مەملەكەت باسشىسى ن.ءا.نازاربايەۆ ايتقانداي، «پاتريوتيزم - كىندىك قانىڭ تامعان جەرىڭە، وسكەن اۋلىڭا، قالاڭ مەن وڭىرىڭە، ياعني تۋعان جەرىڭە دەگەن سۇيىسپەنشىلىكتەن باستالادى». راسىندا دا، ۇلى دالانىڭ ۇرپاعى ۇشقان ۇياسىن ۇمىتۋدى ۇيات سانايدى. كەرىسىنشە، قارلىعاشتىڭ قاناتىمەن سۋ سەپكەپكەي، قاراشاڭىراققا قارايلاسقىسى كەلەدى. مىنە، سونداي ۇلكەن جۇرەكتى ازاماتتىڭ ءبىرى- جامبىل وبلىسى، سارىسۋ اۋدانىنىڭ تۋماسى، «Alga Diamond» كومپانياسىنىڭ پرەزيدەنتى جانبولات بەكمۇسايەۆ. ول قانشا جىراقتا جۇرسە دە، تۋعان اۋىلىنا قول ۇشىن سوزۋدى ەستەن شىعارعان ەمەس. كاسىپكەر سارىسۋ اۋدانىنداعى بايقادام قاشقىنبايەۆ اتىنداعى ورتا مەكتەپ جانىنداعى ينتەرنەت ءۇيىنىڭ بالالارىن كيىم-كەشەكپەن، ازىق-تۇلىكپەن جانە جيھازدارمەن قامتاماسىز ەتە وتىرىپ، كومەك كورسەتۋدە. بۇدان بولەك ساۋداكەنت اۋىلىندا «ستريتۆوركاۋت» سپورتتىق الاڭدارىنىڭ قۇرىلىسىنا دەمەۋشىلىك جاساعانى جانە بار. سونىمەن قاتار جاناتاس قالاسىندا اۋعان سوعىسى ارداگەرلەرىنىڭ قۇرمەتىنە ەستەلىك تاقتا ورناتقانىن ەل بىلەدى.

قولى اشىق ازاماتتىڭ قايىرىمدىلىعى ەسكەرۋسىز قالعان جوق. ول بىلتىر «جومارت جۇرەك» جوباسى اياسىندا «جىل مەسەناتى» اتانىپ، وبلىس اكىمى اسقار مىرزاحمەتوۆتىڭ العىس حاتىنا يە بولدى. سونىمەن قاتار بەلسەندى ازاماتتىق ۇستانىمى ءۇشىن ق ر قوعامدىق دامۋ ءمينيسترى دارحان كالەتايەۆتىڭ ديپلومىمەن ماراپاتتالدى.

-«اركىمنىڭ تۋعان جەرى-مىسىر شاھارى» دەيدى حالىق دانالىعى. كىندىك قانىڭ تامىپ، بالالىق شاعىڭ وتكەن، تالىم-تاربيەسىمەن تالپىندىرعان، ۇلكەن ومىرگە جول سىلتەگەن اۋىل قاشاندا قىمبات. قاشاندا ىستىق. تۋعان جەردىڭ كيەسى مەن قاسيەتى تۋرالى ەلباسىمىز «بولاشاققا باعدار: رۋحاني جاڭعىرۋ» اتتى مازمۇندى ماقالاسىندا دا كەڭىنەن تارقاتىپ، كەرەمەت وي سالدى.

شەتەلدە 10-15 كۇن بولىپ، ەلگە قايتىپ كەلە جاتقاندا بويىمدى ساعىنىشپەن قاتار ماقتانىش سەزىمى دە كەرنەيدى. قايماعى بۇزىلماعان قازاقىلىعىمىزدىڭ ءوزى ۇلكەن قازىنا. ۇشى-قيىرى جوق ۇلان عايىپ اتىراپ، بابادان قالعان بايتاق مەكەن -ەڭ باستى بايلىعىمىز. سول بايلىققا قايتىپ كەلە جاتقانىما قۋانامىن. سىرتتا سىلدىر سۋدىڭ ءوزىن اجەپتاۋىر اقشاعا ساتىپ الاسىڭ. ال ءبىزدىڭ ەلدە سۋ دەگەنىمىز تيىن. سوندا وسىنداي باي ەلدە تۇراتىنىما شۇكىر دەيمىن. البەتتە، ونىڭ بارلىعى ەلباسىنىڭ كورەگەندىگى مەن سىندارلى ساياساتىنىڭ ارقاسى. مەن 2006 جىلى قاجىلىق پارىزىمدى وتەپ كەلدىم. سوندا ءجۇرىپ اراب جىگىتتەرىنىڭ ىشىنەن ۋنيۆەرسيتەتتە وقيتىن ازاماتتى اتتاي قالاپ، وزىمە ۇستاز ەتتىم. قاجىلىق بارىسىندا قاسىمدا ءجۇرىپ، بىلگەنىن ۇيرەتۋگە تىرىستى. ول ءبىر سوزىندە قازاقستاننىڭ يسلام ءدىنىن ۇستاناتىن ەلدەردىڭ ىشىندە وتە ءتارتىپتى ەل ەكەندىگىن جەتكىزدى. سول سەكىلدى وزىمىزدەي ازاماتتار الەمگە ەلىمىزدىڭ قانداي ەكەندىگىن دالەلدەۋىمىز كەرەك،-دەيدى جانبولات بەكمۇسايەۆ.