جامبىل وبلىسى رەسپۋبليكا اۋماعىنداعى كىسى اتىمەن اتالاتىن جالعىز وبلىس. 80 جىل بۇرىن ىرگەتاسى قالانعان وبلىستىڭ اتاۋى جامبىل جابايەۆتىڭ قۇرمەتىنە قويىلعانىنا كۇمان جوق. وبلىس قۇرىلعانعا دەيىن ءجۇز جىل جىرلاعان اقىننىڭ اتى قازىرگى تاراز قالاسىنا بەرىلگەن. ءتىرى كۇنىندە-اق اتى تۇتاس وبلىسقا بەرىلۋىنەن-اق حالىقتىڭ اقىنعا دەگەن قۇرمەتىن بايقاۋعا بولادى. سوندىقتان بولسا كەرەك جەرگىلىكتى جۇرت جامبىل جابايەۆتىڭ كىندىك كەسكەن جەرىن قاسيەت تۇتادى. بۇل ورىن قازاقستاننىڭ كيەلى جەرلەرىنىڭ كارتاسىنا وڭىرلىك ماڭىزعا يە نىسان رەتىندە ەنگىزىلگەن، دەپ جازادى Qamshy.kz اقپارات اگەنتتىگى. 

ءوز زامانىندا قازاق ولەڭىن كوككە كوتەرگەن جامبىل جابايەۆ مويىنقۇم اۋماعىنداعى جامبىل تاۋىنىڭ ەتەگىندە دۇنيە ەسىگىن اشقان. جامبىل تاۋىنىڭ اتى تاريحي دەرەكتەردە كەيدە ايگىلى قوزىباسپەن قاتار اتالادى. اقىن ءوزىنىڭ «مەنىڭ ءومىرىم» ولەڭىندە

بايعارا، جامبىل، حاندا مەن تۋىپپىن،

جامبىل دەپ قويىلىپتى اتىم سودان»، – دەپ جىرلايدى.

ول قاراپايىم شارۋانىڭ وتباسىندا تۋىلعان. دەگەنمەن اكەسى جاپانىڭ ەل ىشىندەگى ءىرىلى-ۇساقتى داۋ دامايلاردا ءبىتىم ايتاتىن شەشەندىگى بولعان. اناسى ۇلدان دا ارا-تۇرا ولەڭ قۇراستىرۋى قابىلەتىنە يە. سوندىقتان بولار بالا جامبىل ولەڭنىڭ كيەسىن ەرتە سەزىنگەن. بالا كۇنىنەن جىر-داستانعا قۇمارتقان ءارى توسىنداۋ مىنەزى بار جامبىلدىڭ اياق الىسى سول داۋىردەگى قازاق ولەڭىنىڭ قاسيەتى قونعان اقىن ءسۇيىنباي ارون ۇلىنىڭ كوڭىلىنەن شىعادى. وعان ريزا بولعان ءسۇيىنباي باتاسىن بەرگەن. ءوز كەزەگىندە جامبىل دا ءسۇيىنباي ارونۇلىن وزىنە ۇستاز تۇتىپ، ايتىسقا تۇسكەندە «مەنىڭ ءپىرىم ءسۇيىنباي» دەپ ءسوز باستايىن بولعان. ءحىح عاسىردىڭ ورتاسىندا دۇنيەگە كەلگەن قازاق دالاسىنداعى قوعامدىق ساياسي ءومىردىڭ بارلىق وزگەرىستەرىن كوزبەن كورىپ كوڭىلىنە ءتۇيدى. سول سەبەپتەن دە ەسكى مەن جاڭانىڭ تارتىسى سىندى ماڭگىلىك تاقىرىپتى جىرىنا ارقاۋ ەتتى. جامبىل جابايەۆتىڭ وزىنە ءتان ستيل رەتىندە ونىڭ شىعارماشىلىعىنىڭ جىراۋلار پوەزياسىنا ۇقساس كەلۋىنە ايتۋعا بولادى. ءوزى دە وتەگەن، سۇرانشى، ساۋرىق سىندى باتىرلاردىڭ كەسەك تۇلعاسىن قارا سوزبەن جاساپ، كەلەر ۇرپاققا ولار جايىنداعى مول ماعۇلماتتاردى جەتكىزە ءبىلدى.

اقىن اتى ۇلى وتان سوعىسى جىلدارى «لەنينگرادتىق ورەنىم» ولەڭىمەن شىقتى. نەمىس باسقىنشىلارىنىڭ قورشاۋىندا قالعان قالا تۇرعىندارى مەن ونداعى كەڭەس اسكەرلەرى وسى ولەڭمەن رۋحتانعانى دا تاريحتان ءمالىم.

جامبىل جابايەۆ شىعارمالارى 40 تىلگە اۋدارىلعان.