سوڭعى ۋاقىتتا ەلىمىزدە ۇلتتىق سپورت تۇرلەرىنە ۇلكەن ءمان بەرىلىپ جۇرگەنىنە كوپشىلىك كۋا. وسى يگىلىكتەن جامبىل وبلىسى دا شەت قالماي، ءبىرقاتار جوبالار قولعا الىنىپ كەلەدى.

ماسەلەن، وتكەن جىلى قورداي اۋدانىندا اشىلعان ۇلتتىق سپورت ويىندارىن دارىپتەيتىن №3 بالالار-جاسوسپىرىمدەر سپورت مەكتەبى بۇگىنگى تاڭدا ءبىرقاتار جۇمىستى ەڭسەرىپ تاستاعان، مەكەمەنىڭ العا قويعان جوس-پارلارى دا اۋقىمدى. وننان استام ۇستاز بەن جاتتىقتىرۋشىدان قۇرالعان مەكتەپ التى سپورت تۇرىنەن شاكىرت تاربيەلەۋدە. اتاپ ايتساق، مۇندا بالاقايلار اسىق اتۋ، بايگە، كوكپار، قازاق كۇرەسى، توعىزقۇمالاق جانە جامبى اتۋدىڭ قىر-سىرىن ۇيرەنىپ ءجۇر. 2018 جىلى العاش رەت اسىق اتۋدان وبلىستىق چەمپيوناتقا قاتىسقان مەكتەپ وقۋشىلارى جاقسى ناتيجە كورسەتكەن. ۇلتتىق سپورتتىڭ وزگە تۇرلەرى بويىنشا دا جەڭىستى جولدارعا تۇسەتىن كۇن الىس ەمەس دەيدى ونداعى ۇستازدار. بيىل مەكتەپتە وقۋشىلار سانى ارتىپ، ۇلتتىق سپورتقا قىزىعۋشىلىق تانىتقاندار سانى كۇن ساناپ كوبەيىپ كەلەدى ەكەن.

وسى تۇستا، مەكتەپ تاربيەلەنۋشىلەرىنىڭ قىسقا ارالىقتا جەتكەن جەتىستىكتەرى جايىندا ايتا كەتكەن ءجون. ماسەلەن، 2019 جىلدىڭ قاڭتارىندا ت.رىسقۇلوۆ اۋدانىندا وتكەن قازاق كۇرەسىنەن وبلىستىق چەمپيوناتقا جومارت ۇزاقبايدىڭ جەتەكشىلىگىمەن 14 جاس پالۋان اتتانىپ، مەيىربەك بايزاق ءبىرىنشى، ۇلان زاكير جۇلدەلى ءۇشىنشى ورىندى يەلەنىپ قايتتى. اقپان ايىندا مەركى اۋدانىندا توعىزقۇمالاقتان وتكەن جارىسقا 13 وقۋشى قاتىسىپ، ونىڭ 10-ى جۇلدەلى ورىندارعا يە بولعان. ال، بايزاق اۋدانىندا توعىزقۇمالاقتان وتكەن وبلىستىق تۋرنيردە سپورت مەكتەبى بالالارىنىڭ ايى وڭىنان تۋىپ، جۇلدەلى ورىنداردى قانجىعاعا بايلاپ قايتقان. وسى ورايدا، جاتتىقتىرۋشى ءمادي شاراپتىڭ ەڭبەگىن ەرەكشە اتاپ وتكەن ءجون.

№3 بالالار-جاسوسپىرىمدەر سپورت مەكتەبىندە ات سپورتىنا ەرەكشە ءمان بەرىلەدى. بيىل ناۋرىز ايىندا كوكپاردان اۋداندىق تۋرنير ءوتىپ، وعان ءار اۋىلدىق وكرۋگتەن كەلگەن 12 كوماندا قاتىسىپ، ناتيجەسىندە قاقپاتاستىق كوكپارشىلار باس جۇلدەنى جەڭىپ العان. ۇلىستىڭ ۇلى كۇنىنە وراي كوكپار، بايگە، توعىزقۇمالاق جانە اسىق اتۋدان جارىس ۇيىمداستىرىلىپ، ۇزدىكتەر باعالى سىيلىقتارمەن ماراپاتتالسا، 1-مامىر مەرەكەسىندە اسىق اتۋدان اۋداندىق تۋرنيردە №3 بالالار-جاسوسپىرىمدەر سپورت مەكتەبىنىڭ وقۋشىلارى جەڭىمپاز اتانىپتى. ال، 7 مامىر - وتان قورعاۋشىلار كۇنىنە وراي وتار اۋىلىندا وتكەن قازاق كۇرەسىنەن جارىستا كەنەندىك جاس پالۋان اكىمعالي سۇلتانعالي چەمپيون اتاندى. سونداي-اق، كۇنى كەشە وتەگەن اۋىلىندا وتكەن ءدۇبىرلى تويدا №3 بالالار-جاسوسپىرىمدەر سپورت مەكتەبىنىڭ ۇيىتقى بولۋىمەن قازاقشا كۇرەس، اۋدارىسپاق، كوكپار جانە بايگەدەن اۋقىمدى جارىستار ءوتتى. وتەگەن بابامىزدىڭ ۇرپاقتارى قازاقي داستۇرمەن ەلىمىزدىڭ تۇپكىر-تۇپكىرىنەن كەلگەن سپورتشىلاردى ىنتالاندىرۋ ماقساتىندا قوماقتى جۇلدەلەر تىككەنىنە كوپشىلىك كۋا.