جاسوسپىرىمدەر قىلمىسىنىڭ الدىن الۋ تۇيتكىلدى ءتۇپ تامىرىمەن جويىپ جىبەرمەسە دە، بالامەن جۇمىس ىستەۋدە قاجەتتى داعدىلارعا باعىت بەرەتىنى انىق. مۇنداي جۇمىستاردى جۇيەلى جۇرگىزۋدە ۇكىمەتتىك ەمەس ۇيىمداردىڭ ۇلەسى وراسان. وسىعان بايلانىستى وڭىردە جامبىل وبلىسى اكىمدىگى ءبىلىم باسقارماسىنىڭ مەملەكەتتىك الەۋمەتتىك تاپسىرىسى شەڭبەرىندە "ارىلۋ-وڭتۇستىك" قوعامدىق بىرلەستىگىنىڭ مۇرىندىق بولۋىمەن "جاسوسپىرىمدەر اراسىندا قۇقىق بۇزۋشىلىقتىڭ الدىن الۋ شارالارىن ۇيىمداستىرۋ مەن جۇرگىزۋ" تاقىرىبىندا سەمينار-ترەنينگتەر ۇيىمداستىرىلدى.

بيىل 8 ايدىڭ قورىتىندىسى بويىنشا كامەلەت جاسقا تولماعان جاسوسپىرىمدەردىڭ قىلمىسى 13،4 پايىزعا ارتىپ وتىر. مەكتەپ وقۋشىلارىنىڭ ءجۇرىس-تۇرىسىن قاداعالاۋعا قاتىستى ءتۇرلى رەيدتەر ۇيىمداستىرىلعانىمەن ناتيجە جوق. مامانداردىڭ ايتۋىنشا، كۇندەلىكتى وتكىزىلگەن رەيدتىك جانە پروفيلاكتيكالىق شارالاردىڭ ناتيجەسىندە پوليسيا بولىمشەسىنە 3082 كامەلەت جاسقا تولماعان ءجاسوسپىرىم جەتكىزىلگەن.ال، ولاردىڭ اتا-انالارىنا 2796 اكىمشىلىك حاتتاما تولتىرىپ، ايىپپۇل سالىنىپتى. الايدا، بۇل كورسەتكىش بىلتىرعى جىلعا قاراعاندا 496 دەرەككە ارتقان. كامەلەتكە تولماعاندار اراسىندا قىلمىستىڭ ءوسۋى وتكىر ماسەلە، ويتكەنى ولار ەرەسەكتەرگە قاراعاندا تاجىريبەسى مەن ءبىلىمىنىڭ جەتكىلىكسىزدىگىنەن كوپتەگەن پروبلەمالاردى شەشە المايدى. وسىنداي فاكتورلاردىڭ الدىن الۋ ماقساتىندا "ارىلۋ-وڭتۇستىك" قوعامدىق بىرلەستىگى تاباندى تۇردە ەڭبەك ەتىپ كەلەدى. ۇيىم ماماندارى جاسوسپىرىممەن جۇمىس ىستەۋدە نەگىزگى باسىمدىق ۇستازدارعا بەرىلەتىنىن ەسكەرىپ جامبىل وبلىسىنداعى بارلىق ون اۋدانىنداعى مەكتەپتەردە ارنايى سەمينار ترەنينگتەر وتكىزدى. اتالمىش وقىتۋ سەمينارلارىن اباي اتىنداعى ۇلتتىق پەداگوگيكالىق ۋنيۆەرسيتەتىنىڭ وقىتۋشىسى، پسيحيكالىق ساۋىقتىرۋ ورتالىعىنىڭ مامانى مەيرامگۇل يباشوۆا جۇرگىزىپ، ۇستازدار اراسىندا ءوز تاجىريبەسىمەن ءبولىستى.

ترەنينگتەر بارىسىندا ۇستازدار مەن مەكتەپ ديرەكتورلارىنىڭ تاربيە ءىسى جونىندەگى ورىنباسارلارىنا كەڭىنەن ءتۇسىندىرۋ جۇمىستارى جۇرگىزىلدى. ءتۇرلى سيتۋاسيالىق ويىندار ويناتىلىپ، بالالارعا سەرگىتۋ جۇمىستارىن جۇرگىزۋدىڭ ارتىقشىلىقتارى دا ايتىلدى.

جۋالى اۋدانىندا وتكەن سەميناردان پسيحولوگيالىق ءبىلىمىن تەرەڭىرەك جەتىلدىرگەن بيبىگۇل كوشەربايەۆا مۇنداي جيىنداردىڭ پەداگوگتار ءۇشىن ماڭىزىن ەرەكشە اتاپ ءوتتى.

جالپى وڭىردە وبلىستىق ءبىلىم باسقارماسىنىڭ مەملەكەتتىك الەۋمەتتىك تاپسىرىسى شەڭبەرىندە "ارىلۋ-وڭتۇستىك" قوعامدىق بىرلەستىگىنىڭ مۇرىندىق بولۋىمەن وتكەن ترەنينگتەرگە بارلىعى 300-گە تارتا سىنىپ جەتەكشى، 300 مەكتەپ ديرەكتورىنىڭ ورىنباسارى قامتىلعان. كامەلەتكە تولماعان جاستاردىڭ اراسىندا قىلمىستى الدىن الۋدىڭ كەشەندى شاراسى رەتىندە باعالانعان بۇل ترەنينگتەر الداعى ۋاقىتتا دا جالعاسىن تابا بەرمەك.