جاستار جىلىنىڭ اشىلۋ سالتاناتىندا ەلباسى نۇرسۇلتان نازاربايەۆ قابىلەتتى جاستارعا مول مۇمكىندىكتەر ۇسىنىپ، ماڭىزدى قاجەتتىلىكتەرىن قامتاماسىز ەتۋ ءۇشىن ۇكىمەتكە نەگىزگى بەس تاپسىرمانى پىسىقتاۋدى تاپسىرعان بولاتىن. سونىڭ ىشىندە جاستاردى جۇمىسپەن قامتۋ ماسەلەسى بويىنشا دا ناقتى مىندەتتەر جۇكتەلدى.

ەلباسى تاپسىرماسىنا سايكەس الداعى ۋاقىتتان باستاپ نەسيە بەرۋدىڭ جانە وقىتۋ ءىسىنىڭ وڭ تاجىريبەسى نەگىزىندە بارلىق وڭىردە «جاس كاسىپكەر» باعدارلاماسى ازىرلەندى. جوبا اياسىندا جىل سايىن ءبىلىم الاتىن جۇمىسسىز جاستار مەن ءوزىن ءوزى جۇمىسپەن قامتىعانداردىڭ سانى 100 مىڭ ادامعا دەيىن تولىعادى دەگەن جوسپار بار.

قازىرگى تاڭدا «اتامەكەن» ۇلتتىق كاسىپكەرلەر پالاتاسى «باستاۋ» جوباسى بويىنشا 11 مىڭنان استام بيزنەس جوبالار ىسكە قوسىلىپ، 16 مىڭعا جۋىق جۇمىس ورنى اشىلعان.

ىسكە تالاپ بىلدىرگەن جاستارعا قولداۋ كورسەتۋ قاجەتتىگىن ەسكەرتكەن ەلباسى: «ۇكىمەتكە «بيزنەس-2020» جول كارتاسى اياسىندا جاس كاسىپكەرلەر ءۇشىن گرانت بويىنشا بولىنەتىن قارجى كولەمىن ەكى ەسە ارتتىرۋدى تاپسىرامىن. جالپى، ءۇش جىل ىشىندە 300 مىڭعا جۋىق جاستارىمىز بيزنەستىڭ قىر-سىرىن مەڭگەرىپ شىعادى. كەم دەگەندە 80 مىڭ ادام نەمەسە ولاردىڭ تورتتەن ءبىرى ءوز كاسىبىن باستاپ، ەل ەكونوميكاسىنا ەلەۋلى ۇلەس قوساتىن بولادى» – دەگەن ەدى. تالاپتى جاستارعا جاسالىپ جاتقان مۇمكىندىكتەر مۇنىمەن عانا شەكتەلمەيدى. ەندى ءبىتىرۋشى كۋرستارداعى 60 مىڭعا جۋىق ستۋدەنتتى بيزنەسكە باۋلۋ ءۇشىن باعدارلاما قابىلدانىپ، ونى جۇزەگە اسىرۋعا 2019-2021 جىلدارى 32،1 ميلليارد تەڭگە بولىنەدى. وسىنداي وڭ باستامالار جامبىلدىقتاردى دا جىگەرلەندىرىپ تاستاعانى ءسوزسىز. قازىرگى تاڭدا ايماقتا جاس كاسىپكەرلەردى قولداۋعا باعىتتالعان كوپتەگەن تىرلىكتەر جۇزەگە اسۋدا.

-بۇل – مەملەكەتتىڭ جاستارعا جاساپ وتىرعان ۇلكەن قامقورلىعى. بۇعان دەيىن دە ەلباسى باستاماسىمەن تالاي باعدارلامالار قولعا الىنىپ، جوبالار جۇزەگە اسىرىلىلعان بولاتىن. ماسەلەن، «Zhas Project» جوباسى بويىنشا تالاس اۋدانىندا جالپى 33 جوبا تاپسىرىلىپ، ونىڭ ىشىندە بەس جوباعا ءبولىم تاراپىنان قولداۋ كورسەتىلدى. اتاپ ايتساق، «Beauty Naz» الەۋمەتتىك شاشتارازىنا 576،6 مىڭ، «بوبەك Damu» بالالاردى جان-جاقتى دامىتۋ ورتالىعىنا 1000،0 مىڭ، اشىق اسپان استىنداعى «Youth Cinema» كينوتەاترىنا 998،4 مىڭ، «Djuks» تىگىن سەحىنا 993،97 مىڭ، «Talas travelers» جوبالارىنا 962،66 مىڭ تەڭگە ءبولىندى. جالپى جوبالار ءۇش كەزەڭ بويىنشا ىرىكتەلدى. ناتيجەسىندە اۋدان اكىمدىگى كاسىپكەرلىك جانە ونەركاسىپ ءبولىمى تاراپىنان قولداۋ كورسەتىلگەن 5 جوبانىڭ بىرەۋى گراتتى ياعني قايتارىمسىز قارجنىنى يەلەندى.

بۇدان بولەك جاستارعا كاسىبىن جۇرگىزۋ ءۇشىن مەكەمە تاراپىنان اگرو قارجىلىق ۇيىمدار جانە ەكىنشى دەڭگەيلى بانكتەردەن نەسيە ءبولۋى ءۇشىن ءتيىستى جۇمىستار اتقارىلىپ جاتىر. وتكەن جىلدىڭ وزىندە 44 ميلليون تەڭگەگە جاستاردىڭ قاتىسۋىمەن 12 جوبا ىسكە اسىرىلدى،-دەيدى تالاس اۋدانى اكىمدىگىنىڭ كاسىپكەرلىك، ونەركاسىپ جانە تۋريزم ءبولىمىنىڭ باسشىسى اۋدانبەك تاۋاساروۆ.

الداعى ۋاقىتتا دا كاسىپپەن اينالىسۋعا تىلەك بىلدىرگەن جاستاردىڭ ۇسىنىستارى نازارعا الىنىپ، ولاردى قولداۋ جۇمىستارى جالعاسىن تابا بەرەدى.