ۇدەمەلى يندۋستريالدى-يننوۆاسيالىق دامىتۋ باعدارلاماسى اياسىندا جامبىل وبلىسىندا كوپتەگەن ءوندىرىس ورىندارى اشىلىپ، ءوز جۇمىستارىن جولعا قويىپ الدى. وسى ورايدا «Talas Investment Company» جاۋاپكەرشىلىگى شەكتەۋلى سەرىكتەستىگى جامبىل وبلىسى، قاراتاۋ قالاسىنىڭ توڭىرەگىندە ناتريي ءسيانيدى زاۋىتىنىڭ قۇرىلىسىن قولعا الىپ، بۇگىندە جۇمىسىن جەمىستى جالعاستىرۋدا.

بارشاعا بەلگىلى، قاراتاۋ قالاسىنىڭ تاريحى حيميا يندۋسترياسىنىڭ دامۋىمەن تىعىز بايلانىستى. مۇندا سالاداعى تەحنيكالىق ماماندار شوعىرى قالىپتاستى. ەرتەرەكتە تەمىرجول جەلىسى تارتىلعان. مىنە، وسىنداي فاكتورلار جاڭا زاۋىت قۇرىلىسىنىڭ ورنىن تاڭداۋدا وڭ سەپتىگىن تيگىزدى.

اتالمىش جوبانى جۇزەگە اسىرۋ ءۇشىن 24،2 ميلليارد تەڭگەدەن استام قاراجات جۇمسالدى. ونىڭ ىشىندە 16،2 ميلليارد تەڭگە «قازاقستان دامۋ بانكى» اكسيونەرلىك قوعامى ارقىلى الىنسا، كومپانيا قۇرىلتايشىلارى 7 ميلليارد تەڭگەدەن استام قاراجات قۇيدى. سونىمەن قاتار "بيزنەستىڭ جول كارتاسى-2020" مەملەكەتتىك باعدارلاماسى ارقىلى ينفراقۇرىلىم جۇرگىزۋ ءۇشىن مەملەكەتتىك بيۋدجەتتەن 1،47 ميلليارد تەڭگە ءبولىندى.

2014 جىلدىڭ ماۋسىم ايىندا بارلىق قۇرىلىس-مونتاجداۋ جۇمىستارى اياقتالدى. 2015 جىلى جانە 2016 جىلدىڭ باسىندا ىسكە قوسۋ جۇمىستارى جۇرگىزىلدى. ال، 2016 جىلدىڭ شىلدەسىنەن ساپالىق نەگىزدەرگە ساي ناتريي ءسيانيدىنىڭ العاشقى لەگى شىعارىلا باستادى. مۇندا شيكىزات بەرۋدەن باستاپ دايىن ءونىم شىعارعانعا دەيىنگى تەحنولوگيالىق پروسەسس تولىقتاي اۆتوماتتاندىرىلعان. ءارى ءوندىرىس تەحنولوگياسى الەمدىك ستاندارتتارعا سايكەستەندىرىلگەن.

قازىرگى تاڭدا زاۋىت قازاقستان بويىنشا ناتريي ءسيانيدى سياقتى بىرەگەي يننوۆاسيالىق ءونىم شىعاراتىن جانە اتالمىش ءونىمدى يمپورتتاۋعا قابىلەتتى تۇڭعىش ءارى تەڭدەسسىز نىسان بولىپ سانالادى. بۇل تۇرعىدا وتاندىق دايىن ءونىمدى جەتكىزۋشىلەر جانە تۇتىنۋشىلارمەن ورتاق مەموراندۋمدار جاسالعان.

بۇگىندە ناتريي ءسيانيدىن ءوندىرۋ كومپانيانىڭ بەلگىلەنگەن جوسپارىنا سايكەس، وندىرىستىك قۋاتتىلىعىنا شىعىپ كەلەدى. سونىمەن قاتار دايىن يننوۆاسيالىق ءونىم «التىنالماس»، «ۆارۆارينسكوە»، «گمك كازاحالتىن» اكسيونەرلىك قوعامدارى، «كازسينك» جاۋاپكەرشىلىگى شەكتەۋلى سەرىكتەستىگى جانە 20-دان استام التىن ءوندىرۋشى كومپانيالارعا جونەلتىلۋدە. بۇدان بولەك ءونىم قوسىمشا رەسەي، تاجىكستان، قىرعىزستانعا ەكسپورتتالۋدا. ال، مينەرالدى تىڭايتقىشتاردى الماتى، جامبىل جانە تۇركىستان وبلىستارىنىڭ شارۋالارى تۇتىنۋدا.