حالىقتى ازىق-تۇلىكپەن جانە ونەركاسىپتىك شيكىزاتتىڭ تۇرلەرىمەن قامتاماسىز ەتۋىمەن ەرەكشەلەنەتىن ماڭىزدى سالانىڭ ءبىرى –اۋىلشارۋاشىلىعى سالاسى. اسىرەسە، قارا جەردەن ءوز نەسىبەسىن تاۋىپ جۇرگەن شارۋالاردىڭ ەڭبەگى ەرەكشە. كوكتەمدە ءدان سەۋىپ، الا جازداي بەل جازباي ەڭبەك ەتكەن ديقاندار قوڭىر كۇز كەلىسىمەن توككەن تەرىنىڭ وتەۋى – ءونىمىن جيناۋعا كىرىستى. بۇل قاتاردا جامبىل وبلىسى مويىنقۇم اۋدانىنى شارۋالارى دا بار.

مويىنقۇمدىق ديقاندار بىرەر كۇن بۇرىن «دالا ارۋى» اتانعان جۇگەرى داقىلىنا وراق سالىنىپ، بىتىك شىققان جۇگەرىنى جيناۋ ناۋقانىن باستاپ كەتتى.

– ءبىزدىڭ «بايباراق-اگرو» دەپ اتالاتىن كووپەراتيۆىمىزدىڭ 100 گەكتاردان استام جەرى بار. ءقازىر سونىڭ 30 گەكتارىنا جۇگەرى ەگىپ، ەندى سوعان وراق سالىپ جاتىرمىز. باقشا دا ەككەن بولاتىنبىز. باقشا ونىمىمەن اۋىل تۇرعىندارىن قامتاماسىز ەتتىك. ونىمدىلىگىنە كەلەتىن بولساق، جۇگەرى بىتىك شىقتى، 120 سەنتنەردىڭ ءار گەكتاردان 12 توننادان ءونىم الىپ وتىرمىز، – دەيدى «بايباراق-اگرو» كووپەراتيۆىنىڭ ءتوراعاسى المابەك ءابدىحالىقوۆ.

بيىل اۋدانداعى بىرلىك اۋىلدىق وكرۋگى بويىنشا ەگىستىك اۋماعى 1546 گەكتار بولسا، سونىڭ 425 گەكتار جەرىنە جۇگەرى داقىلى ەگىلدى. سونداي-اق، اۋىلدىق وكرۋگتەن شابىلعان جۇگەرىنى جيناۋ ءۇشىن ارنايى قىرمان مەن تەحنيكالاردى ساقتاۋعا ارنالعان ماشينا-تراكتور ستانسياسى سوعىلدى.

– بيىل اۋدان بويىنشا 5074 گەكتار سۋارمالى جەردى يگەرىپ، پايداعا جاراتتىق. اتالعان ەگىس دالاسىنىڭ 1165 گەكتار القابىنا داندىك جۇگەرى ەگىلگەن بولاتىن. وسى داندىك جۇگەرىنى جيناۋ ءۇشىن شارۋالارمەن كەلىسە وتىرىپ «حەرسونەس-9» اتتى كومبايىننىڭ 3-ەۋىن الدىق. ءقازىر بىرەۋى كەڭەس اۋىلىندا، ال ەكەۋى بىرلىك اۋىلىنىڭ شارۋا قوجالىقتارىنىڭ جۇگەرىسىن شاۋىپ جاتىر. اۋدان بويىنشا نەگىزىنەن جۇگەرى، تارىعا وراق سالىنىپ جاتسا، ال باقشا، كوكونىس ونىمدەرىن جينالىپ، ءبىتىپ قالدى. قازىرگى تاڭدا جۇگەرىنىڭ 70 گەكتارى ورىلسا، ءتۇسىم ءار گەكتاردان 12 توننادان اينالىپ وتىر. ەندىگى مىندەت جينالعان ءونىمدى يگىلىككە جاراتۋ، – دەيدى اۋداندىق اۋىلشارۋاشىلىعى ءبولىمىنىڭ باسشىسى قىزىر ەلەۋسىزوۆ.

اراعا جيىرما جىلدان استام ۋاقىت سالىپ، بيىل عانا قايتادان قولعا الىنعان داندىك جۇگەرىنى اۋدان شارۋالارى، كەلەر جىلى كوپتەپ ەگىپ، القاپتارىن كەڭەيتۋدى كوزدەپ وتىر. ەندەشە شارۋالاردىڭ الا جازداي توككەن تەرى تەككە كەتپەي ەڭبەكتەرى جەمىستى بولسىن دەمەكپىز.