قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆ ءوزىنىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا دامۋدىڭ دارا باعىتتارىن ايقىنداپ بەرگەنى بەلگىلى. اسىرەسە، ەكونوميكانى ءارتاراپتاندىرىپ، شاعىن جانە ورتا بيزنەستى دامىتۋعا ەرەكشە كوڭىل بولىنگەنىن ايتا كەتۋ كەرەك. وسى ورايدا جامبىل وبلىسىنداعى جۋالى اۋدانىندا دا جەمىستى جۇمىستار جاندانۋدا.

-مەملەكەت باسشىسى شيكىزاتقا بايلانعان مەنتاليتەتتەن باس تارتىپ، ەكونوميكانى ءارتاراپتاندىرۋدى تاپسىرىپ وتىر. وسى رەتتە ۇستىمىزدەگى جىلدىڭ سەگىز ايىنىڭ قورىتىندىسى بويىنشا اۋدانىمىزدىڭ جالپى وڭىرلىك ءونىمىنىڭ كولەمى بىلتىرعى جىلدىڭ وسى كەزەڭىمەن سالىستىرعاندا 33،3 پايىزعا ارتىپ وتىر.

بۇگىنگى كۇنگە تىركەلگەن 4487 شاعىن جانە ورتا كاسىپكەرلىك سۋبەكتىلەرىنىڭ ىشىندەگى جۇمىس جاسايتىندارىنىڭ ۇلەسى 92،4 پايىزعا جەتتى.

«بيزنەستىڭ جول كارتاسى-2020» باعدارلاماسى اياسىندا اعىمداعى جىلدىڭ سەگىز ايىندا 91 ميلليون 422 مىڭ تەڭگەگە التى جاڭا جوبا، 29 جاسقا دەيىنگى جاستار اراسىندا 32 500 ميلليون تەڭگەگە 15 جوبا ىسكە اسىرىلۋدا. «بيزنەستىڭ جول كارتاسى -2020» باعدارلاماسى اياسىندا پايىزدىق مولشەرلەمەسى سۋبسيديالاناتىن نەسيە الۋ جانە ينفراقۇرىلىمدى دامىتۋ ماقساتىندا اۋداننىڭ اۋىلدىق وكرۋگتەرىنەن كەلىپ تۇسكەن ۇسىنىستار (جوبالار) قارالىپ، ناقتى 6 جوبامەن جۇمىستار جۇرگىزىلدى. سونىڭ ناتيجەسىندە «دامۋ» كاسىپكەرلىكتى دامىتۋ قورىنىڭ قولداۋىنا يە بولىپ، بارلىعى 80،4 ميلليون تەڭگە نەسيەگە قول جەتكىزىلدى. (ينديكاتور بويىنشا جوسپار 9-ايعا 34،2 ميلليون تەڭگەگە مەجەلەنگەن بولاتىن،-دەيدى جۋالى اۋدانىنىڭ اكىمى نارباي ەرگەبەكوۆ.

جالپى، جۋالى اۋدانىندا «بيزنەستىڭ جول كارتاسى -2020» باعدارلاماسى اياسىندا كەپىلدىك بەرۋ باعىتى بويىنشا 5 جوبا ءوتىپ، «دامۋ» قورىنان 112،0 ميلليون تەڭگە نەسيەگە قول جەتكىزىلىپتى. ال كەپىلدىك بەرۋ 17 ميلليون تەڭگەنى قۇراپ وتىر. بۇل ارينە، بيزنەس قۇرىلىمدارى ءۇشىن ءتيىمدى تەتىك.

تاعى ءبىر ايتا كەتەرلىگى، جۋالى وڭىرىندە شاعىن كاسىپكەرلىكتەن بولەك اۋقىمدى جوبالارعا دا باسىمدىق بەرىلۋدە. مىسالى، «قازگيدرووپەرەيتينگ» جاۋاپكەرشىلىگى شەكتەۋلى سەرىكتەستىگى تاراپىنان «كوكساي» كانالىنىڭ بويىنان قۇنى 5،2 مييليارد تەڭگەنى، قۋاتتىلىعى 18 مۆت قۇرايتىن كىشى سۋ ەلەكتر ستانسياسىنىڭ قۇرىلىسى جۇرگىزىلۋدە. جوبانى تولىقتاي ىسكە قوسۋ كەلەسى جىلعا جوسپارلانۋدا.