ەلباسى-قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆ بۇعان دەيىن قازاقستاندىقتاردىڭ 30 پايىزىن بۇقارالىق سپورتپەن قامتۋ تۋرالى مەجە قويعان بولاتىن. ماڭىزدى مىندەت ءوز وزەكتىلىگىن جويعان جوق. وسى ورايدا بارلىق ەلدى مەكەندەردە جاڭا سپورت الاڭدارى بوي كوتەرىپ، شەبەرلىكتى شىڭداۋعا باعىتتالعان جارىستاردىڭ قاتارى ارتۋدا. بۇل ارينە، قۇپتارلىق جاعداي. مەملەكەت باسشىسى قاسىم-جومارت توقايەۆ تا ءوزىنىڭ قازاقستان حالقىنا جولداۋىندا بۇقارالىق سپورتتى دامىتۋعا، مادەنيەت سالاسىن ىلگەرىلەتۋگە، جاستاردىڭ جاي-كۇيىن جاقسارتۋعا ايرىقشا كوڭىل ءبولدى. مۇنىڭ ءبارى دە بىر-بىرىمەن تىعىز استاسىپ جاتقان ماسەلەلەر ەكەندىگى بەلگىلى. ياعني، پرەزيدەنت جولداۋدا ەرەكشە قاجەتتىلىكتەرى بار ادامدار ءۇشىن بىردەي مۇمكىندىك جاساۋ مىندەتىن قويدى.

جولداۋدا سونداي-اق بۇقارالىق سپورتتى دامىتۋ جونىندەگى كەشەندى جوسپار قابىلداۋ قاجەتتىگى ايتىلدى. بۇگىنگى كۇنى جۋالى اۋدانى بويىنشا 112 سپورت نىسانىنىڭ بارلىعى تۇرعىنداردىڭ دەنە شىنىقتىرۋ جانە سپورتپەن جۇيەلى تۇردە شۇعىلدانۋى ءۇشىن قولجەتىمدى. اتالمىش سپورت نىساندارىنىڭ 25ء-ى ب.مومىش ۇلى اۋىلىندا بولسا، 87ء-سى اۋىلدىق وكرۋگتەردە. ال اۋداندا دەنە شىنىقتىرۋ جانە سپورتپەن جۇيەلى تۇردە شۇعىلدانۋشىلار قاتارى 15 547 ادامعا جۋىقتاعان. بۇل بەلگىلەنگەن مەجەنىڭ 29،6 پايىزعا جەتكەنىن كورسەتەدى. سونىمەن قاتار اتالمىش وڭىردە ەرىكتىلەر قوزعالىسىن دامىتۋعا دا ەرەكشە كوڭىل بولىنۋدە.

-2020 جىلدىڭ «ۆولونتەر جىلى» دەپ جاريالانعانى بەلگىلى. ەرىكتىلەر قىزمەتىنە ازاماتتاردىڭ، اسىرەسە جاستاردىڭ، ستۋدەنتتەر مەن وقۋشىلاردىڭ قاتىسۋ اياسىن كەڭەيتۋ، ولاردىڭ بويىندا بەلسەندى ومىرلىك ۇستانىمدارعا قاتىستى داعدى قالىپتاستىرۋ – ماڭىزدى مىندەت.

وبلىس اكىمدىگىنىڭ اعىمداعى جىلدىڭ 14 ناۋرىزىنداعى №52 قاۋلىسىمەن بەكىتىلگەن «قامقور» ۆولونتەرلىك-قايىرىمدىلىق جوباسى اياسىندا 100-گە جۋىق ەرىكتى 10 114 وتباسىن ارالاپ، 2 361 وتباسىنا الەۋمەتتىك ساۋالناما تولتىرىپ، مۇقتاجدىقتارى سارالاندى. جوبا اياسىندا اۋداندا ءبىر قايىرىمدىلىق دۇكەنى اشىلدى،-دەيدى جۋالى اۋدانى اكىمدىگى ىشكى ساياسات ءبولىمىنىڭ باسشىسى مارات نارىنبەتوۆ.

جولداۋدا پرەزيدەنتىمىزدىڭ مادەنيەت سالاسىنا ەرەكشە توقتالۋى تەگىن ەمەس. ويتكەنى، ەلباسى ايتقانداي، «رۋحى بيىك حالىق قانا ۇلى ىستەردى اتقارا الادى». ونىڭ ۇستىنە رۋحاني جاڭعىرۋعا بەت بۇرعان كەزەڭدە بۇل سالاعا ارتىلار جاۋاپكەرشىلىك تە جوعارى. بۇگىندە جۋالى اۋدانى بويىنشا مادەنيەت سالاسىندا 229 قىزمەتكەر جۇمىس ىستەسە، ولاردىڭ ورتاشا ايلىق جالاقىسى 88 مىڭ تەڭگەنى قۇرايدى.

وسى ورايدا اۋدان اكىمدىگىنە قاراستى مەكەمەلەردىڭ جۇمىسىنىڭ تيىمدىلىگىن ارتتىرۋ ماقساتىندا اعىمداعى جىلدىڭ 1 ماۋسىمىنان باستاپ تومەن جالاقى الاتىن باس مامانداردىڭ ايلىق جالاقىسى 30 پايىزعا، بولىمشە باسشىلارى مەن سەكتور مەڭگەرۋشىلەرىنىڭ ايلىق جالاقىسى 10 پايىزعا وسكەن. بۇل ماقساتقا رەسپۋبليكالىق بيۋدجەت ەسەبىنەن 31 067،0 مىڭ تەڭگە ءبولىنىپتى.