جامبىل وبلىسىنىڭ شۋ اۋدانىندا كەڭ كولەمدى «ءقاۋىپسىز مەكتەپ اۆتوبۋسى» اكسياسى وتكىزىلدى. بالالاردى ءبىلىم بەرۋ ۇيىمدارىنا تاسىمالداۋدى ۇيىمداستىرۋ بارىسىندا ولاردىڭ قاۋىپسىزدىگىن قامتاماسىز ەتۋگە باعىتتالعان شارا مەكتەپ اۆتوبۋستارىنىڭ تاسىمالداۋدى جۇزەگە اسىرۋى كەزىندە جول-كولىك وقيعالارىنىڭ الدىن الۋدى كوزدەيدى.

اكسيانى وتكىزۋ كەزىندە اۋدانداعى باستاۋىش سىنىپ وقۋشىلارىنىڭ اراسىندا «باعدارشام» دەپ اتالاتىن 76 كورمە، بەينەلەۋ ونەرىنەن 105 سايىس جانە وسى باعىت بويىنشا 576 تاربيە ساعاتى ۇيىمداستىرىلىپتى. وسى ءىس-شارالار بارىسىندا اۋدان وقۋشىلارىنا جول ەرەجەسىنە قاتىستى ۆيدەوروليكتەر دە كورسەتىلگەن. سونىمەن قاتار، رەسپۋبليكالىق اكسيا اياسىندا اۋداندىق پوليسيا ءبولىمىنىڭ قىزمەتكەرلەرى مەن اۋدان اكىمدىگىنە قاراستى ءبىلىم ءبولىمىنىڭ ماماندارى بىرلەسە جۇمىس اتقارىپ، اۋدانداعى 24 مەكتەپتە «ابايلاڭىز، بالالار!» اتتى تاقىرىپتا ءتۇسىندىرۋ جۇمىستارىن جۇرگىزگەن.

ايتا كەتۋ كەرەك، ءدال وسى اكسيانىڭ ماقساتىنا سايكەس، اعىمداعى ايدىڭ باسىندا وقۋشىلار تاسىمالىنا ارنالعان قوعامدىق كولىكتەردىڭ تەحنيكالىق جاعدايى زەردەلەنگەن بولاتىن. بەلگىلى بولعانداي، اۋدانداعى 8 ەلدى مەكەننەن 323 وقۋشى تاسىمالمەن وقىتىلادى ەكەن. وعان كەيبىر اۋىلدا مەكتەپتىڭ بولماۋى نەمەسە باستاۋىش سىنىپتىڭ عانا بولۋى سەبەپ بولىپ وتىر.

جوعارىدا اتالعان بايقاۋعا اۋدانىمىزداعى ورتا مەكتەپتەردەن 7 قوعامدىق كولىك قاتىستى. ولاردىڭ قاتارىندا شۋ قالاسىندا ورنالاسقان س.سەيفۋللين، تاسوتكەل اۋىلىنداعى ت.رىسقۇلوۆ، كوكتوبەدەگى جامبىل، بايدىبەكتەگى م.مامەتوۆا، مويىنقۇم اۋىلىنداعى مويىنقۇم، دالاقاينار اۋىلىنداعى ت.اشىمبايەۆ جانە بەلباسار اۋىلىندا ورنالاسقان ش.ءۋاليحانوۆ اتىنداعى ورتا مەكتەپتەر بار. اتالعان 7 اۆتوكولىكتىڭ دە سانيتارلىق جاعدايى تەكسەرىلىپ، العاشقى مەديسينالىق كومەككە قاجەتتى قۇرال-جابدىقتار مەن ءورت سوندىرگىش قۇرالدارى دا تولىق قارالدى. ءتىپتى، ونداعى دارى-دارمەكتىڭ جارامدىلىق مەرزىمدەرىنە دەيىن قاتاڭ تەكسەرىلدى. اتقارىلعان شارالاردىڭ ناتيجەسىنە سۇيەنە كەلە، اۋدان اكىمدىگىنىڭ ءبىلىم بولىمىندەگى قىزمەتكەرلەر ۇزدىك قوعامدىق كولىكتەردىڭ جۇرگىزۋشىلەرىن العىس حاتتارمەن ماراپاتتادى.

بۇل شارالاردىڭ لەگى وتكەن اپتادا اۋدان ورتالىعىندا جالعاسىن تاپتى. ول اكسياعا جامبىل اتىنداعى گيمنازيا، ە.بەكماحانوۆ اتىنداعى گيمنازيا، م.ماقاتايەۆ اتىنداعى ورتا مەكتەپ جانە شۋ قالاسىنداعى ءال-فارابي مەن اباي اتىنداعى مەكتەپتەردىڭ وقۋشىلارى قاتىسىپ، ءان ايتىپ، مىڭ بۇرالا بي بيلەدى. اكسيانىڭ شىمىلدىعىن اشىپ بەرگەن ءبىلىم ءبولىمىنىڭ سەكتور مەڭگەرۋشىسى ر.مىقتىبەكوۆا ءسوز سويلەپ، وقۋشىلارعا ساتتىلىك تىلەدى. شارا بارىسىندا «جول ەرەجەسىن ساقتاڭىزدار!» دەگەن تاقىرىپپەن جولعا سۋرەت سالۋ بايقاۋى ءوتتى. ناتيجەسىندە، جۇزدەن جۇيرىك، مىڭنان تۇلپار شىققان وقۋشىلار ارنايى سىيلىقتارمەن جانە العىس حاتتارمەن ماراپاتتالدى.