۇل ماقساتقا 306،4 ميلليون تەڭگە (رەسپۋبليكالىق بيۋدجەتتەن 125،7 ميلليون تەڭگە، وبلىستىق بيۋدجەتتەن 180،7 ميلليون تەڭگە) بولىنگەن. بولىنگەن قاراجات بويىنشا 15،4 شاقىرىم جاڭا جول جوندەۋدەن ءوتتى.

جولداۋدا حالىقتىڭ ءال-اۋقاتىن كوتەرۋ، تۇرمىسىن جاقسارتۋ، جۇمىسپەن قامتۋ، ينفراقۇرىلىمداردى دامىتۋ جونىندە جۇكتەلگەن مىندەتتەردى ورىنداۋ باعىتىندا اۋداندا ماقساتتى جۇمىستار جالعاسىن تابا بەرەتىن بولادى.