مەملەكەت باسشىسى قاسىم-جومارت توقايەۆ «سىندارلى قوعامدىق ديالوگ- قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا ەكونوميكانى وركەندەتۋدىڭ بىردەن-بىر تەتىگى رەتىندە شاعىن جانە ورتا كاسىپكەرلىكتى دامىتۋعا ايرىقشا نازار اۋدارعانى بەلگىلى. بۇل تۇرعىدا تيىمدىلىككە باسىمدىق بەرىلمەك.
وسى ورايدا جامبىل وبلىسىندا ايماق باسشىسى اسقار مىرزاحمەتوۆتىڭ باستاماسىمەن الەۋمەتتىڭ الەۋەتىن ارتتىرۋعا باعىتتالعان پيلوتتىق جوبا جۇزەگە اسپاق. بۇل باستامانى اسقار يسابەك ۇلى جۋىردا عانا ۇكىمەت مۇشەلەرىنە تانىستىرىپ، تيىمدىلىگىن دالەلدەپ بەردى.
ايتا كەتۋ كەرەك، قازىرگى تاڭدا جامبىل وبلىسىندا كاسىپكەرلەرگە كەڭ كولەمدە قولداۋ كورسەتىلۋدە. بۇل قاتاردا قامتارىمسىز گرانتتار دا تاعايىندالۋدا.
كۇنى كەشە جامبىل وبلىسى اكىمدىگىنىڭ كاسىپكەرلىك جانە يندۋستريالدى – يننوۆاسيالىق دامىتۋ باسقارماسى «بيزنەستىڭ جول كارتاسى 2020» مەملەكەتتىك باعدارلاماسى شەڭبەرىندە كاسىپكەرلەردىڭ جاڭا بيزنەس-يدەيالارىن جۇزەگە اسىرۋ ءۇشىن وتكىزىلگەن مەملەكەتتىك گرانتتىق قارجىلاندىرۋ بويىنشا جالپى كونكۋرستىڭ ناتيجەسىن حابارلادى.
كونكۋرسقا قاتىسۋ ءۇشىن بارلىعى 46 ءوتىنىم، ونىڭ ىشىندە 3 جوبا مۇمكىندىگى شەكتەۋلى ازاماتتاردان ءتۇستى. تاراز قالاسىنان – 27 جوبا، ونىڭ ىشىندە 2 مۇمكىندىگى شەكتەۋلى ازاماتتار، سارىسۋ اۋدانىنان – 12 جوبا، جۋالى اۋدانىنان – 2 جوبا، ونىڭ ىشىندە 1 مۇمكىندىگى شەكتەۋلى ازامات، بايزاق اۋدانىنان – 2 جوبا، ت.رىسقۇلوۆ اۋدانىنان – 1 جوبا، شۋ اۋدانىنان – 1 جوبا، مويىنقۇم اۋدانىنان – 1 جوبا قارالدى. كونكۋرستىق كوميسسيانىڭ 1 وتىرىسى ءوتىپ، ولاردىڭ ناتيجەسى بويىنشا كوميسسيا مۇشەلەرى ءار جوبانى جەكە – جەكە تىڭداپ، شەشىمدەرىن حاتتامالارعا قول قويۋ ءراسىمى ارقىلى راسىمدەدى. كوميسسيا مۇشەلەرىنىڭ شەشىمى بويىنشا 6 كاسىپكەر 12،5 ملن.تەڭگەگە گرانت يەگەرلەرى اتاندى.
تاراز قالاسىنان 10،5 ملن.تەڭگەگە 5 جوبا ماقۇلداندى، اشىلاتىن جۇمىس ورىندارىنىڭ سانى 12 جانە مويىنقۇم اۋدانىنان 2 ملن.تەڭگەگە 1 جوبا ماقۇلدانىپ، 3 جۇمىس ورىنى اشىلاتىنى بەلگىلى بولدى. قازىرگى تاڭدا جالپى كونكۋرستان جەڭىمپاز اتانعان كاسىپكەرلەرگە كونكۋرستىق كوميسسيانىڭ شەشىمى تۋرالى حابارلامالاردى جولداۋ جۇمىستارى اياقتالىپ، باعدارلامانىڭ ۇيلەستىرۋشىسى قارجى اگەنتتىگى جانە شاعىن كاسىپكەرلىك سۋبەكتىسى اراسىندا گرانت بەرۋ تۋرالى شارتتار راسىمدەلۋدە.
