بالالار – قوعامىمىزدىڭ ەڭ ءالسىز، قورعانسىز بولىگى جانە ولار قۇقىقسىز بولۋعا ءتيىس ەمەس. پەرزيدەنت قاسىم-جومارت توقايەۆ قازاقستان حالقىنا جولداۋىندا ءاربىر ازاماتتىڭ، ونىڭ ىشىندە بالالاردىڭ قۇقىعى قورعالۋىن تالاپ ەتەتىنىن اتاپ ايتتى. سونداي-اق، وسى جىلدىڭ 1 ساۋىرىندە قازاقستان رەسپۋبليكاسىنىڭ پرەزيدەنتى ق.توقايەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بالانىڭ قۇقىقتارىن قورعاۋ جونىندەگى فۋنكسيالاردى جۇزەگە اسىراتىن ۇيىمداردىڭ قىزمەتىمەن بايلانىستى ماسەلەلەر بويىنشا وزگەرىستەر مەن تولىقتىرۋلار ەنگىزۋ تۋرالى» جاڭا زاڭىنا قول قويدى. ول كۇشىنە ەندى. ءيا، قانداي جاعدايدا بولسىن ەلىمىزدىڭ جەتكىنشەكتەرى زاڭمەن قورعالۋعا ءتيىس. زاڭ الدىندا ءبارىنىڭ قۇقىعى بىردەي.

وسى ورايدا، كۇنى كەشە قورداي اۋدانىنا قازاقستان رەسپۋبليكاسى پرەزيدەنتى اكىمشىلىگى جانىنان قۇرىلعان بالالاردىڭ قۇقىقتارى مەن زاڭدى مۇددەلەرىن قورعاۋدى قامتاماسىز ەتۋ جۇيەسىن جەتىلدىرۋ، زەردەلەۋ جانە ۇسىنىستاردى جيناۋ جونىندەگى جۇمىسشى توپ مۇشەلەرى كەلىپ، ساراپشىلار الدىمەن اۋدان اكىمدىگىندە وتكەن ارنايى جيىنعا قاتىستى.

جيىنعا الەۋمەتتىك سالا جانە ءبىلىم بەرۋ ۇيىمدارىنىڭ باسشىلارى، اۋدان اكىمدىگى جانىنداعى كامەلەتكە تولماعانداردىڭ ءىسى جانە ولاردىڭ قۇقىقتارىن قورعاۋ جونىندەگى كوميسسيا مۇشەلەرى، اۋداندىق پوليسيا ءبولىمىنىڭ كامەلەتكە تولماعانداردىڭ ءىسى جونىندەگى ءبولىمىنىڭ قىزمەتكەرلەرى قاتىستى. وندا ق ر پرەزيدەنت اكىمشىلىگىنىڭ جاستار ءىسى جانە وتباسى كوميتەتىنىڭ باسقارما باسشىسى ازامات بەلكايروۆ جۇمىسشى توپ ساپارىنىڭ ماقساتىن ءتۇسىندىرىپ، بالالاردىڭ قۇقىعىن قورعاۋداعى پروبلەمالىق تۇستارعا توقتالىپ ءوتتى. جيىن بارىسىندا قاتىسۋشىلار بالالاردىڭ قۇقىعى بويىنشا پىكىر الماسىپ، سۇراقتارىن جولداپ، ءتيىستى جاۋاپتارىن الدى.

سودان كەيىن جۇمىسشى توبىنىڭ مۇشەلەرى اۋدان اكىمىنىڭ ورىنباسارى ەرلان ورىنبايەۆپەن بىرگە اباي اتىنداعى №3 وم جانە №51 وم، نوعايباي اۋىلىنداعى اۋىل شارۋاشىلىق كوللەدجىن، مۇگەدەك بالالاردى وڭالتۋ جانە بەيىمدەۋ ورتالىعىن ارالاپ، كامەلەت جاسىنا تولماعاندار اراسىندا قۇقىق بۇزۋشىلىقتاردىڭ الدىن الۋ بويىنشا يۋۆەنالدى پوليسيا قىزمەتىن زەردەلەدى. ودان كەيىن ساراپشىلار اتاۋلى الەۋمەتتىك كومەك الاتىن ءالجان انا اۋىلىنىڭ تۇرعىندارىمەن كەزدەسىپ، اڭگىمە-دۇكەن قۇردى.

ساپارى سوڭىندا ەلوردادان كەلگەن جۇمىسشى توپ اۋداندا اتقارىلىپ جاتقان جۇمىستارعا ريزاشىلىعىن ءبىلدىردى.