مەملەكەتتىك جاستار ساياساتى تۇجىرىمداماسىنىڭ وسكەلەڭ ۇرپاقتى ونەگە جولىمەن تاربيەلەۋ باعىتىندا تيگىزەر ىقپالى زور. بۇل تۇرعىدا جامبىل وبىسىندا باياندى باستامالار قولعا الىنىپ، جارقىن جوبالار جەمىستى جۇزەگە اسۋدا. اسىرەسە، بيىلعى جاستار جىلىندا اتقارىلىپ جاتقان شارالاردىڭ اۋقىمى ۇلكەن.

ۇستىمىزدەگى جىلى جاستاردى ازاماتتىققا تاربيەلەۋ، قازاقستاندىق پاتريوتتىق سانا سەزىمىن نىعايتۋ، جاستاردىڭ زاڭدى مۇددەلەرى مەن قۇقىقتارىن قورعاۋ، جاستاردى ەلدىڭ الەۋمەتتىك-ەكونوميكالىق جانە قوعامدىق-ساياسي ومىرىنە تارتۋ، مادەني، يماندىلىق جانە رۋحاني قۇندىلىقتاردىڭ باسىمدىعى، ازاماتتىق، جاۋاپكەرشىلىك، ەڭبەكسۇيگىشتىك، كونفەسسياارالىق كەلىسىم مەن ەتنوسارالىق تاعاتتىلىق، ۇرپاقتار ساباقتاستىعى، وتباسىلىق تاربيە، قولجەتىمدى جانە ساپالى ءبىلىم بەرۋدى قامتاماسىز ەتۋ، عىلىمي-تەحنيكالىق الەۋەتتى دامىتۋ، دەنساۋلىقتى ساقتاۋ جانە نىعايتۋ، سالاماتتى ءومىر سالتىن قالىپتاستىرۋ، جۇمىسقا ورنالاسۋ مەن جۇمىسپەن قامتۋ، جاستار اراسىنداعى كاسىپكەرلىك، قۇقىقتىق مادەنيەت دەڭگەيىن ارتتىرۋ، سىبايلاس جەمقورلىق كورىنىستەرىنە توزبەۋشىلىككە تاربيەلەۋ، ەكولوگيالىق مادەنيەتتى قالىپتاستىرۋ، ۆولونتەرلىك قىزمەت، بوس ۋاقىتتى ءتيىمدى پايدالانۋعا باۋلۋ، مەيىرىمدىلىك، اتا-انانى قۇرمەتتەۋگە ۇيرەتۋ، قىز تاربيەسى، تاعى دا باسقا جاستار ماسەلەلەرى اياسىندا الەۋمەتتىك روليكتەر ءتۇسىرىلىپ، الەۋمەتتىك جەلىلەردە كەڭىنەن تاراتىلۋدا.

سونىمەن قاتار بيىلعى 22-25 شىلدەدە جاستاردى وبلىستان شىققان تانىمال تۇلعالاردىڭ ءومىر جولىمەن، وبلىستىڭ تاريحي-ارحەولوگيالىق ورىندارىمەن جانە حالىق اۋىز ادەبيەتىنىڭ تاڭداۋلى ۇلگىلەرىمەن تانىستىرۋ ماقساتىندا «اۋليەاتا جاۋhارلارى» اتتى تاريحي-تانىمدىق ەكسپەديسياسى وتكىزىلدى.

ەكسپەديسياعا جامبىل وبلىسىنىڭ مادەنيەت، سپورت، ونەر، تاريح، ءبىلىم، تۋريزم، بۇقارالىق اقپارات قۇرالدارى جانە تاعى دا باسقا سالا ماماندارىنان قۇرالعان 11 كوماندالىق توپ قاتىستى. بۇل توپتار بايزاق، جامبىل، جۋالى، قورداي، مەركى، مويىنقۇم، سارىسۋ، ت.رىسقۇلوۆ، تالاس، شۋ اۋداندارى مەن تاراز قالاسىنان جاساقتالعانىن ايتا كەتۋ كەرەك.

كوماندالار جامبىل وبلىسىنىڭ 50-دەن كەم ەمەس اۋىلدارى مەن ەلدى مەكەندەرىندە اتتارى ۇمىتىلىپ بارا جاتقان تۇلعالارىنىڭ ءومىر جولى، وسى كۇنگە دەيىن بەلگىسىز بولعان تاريحي-ارحەولوگيالىق ورىندارى، حالىق اندەرى جانە حالىق اۋىز ادەبيەتىنىڭ تىڭ ۇلگىلەرى، ياعني ەرتەگىلەر، اڭىز اڭگىمەلەر مەن ءاپسانالار، قيسسالار مەن ەپوستار تۋرالى اقپاراتتار جيناقتادى.