اۋىل شارۋاشىلىعى – ەل ەكونوميكاسىنىڭ ارتۋىنا زور سەرپىن بەرەتىن جەتەكشى سالالاردىڭ ءبىرى. سوندىقتان دا بۇگىنگى تاڭدا وسى باعىتتىڭ دامۋىنا ەرەكشە كوڭىل ءبولىنىپ، سيفرلاندىرۋ جۇمىستارى قولعا الىنۋدا. اتالمىش سالا جامبىل وبلىسىندا دا قۇلاشىن كەڭگە جايىپ كەلەدى. ونىڭ ءبىر دالەلى رەتىندە كۇنى كەشە قورداي اۋدانىنداعى قاقپاتاس اۋىلىندا الماتى قالاسىنان ارنايى كەلگەن ماماندار شارۋا قوجالىقتارىنىڭ يەلەرىمەن كەزدەسۋ وتكىزدى.
ق ر اۋىل شارۋاشىلىعى مينيسترلىگى «ۇلتتىق اگرارلىق عىلىمي ءبىلىم بەرۋ ورتالىعىنا» قاراستى قازاق مال شارۋاشىلىعى جانە جەم-شوپ ءوندىرىسى عىلىمي زەرتتەۋ ينستيتۋتى ەلىمىزدىڭ ءار تۇكپىرىندەگى شارۋا قوجالىقتارىنىڭ يەلەرىمەن كەزدەسىپ، ترەنينگ وتكىزىپ، اۋىل شارۋاشىلىعى سالاسىنىڭ دامۋىنا ءوز سەپتىگىن تيگىزۋدە. جاقىندا اتالمىش ورتالىق وكىلدەرى اۋدانىمىزعا دا تابان تىرەپ، جەرگىلىكتى اۋىل شارۋاشىلىعى سالاسىن كاسىپ ەتكەن جاندارمەن كەزدەستى. كەزدەسۋدىڭ باستى ماقساتى متف مودەلى بويىنشا ءسۇتتى ءىرى قارا مالىن دۇرىس ازىقتاندىرۋ تۋراسىندا بولدى. جيىندا العاش بولىپ ءسوز العان «ءقازمشججوعزي» ءجشس-نىڭ «ءسۇتتى ءىرى قارا مال تەحنولوگيا» ءبولىمىنىڭ باسشىسى، اۋىل شارۋاشىلىعى عىلىمدارىنىڭ كانديداتى ن.سەيدالييەۆ ءسۇت فەرمالارىندا وندىرىستىك پروسەستەردى باسقارۋ جونىندەگى قىزمەتتى ۇيىمداستىرۋ بويىنشا بايانداما جاسادى. ال، جەم-شوپ بازاسى ءسۇتتى مال شارۋاشىلىعىن تابىستى دامىتۋدىڭ نەگىزگى جايىنا توقتالعان ءقازمشججوعزي-نىڭ كىشى عىلىمي قىزمەتكەرى ش.اسقاروۆا قازاقستانداعى ءسۇتتى مال شارۋاشىلىعىنىڭ ەرەكشەلىگىن اتاپ، ەگجەي-تەگجەي ءتۇسىندىرىپ ءوتتى. سونداي-اق، بايانداماشى ونەركاسىپتىك ءسۇت وندىرىسىنە دە توقتالىپ، ءسۇتتى باعىتتاعى مالدى ۇستاۋ جۇيەسى مەن تاسىلدەرىن تالداپ، مال ازىعىن ءوندىرۋدى ۇيىمداستىرۋ جانە مال ازىعىن ءتيىمدى پايدالانۋ ماسەلەسىن دە تىلگە تيەك ەتتى. سەمينارعا ارنايى كەلگەن جەتەكشى عىلىمي قىزمەتكەر ب.ءومىرزاقوۆ ءىرى قارا مالدى بورداقىلاۋدىڭ ءتيىمدى تەحنولوگياسى جايىندا بايانداما جاسادى.
ءىرى قارا مالدى بورداقىلاۋ جايى اركىمدى قىزىقتىرماي قويماسى انىق. كەزدەسۋگە كەلگەن شارۋا قوجالىقتارىنىڭ يەلەرى وسى تاقىرىپتا وزدەرىن تولعاندىرعان سۇراقتارىن قويىپ، وعان ب.ءومىرزاقوۆ تۇشىمدى جاۋابىن بەرىپ، بۇل تاقىرىپتى كەڭىنەن قامتىدى. ال، كەزدەسۋگە قاتىسۋشىلاردى تاعى ءبىر قىزىقتىرعان ماسەلە ءسۇتتى ءىرى قارا مالىن ازىقتاندىرۋدا جەم-شوپتى ءتيىمدى قولدانۋدىڭ جولدارى بولدى. بۇل جايىندا جەتەكشى عىلىمي قىزمەتكەر م.قالماعامبەتوۆ كەڭىنەن باياندادى.
سونداي-اق، كوبەيۋدىڭ زاماناۋي ادىستەرىن قولدانۋدىڭ ءارتۇرلى تاسىلدەرىن سالىستىرمالى تالداۋ، سيىر ۋچاسكەلەرىندەگى كليماتتى باقىلاۋدى وڭتايلاندىرۋ، تاۋارلى ءسۇت فەرمالارىن جىلۋمەن قامتاماسىز ەتۋ جۇيەلەرى مەن ءسۇت فەرمالارىنداعى ەكونوميكالىق كورسەتكىشتەر ماسەلەسى دە كەڭىنەن قارالىپ، ول تۋرالى ارنايى كەلگەن ماماندار توقتالىپ، كەلۋشىلەردەن تۇسكەن سۇراقتارعا جاۋاپ بەردى. وسىدان كەيىن كەزدەسۋشىلەر «قاقپاتاس-قورداي» ج ش س ءسۇت فەرماسىندا بولىپ، فەرما باسشىسى دۇيسەحان قوشالييەۆ قوناقتاردى زاماناۋي تەحنولوگيانى قولدانىپ وتىرعان فەرمانىڭ جۇمىسىمەن تانىستىردى.
پىكىر قالدىرۋ