ستاتيستيكالىق مالىمەتتەرگە سۇيەنسەك، قازاقستان تۇرعىندارىنىڭ 25 پايىزى جاستاردان قۇرالعان. سول سەبەپتى، مەملەكەت جاس بۋىندى قولداپ، كوتەرمەلەۋگە، احۋالىن جاقسارتىپ، جاڭا جوبالارىنا قانات بىتىرۋگە بارىنشا كۇش سالۋدا. بۇل رەتتە، قاتارداعى جاس ازاماتتار مەن اتقارۋشى ورگانداردىڭ اراسىندا جاستار رەسۋرستىق ورتالىقتارى «التىن كوپىر» قىزمەتىن اتقارۋدا. وسىنى ەسكەرەر بولساق، قوس تاراپتى بىر-ىرىمەن تۇسىنىستىرە، تابىستىرا ءبىلۋى ءۇشىن ورتالىق ماماندارىنان جوعارى دەڭگەيدەگى بىلىكتىلىك تالاپ ەتىلەدى.

ماماندارىنىڭ بىلىگىن ارتتىرىپ ءبىلىمىن تولىقتىرۋ ماقساتىندا جۋالى اۋداندىق جاستار رەسۋرستىق ورتالىعى «جاستارمەن ءتيىمدى جۇمىس جاساۋدىڭ تەتىكتەرى» اتتى سەمينار- ترەنينگىن وتكىزدى. قازاقستان رەسپۋبليكاسىنىڭ «مەملەكەتتىك جاستار ساياساتى تۋرالى» زاڭىن جۇزەگە اسىرۋ اياسىندا «جاستار رەسرۋستىق ورتالىعى» مەكەمەسى قىزمەتكەرلەرىنىڭ بىلىكتىلىگىن ارتتىرۋ ماقساتىندا وتكەن شارانى ورتالىق ديرەكتورى مەيىرجان تەلەۋشوۆ اشىپ، جۇرگىزىپ وتىردى.

ترەنينگكە «جاستار رەسۋرستىق ورتالىعى» مەكەمەسىنىڭ 14 اۋىلدىق وكرۋگىنىڭ جاستار ءىسى نۇسقاۋشىلارى قاتىستى. باسقوسۋدا اۋداندىق «جۇمىسپەن قامتۋ ورتالىعى» مەكەمەسىنىڭ قىزمەتكەرلەرى – ن.ۇلتاراقوۆ، ن.تلەسبايەۆتار جاستار تاجىريبەسى باعدارلاماسى جانە اقىلى قوعامدىق جۇمىستار مەن اتاۋلى الەۋمەتتىك كومەك الۋعا نيەتتى جاستارعا قاتىستى زاڭنامالىق قۇجاتتار جايىندا دارىستەر وقىدى. سونىمەن قاتار، كوپبالالى وتباسىلارىنىڭ ايلىق ەڭبەك اقىلارىنا قوسىمشا 2020 جىلدىڭ 1 قاڭتارىنان باستاپ الەۋمەتتىك كومەكتىڭ تاعى ءبىر ءتۇرى جۇزەگە اساتىندىعىن ەسكەرتىپ، ءتۇسىندىردى.

سونان سوڭ «جۇمىسپەن قامتۋ ورتالىعى» مەكەمەسىنىڭ قىزمەتكەرى ە.سۋرامىسوۆ جاستارعا ارنالعان نەسيەلەر بويىنشا، كاسىپكەر جاستارعا كورسەتىلەتىن قولداۋلار جايلى كەڭىنەن اقپارات بەردى. اۋداندىق اۋرۋحانانىڭ پسيحولوگ مامانى ا.اسقار جاستار اراسىندا وز-وزىنە قول سالۋعا بارعان جاستارمەن جۇمىس جۇرگىزۋ جانە زورلىق-زومبىلىقتىڭ الدىن الۋ شارالارى جايلى تۇسىنىك بەرىپ ءوتتى.

اۋداندىق «جاڭا ءومىر – نوۆايا جيزن» گازەتىنىڭ اعا ءتىلشىسى نۇرجان ماناس ۇلى اۋدان جاستارىنىڭ گازەت بەتتەرىنە ماقالا جاريالاۋ ءتارتىبى تۋرالى ءتۇسىندىرۋ جۇمىستارىمەن تانىستىردى. شاقپاقاتا اۋىلدىق وكرۋگىنىڭ جاستار ءىسى نۇسقاۋشىسى، تاجىريبەسى مول ازامات ا.احمەتوۆ الەۋمەتتىك جەلىنى، گازەت بەتتەرىنە ءتيىمدى، ۇتىمدى، ساۋاتتى جاريالاۋدىڭ ءادىس – تاسىلدەرىمەن بولىسە كەتتى.

سەمينار-ترەنينگتى قورىتىندىلاي كەلە، جاستار كوكەيىندەگى ساۋالدارىنا تۇشىمدى جاۋاپتارىن ەستىپ، مەملەكەتتىك جاستارعا ارنالعان مەملەكەتتىك باعدارلامالار تۋرالى ءوزارا وي-پىكىر الماستى.