ەلباسى- قازاقستان رەسپۋبليكاسىنىڭ پرەزيدەنتى ن.نازاربايەۆتىڭ بۇقارالىق سپورتتى دامىتۋ تۋرالى مەجەلى مىندەتى جامبىلدىقتارعا دا تىڭ سەرپىن بەرگەنى ءسوزسىز. وسى ورايدا تالاس اۋدانىندا دا سالاماتتى ءومىر سالتىن سەرىك ەتەتىندەردىڭ قاتارى جىلدان جىلعا ارتىپ كەلەدى. بۇل باعىتتا وتكىزىلىپ جاتقان ءىس-شارالار ءوز ناتيجەسىن بەرۋدە.

مىسالى، بىلتىر اۋدان بويىنشا ءار-تۇرلى دەڭگەيدە 165 سپورتتىق ءىس-شارا ۇيىمداستىرىلىپ، اتالعان ءىس-شارالارعا 11 مىڭنان استام ادام تارتىلعان.

ونىڭ ىشىندە دەنە شىنىقتىرۋ جانە سپورت جانە ءبىلىم ءبولىمى بىرلەسىپ وتكىزىپ كەلە جاتقان اۋداندىق «مەكتەپ ليگاسى» سپورتتىق ويىندارىنا 500-گە جۋىق وقۋشى قاتىستى.

سونىمەن قاتار، سپورتپەن اينالىسۋشىلاردىڭ قولداۋىنا يە بولىپ جۇرگەن سپورتتىڭ قاراپايىم تۇرلەرى بويىنشا «اۋلا ويىندارىنىڭ» دا تيىمدىلىگى مول. ويىن باعدارلاماسىنا قالاشىق، لاڭگى، اسىق اتۋ، قاشپا دوپ جانە سەكىرمەك سياقتى سپورتتىڭ جىلدام قيمىل تۇرلەرى ەنگىزىلدى، بۇل جارىستارعا 350-گە جۋىق ادام قاتىستى.

اۋداندا بۇقارالىق سيپات العان «كوشە ويىندارى» جارىستارى جالعاستىرىلىپ، سپورتتىڭ 6 ءتۇرىن قامتىدى. جارىستىڭ اۋداندىق، قالالىق جانە اۋىلدىق ىرىكتەۋ سىنىنا 800-گە جۋىق سپورتشىلار تارتىلدى.

سونىمەن قاتار، ارنايى ورتا ءبىلىم بەرەتىن وقۋ ورىندارىنىڭ ستۋدەنتتەرى اراسىنداعى سپارتاكيادالار، قازاق كۇرەسىنەن «قازاقستان بارىسى» رەسپۋبليكالىق ءتۋرنيرىنىڭ اۋىلدىق، اۋداندىق ىرىكتەۋ جارىستارى، مەملەكەتتىك قىزمەتشىلەرى اراسىندا سپارتاكيادا، اۋدان اكىمدىگى مەن قۇقىق قورعاۋ ورگاندارىنىڭ اراسىنداعى كىشى فۋتبولدان اۋداندىق ءتۋرنيرى ۇيىمداستىرىلدى.

سونداي-اق، اسىق اتۋدان «التىن ساقا» اۋىلدىق، اۋداندىق جارىستارى، «اكەم، انام، مەن جانە ءبىزدىڭ سپورتتىق وتباسى» ويىندارى مەن باسقا دا كوپتەگەن بۇقارالىق سيپاتتاعى جوسپارلى ءىس-شارالار وتكىزىلدى.

جىل سايىنعى قازاقستان رەسپۋبليكاسى تۇڭعىش پرەزيدەنتى – ەلباسىنىڭ قىسقى تەستىلەرىنە 2018 جىلدىڭ قورىتىندىسى بويىنشا اۋدان تۇرعىندارىنىڭ 31،0 پايىزى نەمەسە 17 مىڭ ادام قاتىستى.

اتالعان جارىستاردىڭ بارلىعى – اۋداندا بۇقارالىق سپورتتى دامىتۋعا جانە تۇرعىنداردىڭ سالاماتتى ءومىر سالتىن ۇستانۋلارىنا ءوز سەپتىگىن تيگىزدى.

بۇگىنگى تاڭدا اۋداندا سپورتتىق رەزەرۆتەردى دايىنداۋ ماقساتىندا قاراتاۋ قالاسى مەن اۋىلداردا 5 سپورت مەكەمەسى جۇمىس اتقارادى.

وسى سپورت مەكەمەلەرىندە سپورتتىڭ 18 ءتۇرى قامتىلعان. ونىڭ ىشىندە 11 وليمپيادالىق، 5 وليمپيادالىق ەمەس جانە 2 ۇلتتىق سپورت ءتۇرى بار.