اپات ايتىپ كەلمەيدى. دەسەك تە تۇرعىنداردىڭ ومىرىنە ءقاۋىپ پەن قاتەر ءتوندىرىپ، تابيعاتقا دا وراسان زور زالال كەلتىرەتىن اپاتتار، باسقا دا توتەننەن تۋىندايتىن قيىن جاعدايلار بولسىن دايىندىق جۇمىستارىنىڭ ماڭىزى زور. قاۋىپسىزدىك شارالارىن ساۋاتتى قولدانۋ ارقىلى ايتپاي كەلەتىن اپاتتىڭ شىعىندارى مەن زالالدارىن ازايتۋعا بولادى.
جامبىل وبلىسى سەيسميكالىق اپات ورىن الۋى ىقتيمالدىعى جوعارى ايماق بولىپ سانالماسا دا جىل سايىن وقۋ-جاتتىعۋ جۇمىستارى وتكىزىلىپ وتىرادى. بيىل دا سولاي بولدى. اتاپ ايتقاندا، جۋالى اۋدانىنىڭ اۋماعىندا جامبىل وبلىسىنىڭ باسقارۋ ورگاندارىن، ازاماتتىق قورعانىس كۇشتەرىن دايىنداۋ بويىنشا كەشەندى وقۋ-جاتتىعۋ وتكىزىلدى.
كوماندالىق شتابتىق وقۋ-جاتتىعۋدىڭ ماقساتى – باسقارۋ ورگاندارى باسشى قۇرامىنىڭ ازاماتتىق قورعانىس قۇرىلىمدارى جاساقتارىن دايىندىققا كەلتىرۋ جانە لايلى سەل زارداپتارىن جويۋعا قۇرىلىمدار جىبەرۋ جونىندەگى ارەكەتتەرىن ءىس جۇزىندە اتقارۋ بولىپ تابىلادى. سونىمەن قاتار قۇرىلعان توتەنشە جاعدايلاردى جويۋ جوسپارلارىن، ازاماتتىق قورعانىس جوسپارىنىڭ ىسكە اسىرىلۋىن، باسقارۋ ورگاندارىنىڭ، اۋداننىڭ ازاماتتىق قورعاۋ قىزمەتتەرىنىڭ بەيبىت جاعدايدان سوعىس كەزەڭىندە مىندەتتەردى ماقساتقا ساي شەشۋگە دايىندىعىن تەكسەرۋ.
كوماندالىق شتابتىق وقۋ-جاتتىعۋى اۋدان اكىمى اپپاراتىنىڭ ءماجىلىس زالىندا اۋدان اكتيۆىنىڭ قاتىسۋىمەن وتكەن كەڭەس جۇمىسىنان باستاۋ الدى. جيىنعا ازاماتتىق قورعاۋ قىزمەتتەرىنىڭ باسشىلارى، اۋىلدىق وكرۋگتىڭ اكىمدەرى شاقىرىلىپ، كەشەندى وقۋ-جاتتىعۋ وتكىزۋ بويىنشا اۋداننىڭ اق قىزمەتتەرىنىڭ باسشىلىق قۇرامىنا ءبىرقاتار ناقتى تاپسىرمالار بەرىلدى.
جاتتىعۋعا تىڭعىلىقتى دايىندىق جۇمىستارى ءتۇس اۋا قايتا جالعاستى. وندا ءىس-شاراعا جاۋاپتى تۇلعالار اۋداندىق پوليسيا بولىمىندە بولىپ، توتەنشە جاعدايلار كەزىندە تۇرعىنداردى قۇلاقتاندىرۋعا ارنالعان سيگنالداردى تەكسەردى. كەشەندى وقۋ-جاتتىعۋدىڭ نەگىزگى بولىگى كەلەسى كۇنى بولدى. توتەنشە جاعدايدى جويۋ ءۇشىن تارتىلاتىن جەكە قۇرام مەن تەحنيكالار ساپقا تۇرعىزىلىپ، شتاب مۇشەلەرى ولاردىڭ دايىندىعىمەن جەكە-جەكە جانە جان-جاقتى تانىسىپ شىقتى. كەشەندى جاتتىعۋ قايرات اۋىلىندا «بوسقىن» پراكتيكالىق جاتتىعۋىمەن جالعاسىپ، شەكارالاس مەملەكەتتەردەن كەلگەن بوسقىنداردى قابىلداۋ جانە قالىپتى تىرشىلىك جاعدايىن قامتاماسىز ەتۋ جۇمىستارى ارنايى تىگىلگەن لاگەردە ۇيىمداستىرىلدى. ودان كەيىن اۋىل شارۋاشىلىعى جانۋارلارى مەن وسىمدىكتەرىن زالالسىزداندىرۋدى ۇيىمداستىرۋ، ادامداردى جانۋارلاردىڭ جۇقپالى اۋرۋلارىنان قورعاۋ جونىندەگى جانە اسا ءقاۋىپتى ينفەكسيانى جۇقتىرۋ انىقتالعان جاعدايدا كارانتيندىك ءىس-شارالار دا «ىندەت» پراكتيكالىق جاتتىعۋى اياسىندا ءوز دەڭگەيىندە ءوتتى. قاراساز اۋىلدىق وكرۋگىندە ەرىكتى ءورت ءسوندىرۋ قۇرامالارىنىڭ دايىندىعى زەردەلەنىپ، ورمان-دالا ورتتەرىن ءسوندىرۋ بويىنشا پراكتيكالىق پىسىقتاۋلار جۇرگىزىلدى.
كەشەندى وقۋ-جاتتىعۋ ۇيىمشىلدىقپەن ءوتىپ، وعان وبلىستىق تجد ازاماتتىق قورعانىس ءبولىمىنىڭ باستىعى، وقۋ-جاتتىعۋ باسشىلىعى شتابىنىڭ باستىعى اسەت ماناسوۆ وڭ باعاسىن بەرىپ، ونى ءوز دەڭگەيىندە ۇيىمداستىرۋعا اتسالىسقان اۋدان باسشىلىعىنا العىس ايتتى. سونىمەن بىرگە وقۋ-جاتتىعۋ جيىنىنىڭ بەيبىت جاعدايدا عانا وتۋىنە تىلەكتەستىگىن ءبىلدىردى.
پىكىر قالدىرۋ