مەملەكەت باسشىسى قاسىم-جومارت توقايەۆتىڭ اعىمداعى جىلعى 2 قىركۇيەكتەگى «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى حالىققا ارناعان جولداۋى دامۋدىڭ ماڭىزدى باعىتتارىن ايقىندادى.

جولداۋداعى بەس باعىت – ەلىمىزدىڭ ۋاقىت تالابىنا ساي وركەندەۋىنىڭ ستراتەگياسى ەكەندىگىن اتاپ وتكەن ءجون. مەملەكەت باسشىسى اسىرەسە، جولداۋدىڭ ءتورتىنشى باعىتىندا الەۋمەتتىك جاڭعىرۋدىڭ جاڭا كەزەڭىندە ءبىلىم بەرۋ ساپاسىن جاقسارتۋدىڭ ءتيىمدى جولدارىنا توقتالدى. قالا مەن اۋىل مەكتەپتەرى اراسىنداعى ورتا ءبىلىمنىڭ ساپاسى الشاقتاپ بارا جاتقاندىعىن جانە نەگىزگى ماسەلە رەتىندە – اۋىلدىق جەرلەردەگى بىلىكتى پەداگوگ كادرلاردىڭ تاپشىلىعىن اتاپ كورسەتتى.

وسى ورايدا جامبىل وبلىسىنىڭ ءبىلىم سالاسىنداعى باقىلاۋ دەپارتامەنتى دە ءوزىنىڭ قۇزىرەتى شەگىندە وبلىستاعى اۋىل مەكتەپتەرىنىڭ جاعدايىن ۇنەمى نازاردا ۇستاپ وتىر. بۇل تۋرالى اتالمىش دەپارتامەنتتىڭ باسشىسى د.ۋسكەمبايەۆا اڭگىمەلەپ بەردى.

-راسىمەن دە، قازىرگى ۋاقىتتا اۋىل مەكتەپتەرىنىڭ جاعدايى، ونداعى ءبىلىم بەرۋدىڭ ساپاسى كوپ جاعدايدا سىن كوتەرمەيتىندىگى بەلگىلى.

وبلىستا 442 جالپى ورتا ءبىلىم بەرەتىن مەكتەپ بولسا، ونىڭ 358ء-ى، ياعني 80 پايىزدان استامى اۋىلدىق جەرلەردە ورنالاسقان. اۋىل مەكتەپتەرىنىڭ 18،5%-ى (66) ساماننان سوعىلسا، 32ء-نىڭ عيماراتى 60-شى جىلدارعا دەيىن سوعىلعان، 3ء-نىڭ عيماراتى اپاتتى جاعدايدا.

دەپارتامەنت ءبىلىم بەرۋ ۇيىمدارىندا قازاقستان رەسپۋبليكاسى زاڭنامالارىنىڭ جانە ءبىلىم سالاسىنداعى نورماتيۆتىك قۇقىقتىق اكتىلەردىڭ، مەملەكەتتىك جالپىعا مىندەتتى ءبىلىم بەرۋ ستاندارتتارىنىڭ ورىندالۋىنا مەملەكەتتىك باقىلاۋدى جۇزەگە اسىرادى. ونىڭ نەگىزگى فۋنكسيالارىنا پروفيلاكتيكالىق باقىلاۋ جۇرگىزۋ، جوسپاردان تىس تەكسەرۋلەر جۇرگىزۋ، ءبىلىم بەرۋ قىزمەتىمەن اينالىسۋعا ليسەنزيا بەرۋ، ءبىلىم تۋرالى قۇجاتتارعا اپوستيل قويۋ سىندى مىندەتتەر جاتادى،-دەيدى دەپارتامەنت باسشىسى.

سونىمەن قاتار دەپارتامەنت ءبىلىم بەرۋ سالاسىنداعى ءتۇيىندى ماسەلەلەردى زەردەلەۋ جانە تالداۋ، اپاتتى جانە ءۇش اۋىسىمداعى مەكتەپتەردىڭ جاعدايىنا، وقۋشى ورىندارىنىڭ جەتىسپەۋشىلىگىنە، ءبىلىم بەرۋ ۇيىمدارىنىڭ ماتەريالدىق-تەحنيكالىق بازاسىنا، ءبىلىم الۋشىلاردىڭ وقۋلىقتارمەن قامتاماسىز ەتىلۋىنە، قامقورشىلىق كەڭەستەردىڭ جۇمىسىنا، ءدىني ءبىلىم بەرۋ ۇيىمدارىنىڭ قىزمەتىنە، ۇلتتىق ءبىلىم بەرۋ دەرەكتەر قورىنىڭ تولتىرۋ ساپاسىنا مونيتورينگ جاسايدى. بۇدان بولەك جالپى ورتا ءبىلىم بەرۋ ۇيىمدارىندا جانە جوعارى وقۋ ورىندارىندا وقۋ جەتىستىكتەرىن سىرتتاي باعالاۋدى ۇيىمداستىرادى جانە وتكىزەدى. جانە دە ءبىلىم بەرۋ ۇيىمدارىنداعى ءبىلىم ساپاسىن باقىلايدى.

سونىمەن قاتار، قازىرگى ۋاقىتتا دەپارتامەنتكە بالالاردىڭ قۇقىقتارىن قورعاۋ بويىنشا جاڭا فۋنكسيالار بەرىلۋدە.