جامبىل وبلىسىنداعى ت.رىسقۇلوۆ اۋدانىندا ەلباسى تاپسىرماسىنا سايكەس، بۇقارالىق سپورت جىلدان جىلعا دامۋدا. جالپى اۋداندا 154 سپورتتىق عيمارات حالىققا قىزمەت كورسەتۋدە. وتكەن جىلى جابىق سپورت كەشەنى پايدالانۋعا بەرىلسە، الداعى جىلى جاقسىلىق اۋىلىنان سونداي سپورت كەشەنىن وسى اۋىلدىڭ تۇلەگى، مەملەكەت جانە قوعام قايراتكەرى ازاماتحان امىرتايەۆ سالىپ بەرگەلى وتىر. سونىمەن قاتار، 73 الاڭ، 38 فۋتبول ستاديونى، 32 سپورت زال، 3 تير، ەكى اتۋ الاڭى سپورتشىلار يگىلىگىنە جۇمىس ىستەۋدە. اۋدانداعى ەكى سپورت مەكتەبىندە سپورتتىڭ 13 تۇرىنەن ۇيىرمەلەر جۇمىس ىستەيدى. ءتورت اۋلا كلۋبىندا 620 ءجاسوسپىرىم سپورتپەن شۇعىلدانادى. جاستار جىلى بۇقارالىق سپورت تۇرىنە 19 مىڭعا تارتا ادام تارتىلسا، سولاردىڭ دەنى جاستار دەسە بولادى.

اۋدان سپورتىنىڭ 53 جىلدىق تاريحىندا تالاي تاڭداي قاقتىراتىن جاڭالىقتار بولدى. اۋداندىق سپورت ءبولىمى كەڭەس وداعى تۇسىندا ياعني 1965 جىلى قۇرىلدى. وعان دەيىن سپورتتىڭ بۇقارالىعىنا اسا كوپ كوڭىل بولىنگەن جوق. اۋدان سپورتىن ەڭ العاش، ياعني 1965 جىلى تۇربوسىن شالىمبەتوۆ باسقارعان. 1995 جىلدان 2018 جىلدارى بولىمگە 23 جىل ءابىش (ءابيىر) امانكەلدى ۇلى بەستەرەكوۆ جەتەكشىلىك ەتتى. وسىناۋ ەسەلى ەڭبەگى ەسكەرىلگەندىكتەن بولار، قازاقستان رەسپۋبليكاسىنىڭ سپورت قايراتكەرى اتاعى بەرىلگەن. ال، «قايرات» ەرىكتى سپورت قوعامى اۋىل سپورتىنىڭ دامۋىنا، ونىڭ بۇقارالىعىنىڭ ارتۋىنا 1991 جىلعا دەيىن 26 جىل بويى ىقپال ەتتى دە، جابىلىپ قالدى. وسى قوعامدى جاپسار اتىبەكوۆ، سسسر فلوتىنىڭ جەڭىمپازى، بەلگىلى بىلعارى قولعاپ شەبەرى كەنجەبەك بەكەبايەۆ سىندى سپورتشىلار باسقاردى.

تۇرار رىسقۇلوۆ اۋدانىنان وسى جىلدار ىشىندە ازيا، الەم، ءتىپتى وليمپيادا چەمپيوندارى توپتى جارىپ شىقتى. ماسەلەن، جاقسىلىق اۋىلىنىڭ ازاماتى ەرماحان ساعي ۇلى ىبىرايىموۆ ەكى دۇركىن ازيا چەمپيونى اتانىپ، اتلانتا وليمپياداسىندا كۇمىس، سيدنەي وليمپياداسىندا التىن مەدالعا يە بولىپ، قازاقستاننىڭ كوكبايراعىن ەكى دۇركىن كوتەردى. ەركىن كۇرەستەن يسلام بايرامۋكوۆ ەكى دۇركىن ازيا چەمپيونى اتانىپ، اتلانتادا التىنشى ورىندى، ال، سيدنەيدە ەكىنشى ورىن ياعني كۇمىس مەدال تاعىپ، ەلگە ورالدى. سونداي-اق، قۇمارىقتىق اقجۇرەك تاڭاتاروۆ 2012 جىلى لوندون وليمپياداسىندا ەركىن كۇرەستە بەلدەسىپ، قولا، ال، كامەنكالىق ەلدوس سمەتوۆ 2016 جىلى ريو وليمپياداسىندا دزيۋدودان ب ا ق سىناسىپ، ەلگە كۇمىس مەدالمەن ورالدى. وسى قاتارعا توكيو، ريم وليمپياداسىنىڭ چەمپيونى بولعان اقتانگەر ارعىماق ابسەنتتىڭ مەدالدارىن قوسساڭىز، ءبىر اۋداننىڭ وزىندە وليمپيادانىڭ جەتى مەدالى بار ەكەنىنە ءقوزىڭىز جەتەدى. سونداي-اق، قاراقىستاق اۋىلىنىڭ ازاماتى ادىلەت داۋلانبايەۆ الەم بىرىنشىلىگىندە كۇمىس جۇلدە الىپ، وليمپيادالىق رەزەرۆكە ەندى.