سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتى جانە وبلىس اكىمدىگىنىڭ ءبىلىم باسقارماسى بىرلەسىپ وتكىزگەن «پاراساتتى بولاشاق» اتتى ەسسە جازۋ بايقاۋىنىڭ جەڭىمپازدارى پاراساتتىلىق ەلشىلەرىنە اينالعان «لەكتورلار» پۋلىن قالىپتاستىردى. بەلسەندى قاتىسۋشىلاردان قۇرىلعان پاراساتتىلىق «ەلشىلەرىنىڭ» ماقساتى – ءبىلىم بەرۋ ۇيىمدارىندا وقۋشىلاردىڭ پاراساتتىلىق مادەنيەتىن قالىپتاستىرۋ، سىبايلاس جەمقورلىققا قارسى مادەنيەتىن كوتەرۋدىڭ ءتيىمدى تاجىريبەسىن تاراتۋ. 2019 جىلى 11-18 قازان ارالىعىندا وقۋشىلاردان قۇرىلعان لەكتورلار پۋلى ەرىكتى تۇردە 93 مەكتەپتە ءبىلىم الۋشىلاردىڭ بويىندا پاراساتتىلىق پەن اكادەميالىق تازالىق پرينسيپتەرىن قالىپتاستىرۋ، ادامگەرشىلىك-ەتيكالىق قۇندىلىقاردى بويىنا سىڭىرۋگە باعىتتالعان دارىستەر مەن كەزدەسۋلەر وتكىزدى. اتالعان ءىس-شارالارعا 4185 وقۋشى قامتىلدى.

جالپى، جامبىل وبلىسىنداعى ءبىلىم بەرۋ ۇيىمدارىندا وقۋشىلاردى ۇيىمشىلدىققا، ادالدىققا، ەڭبەكقورلىققا، كاسىپكەرلىك قابىلەتىن شىڭداۋعا داعدىلاندىرۋ ماقساتىندا وسىنداي شارالار كوپتەپ وتكىزىلۋدە.

مىسالى، بايزاق اۋدانىنداعى عاني مۇراتبايەۆ اتىنداعى گيمنازياسىندا جاقىندا «كۇز بەرەكە، كۇز مەرەكە» اتتى جارمەڭكە ءوتتى. گيمنازيا تالىمگەرى ا.ەرگالييەۆانىڭ ۇيىمداستىرۋىمەن «اق جاۋلىقتى انالار» ون كۇندىگىنىڭ اياسىندا ۇيىمداستىرىلعان مەرەكەلىك جارمەڭكەدە انالار ساتۋشى مىندەتىن اتقاردى. شاراعا 5-7 سىنىپ وقۋشىلارىنان قۇرالعان 16 توپ قاتىسىپ، ءوز بەلسەندىلىكتەرىن كورسەتتى. مەرەكەلىك جارمەڭكەدە ءادىلقازىلار قۇرامى تاعام ءتۇرىن، ساپاسىن، گيگيەنالىق تالاپتاردى سارالادى. مەرەكەلىك جارمەڭكە بايقاۋىنا قاتىسۋشى سىنىپتار تاقىرىپقا سايكەس كيىنىپ، وزدەرى دايىنداعان داستارحاندارىن قورعادى. مىسالى، 5 «ا»، 5 «ءا»، 5 «ب» سىنىپتارى رەسەي مەملەكەتىن، 5 «ۆ»، 5 «گ»، 5 «د» سىنىپتارى قازاقستان مەملەكەتىن، 6 «ا»، 6 «ءا»، 6 «ب» سىنىپتارى تۋركيا مەملەكەتىن، 6 «ۆ»، 6 «گ»، 7 «ۆ» سىنىپتارى كورەي مەملەكەتىن، 7 «ا»، 7 «ءا»، 7 «ب» سىنىپتارى وزبەكستان مەملەكەتىن كورسەتتى. جاسۇلاندىقتاردان قۇرالعان وقۋشىلار ورتادا وزبەك ءبيىن بيلەپ، اباي اتامىزدىڭ 175 جىلدىعىنا وراي «كۇز» ولەڭىن مانەرلەپ وقىدى. وقۋشىلار، اتا-انالار، ۇستازدار جاساعان جۇمىس ناتيجەلى بولىپ، بىرلىك بار جەردە تىرلىك بولاتىنىن ءىس جۇزىندە كورسەتتى.