جامبىل وبلىسىندا جاڭارتىلعان ءبىلىم بەرۋ مازمۇنىنا كەزەڭ-كەزەڭىمەن كوشۋ تاپسىرماسىنا سايكەس ءبىلىم مەكەمەلەرىن قاجەتتى پەداگوگتارمەن قامتاماسىز ەتۋ ماقساتىندا جوسپارلى جۇمىستار جۇرگىزىلۋدە. بۇل شارالار وبلىس اۋداندارىندا دا مىقتاپ قولعا الىنىپ كەلەدى. ماسەلەن، جۋالى اۋدانىندا جاڭارتىلعان ءبىلىم بەرۋ مازمۇنىنا كوشۋگە وراي 40 مەكتەپ ديرەكتورى مەن 40 ديرەكتوردىڭ وقۋ ءىسى جونىندەگى ورىنباسارلارى مەن 25 تاربيە ءىسى جونىندەگى ورىنباسارلارى «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ پەداگوگيكالىق شەبەرلىك ورتالىعىنىڭ تاراز قالاسىنداعى فيليالىندا قىسقا مەرزىمدى ءبىلىم مازمۇنىن جاڭعىرتۋ كۋرستارى بويىنشا ەكى اپتالىق جانە ءبىر اپتالىق كۋرستاردان ءوز بىلىمدەرىن جەتىلدىردى. سونداي-اق، الماتى قالاسىندا 3 تاربيە ورىنباسارى «ماڭگىلىك ەل» باعدارلاماسى بويىنشا بىلىكتىلىگىن ارتتىدى. ترەنەرلىك كۋرستان 107 ءمۇعالىم ءوتتى. ال روبوتوتەحنيكا كۋرسىنان 35 ءمۇعالىم ءوتتى. كريتەريالدى باعالاۋ بويىنشا – 19 مەكتەپ ديرەكتورىنىڭ وقۋ ءىسى جونىندەگى ورىنباسارى ءوتتى.
– «ورلەۋ» باۇو ۇيىمداستىرۋىمەن وتكەن جىلى اۋدانىمىزدا نەگىزگى پاندەر بويىنشا بىلىكتىلىكتى ارتتىرۋ كۋرستارى وتكىزىلىپ، باستاۋىش سىنىپ مۇعالىمدەرى 120، گەوگرافيا ءپانى مۇعالىمدەرى 28، حيميا ءپانى مۇعالىمدەرى 25، بيولوگيا ءپانى بويىنشا 28، تاريح ءپانى 24، قۇقىق تاريح پاندەرى بويىنشا 30، ماتەماتيكا ءپانى 29، دەنە شىنىقتىرۋ 31، قازاق ءتىلى 28، ورىس ءتىلى 28، ينكليۋزيۆتى وقىتۋ بويىنشا 24 مۇعالىمگە (ءااد جانە پەداگوگ پسيحولوگتار، ءوزىن-وزى تانۋ ءپان مۇعالىمدەرى) اۋدان ورتالىعىندا كوشپەلى كۋرستار ۇيىمداستىرىلدى.
تاراز قالاسى پشو بازاسىندا ءار ءپان بويىنشا 132 ءمۇعالىم بىلىكتىلىكتى ارتتىرۋ كۋرسىنان ءوتتى. جالپى وتكەن وقۋ جىلىندا 578 ءمۇعالىم كۋرستان ءوتىپ، 478 ءمۇعالىمدى بىلىكتىكتى ارتتىرۋ كۋرسىنان وتۋگە سۇرانىس بەرىلدى. 2018 جىلدىڭ قاراشا ايىندا «باعالاۋعا ارنالعان تاپسىرمالاردى دايىنداۋ جانە ساراپتاۋ» تاقىرىبىندا 15 ءپان مۇعالىمدەرى جانە «روبوت تەحنيكاسى نەگىزدەرى» بويىنشا 6 ءمۇعالىم تاراز قالاسى پشو بازاسىندا كۋرستان ءوتتى.
اعىمداعى جىلدىڭ باسىنان بەرى 30 قازاق ءتىلى مەن ادەبيەتى ءپانى، 80 باستاۋىش سىنىپ ءمۇعالىمى، 35 دەنەشىنىقتىرۋ، 10 تاريح ءپانى، 21 فيزيكا ءپانى ءمۇعالىمى جاڭارتىلعان ءبىلىم بەرۋ مازمۇنى بويىنشا كۋرستان ءوتىپ سەرتيفيكاتتالدى. 30 ءمۇعالىم «روبوتوتەحنيكا جانە 3D مودەلدەۋ» تاقىرىبىندا ەكى اپتالىق وقۋعا قاتىستى، – دەيدى جۋالى اۋداندىق ءبىلىم ءبولىمىنىڭ باسشىسى ءماجيت ايجانوۆ.
قازىرگى كەزدە اۋداننىڭ ءبىلىم بەرۋ سالاسىنىڭ الدىندا ينفراقۇرىلىمدىق دامىتۋ مەن جاڭارتىلعان مازمۇنعا كوشۋ باستى باسىمدىق بولىپ وتىر. اۋداندا 2016-2017 وقۋ جىلىندا 1 سىنىپ، 2017-2018 وقۋ جىلىندا 2، 5، 7 سىنىپتار جاڭارتىلعان ءبىلىم مازمۇنىنا كوشسە، 2018-2019 وقۋ جىلىندا 3،6،8-سىنىپتار جاڭارتىلعان ءبىلىم مازمۇنىنا كوشكەن.
پىكىر قالدىرۋ