جامبىل وبلىسىنداعى «رۋحاني جاڭعىرۋ» باعدارلاماسى اياسىندا تۇزىلگەن قازاقستاننىڭ قاسيەتتى جەرلەرى كارتاسىنا وڭىرلىك ماڭىزعا يە نىسان رەتىندە الىنعان تاريحي-مادەني ەسكەرتكىشتىڭ كەيبىرى ومىردە بولعان، سوڭىنان وشپەس ءىز قالدىرعان تاريحي تۇلعالارعا ارناپ قويىلعان. سونداي تاريحي نىساننىڭ بىرىنە قازاق ان-كۇي ونەرىنىڭ كورنەكتى تۇلعاسى حالىق اقىنى، ءانشى، كومپوزيتور كەنەن ازىربايەۆتىڭ بەيىتىنە ماڭىنداعى ءبىرتۇتاس ساۋلەتتىك كەشەن جاتادى، دەپ جازادى Qamshy.kz اقپارات اگەنتتىگى. 

بۇل ساۋلەتتىك كەشەننىڭ قۇرامىنا ساياباق جانە مۇراجاي عيماراتى، اقىننىڭ ەسكەرتكىش ءمۇسىنى مەن بەيىتىنىڭ باسىنا قويىلعان قۇلىپتاس كىرەدى. مۋزەي كەشەنى 38 جىل بۇرىن سالىنعان. ونىڭ قورىندا اقىن-سازگەردىڭ ءومىرى مەن ونەر جولىنان حابار بەرەتىن 900-دەن اسا جادىگەر بار. اسىرەسە 7 جاسار كەنەنگە اكەسى سىيلاعان كىشكەنە دومبىرا مۋزەي جادىگەرلەرى ىشىندەگى ەڭ قۇندىسى سانالادى. كەزىندە بۇل دومبىرامەن اقىن «بوزتورعاي» مەن «كوك شولاق» اندەرىن ورىنداپتى. سول سەكىلدى كەنەن ازىربايەۆ وزىنە رۋحاني ۇستاز تۇتقان جامبىل جابايەۆ سىيلاعان كۇمىس جالاتىلعان بەلدىك تە مۋزەي قورىنداعى ەڭ قۇندى جادىگەر دەپ اتاۋعا بولاتىن.

كەنەن ازىربايەۆ 1884 جىلى قورداي اۋدانى ءماتىبۇلاق وڭىرىندە دۇنيە ەسىگىن اشقان. تۋما تالانت يەسى ەرەكشىلىك انشىلىك قابىلەتىنىڭ ارقاسىندا قازاقستاننىڭ ەڭبەك سىڭىرگەن ونەر قايراتكەرى، كومپوزيتور، حالىق اقىنى سىندى ابىرويلى اتاقتارعا قول جەتكىزدى. ونىڭ ونەر جولىنا العاش قادام باسقان ءساتى قازاق جەرىندەگى قوعامدىق-ساياسي ءومىردىڭ جاڭاشا بەتبۇرىستار كەزەڭىمەن تۇسپا تۇس كەلدى. زامانا اعىسىمەن وسىناۋ ءدۇبىرلى وقيعالاردىڭ بەل ورتاسىندا جۇرگەن اقىن وسى وقيعالاردى ءان-جىرىنا قوستى. ءارى ول شىعارماشالىعىندا قوعام ومىرىندەگى تاريحي وقيعالارعا قاتىستى ءوز ويى مەن ازاماتتىق ۇستانىمىن دا اشىق جەتكىزە الدى.

كەنەن ءوز شىعارماشىلىعىندا جۇزدەن اسا ءان شىعارىپ، ەكى جۇزدەي ليريكالىق، تاقىرىپتىق ارناۋلار مەن تولعاۋلاردىڭ اۆتورى سانالادى. سونداي-اق ونىڭ جىر-داستاندارىندا ومىردە بولعان تاريحي تۇلعالاردىڭ ءومىرى جايىندا ناقتى دەرەكتەر ۇسىنىلۋىمەن دە حالىقتىڭ كوڭىلىنە جول تابا العان. زەرتتەۋشىلەر كەنەن ازىربايەۆ شىعارماشىلىعىنداعى باستى ەرەكشەلىك رەتىندە ونىڭ وزىنە ءتان جەڭىل، ويناقى ءستيلدى اتايدى.اقىن شىعارماشىلىعىنان كەيدە جەتىسۋدىڭ ءداستۇرلى مەكتەبىنىڭ سارىنى بايقالسا، كوپ جاعدايدا ول ءوزىنىڭ ستيلىمەن جىرلاۋدى ءجون ساناعان.