ەلباسىنىڭ تىكەلەي باستاماسىمەن جاريالانعان جاستار جىلىندا جامبىل وبىسىندا جارقىن جوبالار كوپتەپ جۇزەگە اسۋدا. وسكەلەڭ ۇرپاققا باعىت-باعدار سىلتەپ، قامقورلىق جاساۋدا جەرگىلىكتى اتقارۋشى ورگانداردان بولەك جەكەلەگەن كاسىپورىندار دا سۇبەلى ۇلەس قوسۋدا. سولاردىڭ قاتارىندا بيىل جيىرماسىنشى بەلەسىنە قادام باسقان «قازفوسفات» جاۋاپكەرشىلىگى شەكتەۋلى سەرىكتەستىگىنىڭ دە شوقتىعى بيىك.

كومپانيا بيىل جاستار جىلىنا وراي ءوندىرىس سالاسىندا جۇرگەن وزىق ويلى، ونەرتاپقىشتىق قاسيەتى بار جاسى 35-كە دەيىنگى ازاماتتار اراسىندا «بولاشاق ءبىزدىڭ قولىمىزدا» اتتى كونكۋرس وتكىزدى. جالپى، سەرىكتەستىكتە 6 223 ادام ەڭبەك ەتسە، ونىڭ 2 167ء-سى 18-35 ارالىعىنداعى جاستار. كونكۋرستىڭ العاشقى كەزەڭىندە وسى كومپانيادا جۇمىس ىستەيتىن 70-كە جۋىق جاس كونكۋرستىڭ ءبىرىنشى كەزەڭىندە وزدەرىنىڭ 59 كرەاتيۆتى جوبالارىن ۇسىنىپ، سونىڭ ىشىندە 35ء-ى اقتىق سىنعا وتكەن بولاتىن. ال سەرىكتەستىكتىڭ مينەرالدى تىڭايتقىش زاۋىتىندا وتكەن اقتىق سىندا ىرىكتەۋدەن ىركىلمەي وتكەندەر ءوز جوبالارىن ارنايى قۇرىلعان كوميسسيا الدىندا قورعادى.

– جوبانىڭ ماقساتى – كومپانيادا ەڭبەك ەتەتىن جاستاردىڭ ءوزىن-وزى دامىتۋىنا جاعداي جاساۋ. كوشباسشىلىق قابىلەتىن ارتتىرىپ، ىسكەرلىك بەلسەندىلىگىن، قارىم-قابىلەتىن، جوبالاۋ داعدىلارىن قالىپتاستىرۋ جانە شىعارماشىلىق ۇجىمدا ادىس-تاسىلدەرىن جەتىلدىرىپ، يدەيالارىن قاناتتاندىرۋ. بۇدان بولەك جاستاردىڭ يدەياسى ارقىلى قوعامداعى نەمەسە كومپانياداعى تەحنيكالىق، ەكونوميكالىق، الەۋمەتتىك سەكىلدى سان ءتۇرلى سالاداعى وزەكتى ماسەلەلەردى شەشۋ، – دەيدى «قازفوسفات» ج ش س باس ديرەكتورى مۇقاش ەسكەندىروۆ.

وزدەرىنىڭ كرەاتيۆتى يدەيالارى مەن ۇتىمدى ۇسىنىستارىن كوپتىڭ تالقىسىنا سالعان ونەرتاپقىشتىڭ ءبىرى – «قازفوسفات» ج ش س مينەرالدى تىڭايتقىش زاۋىتى باس ەنەرگەتيگىنىڭ ورىنباسارى ابزال قونىسبايەۆ. ول ءوز جوباسىندا ءوندىرىس ورنىنداعى جۇك كوتەرگىش مەحانيزمدەردەگى پايدالانىلاتىن سىمداردى الىپ تاستاپ، ونىڭ ورنىنا قابىلداعىش جانە جىبەرگىش سيگنالداردى ەنگىزۋ ارقىلى مەحانيزمدى پۋلتپەن باسقارۋ ۇسىنىلعانىن ايتادى.

– كونكۋرسقا جاستار ەكولوگيالىق، الەۋمەتتىك، تەحنيكالىق، ەلەكترلىك، مەحانيكالىق جانە وندىرىستىك سالالار بويىنشا ءوز جوبالارىن اكەلىپ قورعاپ جاتىر. نەگىزىنەن مەنىڭ جوبام سىمسىز باسقارۋ دەپ اتالادى. بۇل جۇك كوتەرگىش زاتتاردى پۋلت ارقىلى الىستان باسقارۋ. اتالعان جاڭا قۇرىلعى العاش مينەرالدى تىڭايتقىش زاۋىتىندا قولدانىلىپ، ءقازىر وڭىردەگى ءوندىرىس ورىندارىنىڭ سەكسەننەن استام نۇكتەلەرىندە پايدالانۋعا ەنگىزىلىپ ۇلگەردى. وسى قۇرىلعى ارقىلى 600-900 كەلىلى تارتاتىن جۇكتى اشىق ۆاگوندارعا ارتۋعا بولادى. بۇل ءوز كەزەگىندە ەڭبەك ونىمدىلىگىن ارتىراتىنى انىق، – دەيدى ابزال قامبار ۇلى.

سونىمەن قاتار كومپانيا جاستارى اراسىندا ونەر سايىستارى مەن سپورت جارىستارى كوپتەپ وتكىزىلۋدە. مۇنىڭ بارلىعى دا حيميا ونەركاسىبىنىڭ الىبى سانالاسىن سەرىكتەستىكتىڭ جاس تولقىنعا دەگەن لايىقتى قامقورلىعى ەكەندىگى داۋسىز.