جامبىل وبلىسىندا سىبايلاس جەمقورلىق فاكتىلەرىن بولدىرماۋ جانە الدىن الۋ باعىتىندا كەشەندى جۇمىستار جۇرگىزىلۋدە. بۇل باعىتتا ايماقتا سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتى قىزمەت ەتۋدە. دەپارتامەنت باسشىسى ءا.اشىربايەۆتىڭ ايتۋى بويىنشا، اگەنتتىكتىڭ سىبايلاس جەمقورلىققا قارسى ءىس-قيمىل باعىتىنداعى جۇمىستى سانىنان ساپاعا اۋىستىرۋ تۋرالى تاپسىرماسىن جۇزەگە ماقساتىندا قىلمىستاردى انىقتاۋ جۇمىسى بەلسەندىرىلىپ، وڭ ناتيجەلەرگە قول جەتكىزىلگەن.

اتاپ ايتقاندا، اعىمداعى جىلدىڭ 9 ايىندا جۇيەلى سىبايلاس جەمقورلىق دەرەگى بويىنشا – 6، كىشى جانە ورتا بيزنەس سۋبەكتىلەرىنىڭ جۇمىسىنا ارالاسۋ دەرەگى بويىنشا - 14، لاۋازىمدى تۇلعالار تاراپىنان كولەڭكەلى بيزنەس سۋبەكتىلەرىنە قامقولىق جاساۋ دەرەگى بويىنشا – 7 جانە مەملەكەتتىك باعدارلامالار اياسىندا بولىنگەن قاراجاتتاردى ۇرلاۋ دەرەگى بويىنشا - 14قىلمىس تىركەلگەن.

مەملەكەتتىك ورگاندار اراسىندا سىبايلاس جەمقورلىق سيپاتىندا جاسالىنعان قىلمىستاردىڭ سانى بويىنشا، ءالى كۇنگە دەيىن جەرگىلىكتى اتقارۋشى ورگاندار كوش باستاپ كەلەدى. بۇل وتە وكىنىشتى ستاتيستيكا. ويتكەنى، حالىقپەن تىكەلەي بايلانىس جاسايتىن ورگان بولعاندىقتان، بۇل سالادا جەمقورلىق فاكتىلەرىمەن كەزدەسۋدىڭ ىقتيمالدىعى وتە جوعارى دەڭگەيدە ءالى كۇنگە دەيىن ساقتالىپ كەلەدى. ناقتى ايتار بولساق، جەرگىلىكتى اتقارۋشى ورگانداردىڭ لاۋازىمدى تۇلعالارىنا قاتىستى 53قىلمىستىق ءىس تىركەلگەن. بۇل كورسەتكىش وتكەن جىلدىڭ وسى كەزەڭىمەن سالىستىرعاندا نەبارى 34ء-تى قۇراعان ەدى.

جەمقورلىق ارەكەتتەرىنە جول بەرىلگەن سالالاردا كوش باسىن ءبىلىم بەرۋ سالاسى باستاپ تۇر. اتالعان سالادا جىل باسىنان بەرى 18 جەمقورلىق فاكتىسى تىركەلگەن. سونان سوڭ، اۋىل شارۋاشىلىعى – 8، مادەنيەت جانە سپورت – 6، دەنساۋلىق ساقتاۋ – 5، قۇرىلىس – 5، جەر قاتىناستارى – 4، ءتۇرعىن-ۇي كوممۋنالدىق شارۋاشىلىعى – 3 جانە الەۋمەتتىك قامسىزداندىرۋ – 1 وقيعا ورىن الىپ، تىزىمگە ىلىگىپ وتىر.

بۇل رەتتە، ىشكى ىستەر ورگاندارىنىڭ قىزمەتكەرلەرىنىڭ دە «بەلسەندىلىگى» باسىم بولىپ وتىر. اتالعان سالادا 17 وقيعا تىركەلگەن. سونداي-اق، ارنايى مەملەكەتتىك ورگانداردىڭ قىزمەتكەرلەرى – 6، اسكەري شەندىلەر – 4، قارجى مينيسترلىگىنىڭ قۇرىلىمدىق بولىمشەلەرىنىڭ قىزمەتكەرلەرى – 4، ەكونوميكالىق تەرگەۋ قىزمەتىنىڭ قىزمەتكەرلەرى – 2 جاعدايعا جول بەرگەن.

وسىنداي وڭ ديناميكا سوتقا دەيىنگى ءىس جۇرگىزۋ باعىتىندا دا بايقالۋدا. اتاپ ايتقاندا، اعىمداعى جىلدىڭ 9 ايىندا دەپارتامەنتپەن 93 قىلمىستىق ءىس سوتقا جولدانعان. ال قىلمىس جاساعانى ءۇشىن قىلمىستىق جاۋاپكەرشىلىككە تارتىلعان تۇلعالاردىڭ سانى 89-دى قۇراپ وتىر.