مەملەكەت باسشىسى قاسىم-جومارت توقايەۆتىڭ «سىندارلى قوعامدىق ديالوگ-قازاقستان تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا الەۋمەتتىك سالانى دامىتۋعا ايرىقشا باسىمدىق بەرگەنى بەلگىلى. بۇگىندە جامبىل وبلىسىندا جولداۋ جۇكتەگەن مىندەتتەردى جۇزەگە اسىرۋ باعىتىندا جۇيەلى جۇمىستار اتقارىلۋدا. اسىرەسە، اتاۋلى الەۋمەتتىك كومەك تاعايىنداۋدىڭ جاڭا ۇلگىسىن ءتۇسىندىرۋ جۇمىستارى كەڭ كولەمدە جۇرگىزىلۋدە. وسى ورايدا وبلىس اكىمدىگى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى تيمۋرجان نۇرىمبەتوۆ بۇل باعىتتا اتقارىلىپ جاتقان شارالار تۋرالى اڭگىمەلەپ بەردى.

–اتاۋلى الەۋمەتتىك كومەك الۋشى وتباسىلارعا تالداۋ جاساعاندا، 50%-عا جۋىعى كوپبالالى وتباسىلار ەكەنى انىقتالدى. مۇنداي وتباسىلارعا بەرىلەتىن جاڭا مەملەكەتتىك جاردەماقىنى وتباسى بالالارىنىڭ سانىنا قاراي 42500 تەڭگەدەن 73 375 تەڭگەگە دەيىن، ايلىق ەسەپتىك كورسەتكىشكە ەسەلەنگەن مولشەردە بەلگىلەۋ ۇسىنىلادى. سونىمەن قاتار، وڭىرىمىزدە كوپبالالى وتباسىلاردىڭ تابىسى كەدەيلىك شەگىنەن 100 تەڭگە اسىپ كەتىپ جاردەماقى الا الماعانىن دا كورىپ ءجۇرمىز. جاڭا وزگەرىستەر وسىنداي الەۋمەتتىك تەڭسىزدىكتى جويۋ ماقساتىندا جاسالىنعان قادام. بۇل كوپبالالى انالاردىڭ بەدەلىن مويىنداپ، ولاردىڭ ءال-اۋقاتىن ارتتىرۋعا سەپ بولارىنا سەنەمىز. اتاۋلى الەۋمەتتىك كومەك وتباسىلارعا تولەنەتىن جالعىز كومەك ەمەس. سونداي-اق بالالى وتباسىلارعا الەۋمەتتىك تولەمدەر مەن جاردەماقىلاردىڭ ءارتۇرلى تۇرلەرىن تولەۋ قاراستىرىلادى. بۇدان بولەك از قامتاماسىز ەتىلگەن وتباسىلار ءۇشىن قوسىمشا الەۋمەتتىك كەپىلدەندىرىلگەن پاكەت ەندىرىلەدى.

قازاقستان رەسپۋبليكاسىنىڭ «مەملەكەتتىك اتاۋلى الەۋمەتتىك كومەك تۋرالى» زاڭىنا وزگەرىستەر ەنگىزىلىپ، تابىسى از وتباسىلاردان شىققان بالالارعا كەپىلدى الەۋمەتتىك پاكەت بەرىلەتىن بولادى. مەكتەپكە دەيىنگى جاستاعى بالالار تاماقپەن، گيگيەنالىق قۇرالدارمەن جانە ءبىلىم بەرۋ قىزمەتتەرىمەن قامتاماسىز ەتىلەدى. ال، مەكتەپتەگى بالالار ءۇشىن مەكتەپتەردە تەگىن ىستىق تاماق، كۇندەلىكتى مەكتەپكە دەيىن جانە كەرى تەگىن جول ءجۇرۋ، سونداي-اق مەكتەپ فورماسى مەن وقۋ قۇرالدارى مەملەكەت ەسەبىنەن بەرىلەدى،-دەيدى جامبىل وبلىسى اكىمدىگى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى تيمۋرجان نۇرىمبەتوۆ.