بۇگىندە مەملەكەت تاراپىنان كاسىپكەرلىكتى قولداۋ باعىتىندا ءتۇرلى كومەكتەر كورسەتىلىپ جاتىر. قازاقستان رەسپۋبليكاسىنىڭ پرەزيدەنتى ق.توقايەۆ تا «سىندارلى قوعامدىق ديالوگ-قازاقستان تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا شاعىن جانە ورتا بيزنەستى دامىتۋدىڭ باسىم باعىتتارىن ايقىنداپ بەردى.

قازىرگى تاڭدا جامبىل وبلىسىندا وسىنداي مۇمكىندىكتەردى پايدالانىپ، ءوز ءىسىن دوڭگەلەنتىپ وتىرعان كاسىپكەرلەر از ەمەس. سولاردىڭ ءبىرى- گۇلدانا دوسىمبەكوۆا. انانىڭ ءتالىمىن تەرگەن بالالارى دا ەڭبەككە بەيىم بولىپ وسۋدە. اسىرەسە، كەنجەسى مەيىرلان جايلى كوپ ايتۋعا بولادى. 28 جاستاعى جىگىت اقتاۋ تاۋىنىڭ ەتەگىندەگى ءۇشبۇلاقتىڭ ماڭايىندا ويپاڭداۋ جەردە شارۋا قوجالىعىنىڭ تىزگىنى ۇستاپ، تىرلىگىن تىكتەۋدە.

– وسىدان ونشاقتى جىل بۇرىن جان جارىم دۇيسەنبەك ساعىنتايەۆ ويلاماعان جەردەن وپات بولدى. تەمىرجول سالاسىندا ەڭبەك ەتەتىن. قاتارداعى تەمىرجولشىدان ديرەكتورلىققا دەيىن ءوستى. بالالارى مەيىرلان مەن ەرلان دا اكەلەرىنىڭ جولىن قۋىپ جۇرگەن. اكەنىڭ ومىردەن وزعانى ارينە، وتباسىمىزعا اۋىر ءتيدى. مەن ءوزىم سارىسۋ اۋدانىنداعى مەكتەپتەردىڭ بىرىندە باستاۋىش سىنىپ ءمۇعالىمى بولىپ قىزمەت جاساپ جۇرگەن ەدىم. ءتورت ۇل-قىزدى باعىپ، شارۋانىڭ نە ەكەنىن بىلگەن دە ەمەسپىن. قازاقتىڭ داستۇرىندە انانىڭ باقىتى – بالا ءسۇيۋ، وتاعاسىنىڭ پارىزى – وتباسىنا تىرەك بولۋ. ءبىراق وتاعاسى ومىردەن وتكەندە ويلانادى ەكەنسىڭ. ءوزى جاڭادان عانا اشقان شارۋا قوجالىعى بار، باسقا دا كاسىپتى ويلاستىرىپ جۇرگەن وتاعاسىنىڭ ارمان وتىن وشىرمەي ارمەن قاراي جۇزەگە اسىرسام دەگەن وي پايدا بولدى. سودان تالاس اۋداندىق كاسىپكەرلىك جانە ونەركاسىپ ءبولىمىنىڭ باسشىسى اۋدانبەك تاۋاساروۆقا جولىقتىم. قينالعاندا اقىل بەرەر، كومەكتەسەر جاننىڭ بارى قانداي جاقسى. «ءسىز، بالالارىڭىز كونسە، كۇيەۋىڭىزدىڭ تىرلىگىن العا جىلجىتىڭىز، ودان وكىنبەيسىز» دەدى اعالىق اقىلىن بەرىپ.

اقىلعا سالىپ ەدىم، «اكەمىزدىڭ شارۋاشىلىعىن قولعا الامىز» دەپ، ولار دا كەلىسە كەتتى. جاسىراتىن نە بار، مال جايۋدىڭ قىر-سىرىن جەتە بىلمەگەندىكتەن العاشقى كەزدەرى بالاپاندارىم كوپ قينالدى. الايدا، ولار تاباندىلىق تانىتتى. قورا-جاي سوقتى، جەكە ءۇي سالدى. نە كەرەك، الەۋمەتتىك جاعدايلارىن جاساپ الدى. ەڭبەك ەتەمىن دەگەنگە مەملەكەتتىڭ دە كومەگى كوپ ەكەن. «DAMU» كاسىپكەرلىكتى قولداۋ قورى ارقىلى 6 ميلليون تەڭگەگە دەيىن جەتى جىلعا نەسيە الىپ، ونى ورنىمەن جۇمسادى، – دەيدى گۇلدانا.

بۇگىندەرى «مەيىرلان» شارۋا قوجالىعىندا 700 باسقا تارتا قازاقتىڭ ەدىلباي قويى بار. ءىرى قارانى دا ءوسىرىپ وتىر ەكەن. مەيىرلان باتىر مال تۇقىمىن اسىلداندىرىپ، ۇكىمەتتەن سۋبسيديا الۋ جاعىن دا ويلاستىرىپ ءجۇر. باۋىرى ەرلان دا كاسىبىن تاستاپ، ءىنىسىنىڭ تىرلىگىنە كومەككە كەلدى. ال ونىڭ جۇبايى ايجان «ديپلوممەن اۋىلعا» باعدارلاماسىمەن كوكتال اۋىلىنداعى ماعجان جۇمابايەۆ اتىنداعى ورتا مەكتەپتە جۇمىسقا تۇرىپ، اعىلشىن ءتىلى پانىنەن ۇستازدىق ەتۋدە.