مەملەكەت باسشىسى قاسىم-جومارت توقايەۆ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى حالىققا ارناعان جولداۋىندا قالا مەن اۋىل مەكتەپتەرى اراسىنداعى ءبىلىم ساپاسىنىڭ الشاقتىعىن جويۋ، «ديپلوممەن - اۋىلعا» باعدارلاماسىنىڭ اياسىن كەڭەيتۋ، وقۋشىلاردىڭ قابىلەتىن ايقىنداپ، كاسىبي باعىت-باعدار بەرۋ، دارىندى اۋىل جاستارىن ىرىكتەپ، وتاندىق جانە شەتەلدىك جوعارى وقۋ ورىندارىنا دايىنداۋ، وقۋشىلاردى ساپالى وقۋلىقتارمەن قامتاماسىز ەتۋ باعىتىندا ناقتى تاپسىرمالار بەرگەن بولاتىن.

بۇگىندە جامبىل وبلىستىق ءبىلىم سالاسىنداعى باقىلاۋ دەپارتامەنتى جولداۋ جۇكتەگەن مىندەتتەرگە سايكەس، جۇيەلى جۇمىستار اتقارۋدا. دەپارتامەنت ءوزىنىڭ جۇمىسىن جوسپارلاۋدا، ونىڭ ىشىندە پروفيلاكتيكالىق باقىلاۋدى جۇزەگە اسىرۋدا اۋىل مەكتەپتەرىن قامتۋدى كوزدەيدى. ويتكەنى، پروفيلاكتيكالىق باقىلاۋ جۇرگىزۋ كەزىندە اۋىل مەكتەپتەرىنىڭ ءبىلىم بەرۋ قىزمەتىنە تالداۋ جاسالىپ، قاجەتتىلىكتەرى انىقتالادى. ورىن العان ماسەلەلەر بويىنشا جەرگىلىكتى اتقارۋشى ورگاندارعا ۇسىنىمدار بەرىلىپ، وڭ شەشىمىن تابۋعا ىقپالى تيەدى.

جوسپارعا سايكەس سوڭعى 2 جىلدا 66 مەكتەپتە مەملەكەتتىك باقىلاۋ شارالارى جۇرگىزىلسە، ونىڭ 75 پايىزى (49) اۋىلدىق مەكتەپتەردە وتكىزىلگەن.

-باقىلاۋ شارالارىنىڭ ناتيجەلەرى قالالىق مەكتەپتەرمەن سالىستىرعاندا اۋىلدىق مەكتەپتەردىڭ ماتەريالدىق-تەحنيكالىق بازاسىنىڭ السىزدىگىن، كومپيۋتەرلىك تەحنيكامەن قامتاماسىز ەتىلۋى مەن ينتەرنەت جىلدامدىعىنىڭ، وقۋ-تاربيە پروسەسىن ۇيىمداستىرۋدا ءبىلىم سالاسىنداعى زاڭنامالاردىڭ تالاپتارىن ساقتاۋ دەڭگەيىنىڭ تومەندىگىن، پاندەر بويىنشا پەداگوگ كادرلاردىڭ تاپشىلىعىن كورسەتىپ وتىر.

بيىلعى جىلدىڭ وزىندە 22 اۋىلدىق مەكتەپتىڭ ءبىلىم بەرۋ قىزمەتىن جۇزەگە اسىرۋ ساپاسىنا پروفيلاكتيكالىق باقىلاۋ جۇرگىزىلىپ، زاڭناما تالاپتارىنا سايكەس كەلمەيتىن ءبىرقاتار دەرەكتەر انىقتالدى،-دەيدى دەپارتامەنت باسشىسى د.ۋسكۋمبايەۆا.

اتاپ ايتقاندا 9 اۋىلدىق مەكتەپتە قۇرىلتايشى قۇجاتتارىنىڭ قازاقستان رەسپۋبليكاسىنىڭ «ءبىلىم تۋرالى» زاڭىنىڭ 41-بابىنا سايكەس راسىمدەلمەۋى، 17 مەكتەپتە «كۇندەلىك» ەلەكتروندى جۋرنالىنىڭ تالاپقا سايكەس تولتىرىلماۋى، 11 مەكتەپتە بالالاردى 1 سىنىپقا قابىلداۋدى قازاقستان رەسپۋبليكاسى ءبىلىم جانە عىلىم ءمينيسترىنىڭ 2018 جىلعى 12 قازانداعى №564 بۇيرىعىنا سايكەس جۇرگىزبەۋ سىندى كەمشىلىكتەر انىقتالىپ، ناقتى شارالار قولدانىلعان.

بۇگىندە بۇل باعىتتاعى باقىلاۋ شارالارى جالعاسۋدا.