ەكىنشى دۇنيەجۇزىلىك سوعىسقا كسرو قۇرامىنداعى وتار ەل رەتىندە قازاقستان جاۋىنگەرلەرى دە قاتىسقانى بەلگىلى. نەمىس باسقىنشىلارىنا قارسى كۇرەستە قازاق باتىرلارى ەرلىكتىڭ ەرەن ۇلگىسىن كورسەتەدى. جاستىعىن سوعىسقا ۇرلاتقان ولاردىڭ قاي-قايسىسى دا باتىر اتانۋعا لايىقتى ەدى. دەسە دە ەرلىكتىڭ ەرەن ۇلگىسىن كورسەتسەدە بۇل ماراپاتتى بەرۋ ۇسىنىلعان 133 مايدانگەرگە ماراپاتى ءتۇرلى جەلەۋمەن بەرىلمەي قالعان. ولاردىڭ قاتارىندا 8 جامبىلدىق مايدانگەر دە بار، دەپ جازادى Qamshy.kz اقپارات اگەنتتىگى. 

جالپى كەڭەس وداعىنىڭ باتىرى اتاعى 615 قازاقستاندىققا بۇيىرسا، مۇنداي ەڭ جوعارى مەملەكەتتىك ناگراداعا 28 جامبىلدىق يە بولعان. دەگەنمەن ۇلى وتان سوعىسى كەزىندە دە بۇل ماراپاتتى بەرۋدىڭ ءوز ساياساتى بولعانى ەشكىم جاسىرىن ەمەس. ماسكەۋ تۇبىندەگى ۇرىستاردا اتوي سالىپ، سان رەت نەمىس قورشاۋىندا قالعان جاۋىنگەرلەرىن ءدىن امان الىپ شىققان اسكەري ستراتەگ، بىلىكتى وفيسەر، ەڭ باستىسى باۋىرجان مومىشۇلىنا بۇل اتاقتىڭ سوعىس اياقتالعان سوڭ 40 جىلدان كەيىن بەرىلگەنى ونىڭ بىربەتكەيلىگىمەن جانە تەگىن ورىسشالاماۋى سەبەپ بولعانى ايتىلادى. سول سەكىلدى قان مايداندا جەڭىس تۋىن جەلبىرەتۋ جولىندا جانقيارلىق ەرلىك كورسەتكەن 8 جامبىلدىق بۇل ماراپاتقا ۇسىنىلعانىمەن ونىمەن ناگرادتالماعان.

وبلىستىق ارحيۆ قىزمەتكەرلەرى مايدان دالاسىندا ەل ءۇشىن ەتكەن ەڭبەگى ەسكەرۋسىز قالعان 8 جامبىلدىق مايدانگەر جايىنداعى مالىمەتتەردى جاريا ەتتى. ولاردىڭ 3-ەۋىنىڭ سۋرەتى تابىلدى. تاعى 4 مايدانگەر جايىنداعى مالىمەتتەر ارحيۆ قورىنداعى ماتەريالدار نەگىزىندە ءتۇزىلدى. ال قالعان 4 مايدانگەردىڭ اتى جونىمەن مايدانعا اتتاندىرىلعان اسكەري بولىمنەن وزگە مالىمەتتەر قۇپيا كۇيىندە قالىپ وتىر. نەمىس باسقىنشىلارىنا قارسى كۇرەستە اتوي سالىپ، ەڭ جوعارى ناگراداعا ۇسىنىلعانىمەن وعان قول جەتكىزە الماي قالعان شاحان اليشيەۆ شۋ اۋدانى، تولە بي اۋىلىنىڭ تۋماسى، ال ابدۋراحمان كارگۋلين، سۋلتان ماماتالييەۆ، تاشان رامازانوۆتار اسكەرگە جامبىل اۋداندىق اسكەري بولىمىنەن شاقىرىلعان ەكەن. تاشان رامازانوۆتىڭ ۇرپاقتارى ءقازىر مەركى اۋدانىندا تۇرادى. سونداي-اق سوعىستان ءدىن امان ورالىپ بەيبىت كۇندە ۇستازدىق قىزمەت جاساعان بايزاقتىق ۋمبەتكۋل دجيەنبەكوۆ تە كەڭەس وداعىنىڭ باتىرى اتانا الماي قالعان. مۇنان بولەك شۋلىق مۋسابەك ايتكۋلوۆ، سۋلتانباي يسكاكوۆتار مەن قوردايلىق ۋرگالباي ۋميكەيەۆ تە كسرو جاۋىنگەرلەرىنە بەرىلەتىن ەڭ جوعارى ناگراداعا يەلىك ەتە الماي قالعان.

جالپى وبلىستىق ارحيۆ قىزمەتكەرلەرى 7 جىلدان بەرى ۇلى وتان سوعىسى تاريحىنا قاتىستى زەرتتەۋ جۇمىستارىن جۇرگىزىپ كەلەدى. جانە بۇل زەرتتەۋلەر ناتيجەسىز ەمەس. وتكەن جىلى جاڭعىرعان «جەڭىس» ساياباعىنداعى «ەرلىك» مەموريالدى كەشەنىنە ءدال وسى زەرتتەۋ جۇمىستارى كەزىندە اتى بەلگىلى بولعان جامبىلدىق مايدانگەرلەردىڭ ەسىمدەرى جازىلدى.