ەلباسىنىڭ تاپسىرماسىنا وراي جامبىل وبلىسىندا جابدىقتاۋ جانە سۋ بۇرۋ جۇيەلەرىن دامىتۋ جونىندەگى «2020 جىلعا دەيىن وڭىرلەردى دامىتۋ» باعدارلاماسى ناقتى ءىس جۇزىنە اسىرىلۋ ۇستىندە. اتالعان باعدارلاما 2020 جىلعا دەيىنگى مەرزىمدى قامتيدى ءارى رەسپۋبليكاداعى ەلدى مەكەندەردىڭ بارلىعىن تازا دا ساپالى اۋىزسۋمەن جابدىقتاۋعا باعىتتالىپ وتىر، دەپ جازادى Qamshy.kz اقپارات اگەنتتىگى. وسىعان بايلانىستى جۇمىستار وڭىرىمىزدە دە قارقىندى جالعاستىرىلۋدا.

وبلىستاعى 678،5 مىڭ حالىق تۇراتىن 373 اۋىلدىق ەلدى مەكەننىڭ بۇگىنگى كۇنى 362،7 مىڭ حالقى بار 199-ى نەمەسە 53،3 پايىزى ورتالىقتاندىرىلعان اۋىزسۋمەن قامتىلعان. ال جالپى ەلدى مەكەندەردىڭ 174ء-ىنىڭ (46،7 پايىزىنىڭ) حالقى قۇدىقتان، كولونكادان سۋ الىپ، باسقا دا سۋ كوزدەرىن پايدالانىپ وتىر. اعىمداعى جىلدىڭ 1 قاڭتارىندا 4 قالادا تۇرعىنداردىڭ ورتالىقتاندىرىلعان سۋمەن قامتىلعانى 88،0 پايىزدى قۇرادى. ونىڭ ىشىندە تاراز قالاسىنداعى 357528 ادامنىڭ 89،3، قاراتاۋ قالاسىنداعى 30214 ادامنىڭ 100، جاڭاتاس قالاسىنداعى 22383 ادامنىڭ 100، شۋ قالاسىنداعى 36656 ادامنىڭ 60،0 پايىزى ورتالىقتاندىرىلعان سۋ قۇبىر جۇيەسىنىڭ يگىلىگىن كورۋدە. بيىلعى جىلعا بيۋدجەتتەن تاراز قالاسىنىڭ سۋمەن قامتۋ سالاسى بويىنشا 2 جوباعا 1775،2 ميلليون، اۋىلدىق ەلدى مەكەندەردى سۋمەن قامتۋعا بارلىعى 16 جوباعا 5222،7 ميلليون تەڭگە قارجى قاراستىرىلدى. الداعى ۋاقىتتا تاراز قالاسىنىڭ سۋمەن قامتىلماعان اۋماقتارىنا اۋىزسۋ جەتكىزۋ ماقساتىندا 7 جوبا ازىرلەنۋ ۇستىندە. ولاردىڭ نەگىزىنەن قالانىڭ سىرت جاقتارىندا ورنالاسقان جانە بۇرىنعى ساياجايلارىندا، اتاپ ايتقاندا، «شالعاي قاراسۋ – 1،2،3،4،5،6،7»، «قاينار»، «ميچۋرينەس»، «اقجول»، «رودنيچوك»، «تەكتۇرماس»، «قاراساي»، «بارىسحان»، «ءشولدالا»، «قۇمشاعال»، «قىزىل اباد»، «كازارما»، «كولتوعان»، «جيدەلى» تۇرعىن القاپتارىندا جۇزەگە اسىرىلۋى كوزدەلگەن. وسى جوبالار دايىندالىپ ىسكە اساتىن بولسا، تاراز قالاسىنىڭ تۇرعىندارى تولىعىمەن اۋىزسۋمەن قامتىلاتىن بولدى. ءيا، بۇل كەلەشەككە كەپىل بولار جوسپار. ەڭ باستىسى تىرلىشىك كوزى تۇرعىندارعا تولىق جەتىپ جاتسا، ودان اسقان باقىت جوق. وسىنى كوزدەگەن مەملەكەتتىك ساياساتتىڭ دا مىنسىزدىگى مەن جەمىسىنە جۇرتشىلىقتا كوز جەتكىزە باستادى. ەندى تەك ءبارى ۋاقىت ەنشىسىندەگى نارسە. ايتەۋىر باسى ءتاپ-تاۋىر باستالعان تىرلىكتىڭ سوڭى سىلدىر سۋعا اينالماي، حالىقتىڭ يگىلىگىنە جارايدى دەپ سەنەمىز.