ەلىمىز بويىنشا حيميا ونەركاسىبىنىڭ الىبى سانالاتىن –«قازفوسفات» جاۋاپكەرشىلىگى شەكتەۋلى سەرىكتەستىگى ءوزىنىڭ جيىرماسىنشى بەلەسىنە اياق باستى. وسى جىلدار ارالىعىندا ءوندىرىس وشاعى ەگەمەندىگىمىزبەن بىرگە ەسەيىپ، تاۋەلسىزدىگىمىزبەن بىرگە تولىسا ءتۇستى. سەرىكتەستىك جۇمىسىنىڭ العا باسۋىنا ۇدەمەلى يندۋستريالدى-يننوۆاسيالىق دامىتۋ باعدارلاماسىنىڭ تيگىزگەن شاراپاتى مول. سونىمەن قاتار ەلباسىمىز دا بۇل باعىتتاعى جۇمىستاردى تىكەلەي ءوز باقىلاۋىندا ۇستاپ، بارىنشا قامقورلىق كورسەتتى.

بۇگىندە الىپ ءوندىرىس وشاعىن قازاقستاننىڭ ەڭبەك ەرى، وبلىستىق ءماسليحاتتىڭ دەپۋتاتى مۇقاش ەسكەندىروۆ باسقارىپ كەلەدى. جامبىل جانە تۇركىستان وبلىستارىنداعى ءبىرقاتار حيميالىق كاسىپورىنداردى بىرىكتىرەتىن سەرىكتەستىكتىڭ وندىرىستىك نىساندارى «قاراتاۋ» تاۋ-كەن وڭدەۋ كەشەنى، جاڭا جامبىل فوسفور زاۋىتى، مينەرالدىق تىڭايتقىشتار زاۋىتى، تەمىر جول كولىگى كەشەنى، شىمكەنت قالاسىنداعى سينتەتيكالىق جۋۋ زاتتارىن شىعاراتىن زاۋىتتارى تىرلىگىن تىكتەپ، ءونىم وندىرۋدە. جالپى، بۇل ءوندىرىس وشاقتارى مينەرالدىق شيكىزات ءوندىرۋ، بايىتۋ جانە وڭدەۋ، ولاردىڭ نەگىزىندە ونەركاسىپتىك ءونىم مەن حالىق تۇتىناتىن تاۋارلار شىعارۋمەن اينالىسادى. سونداي-اق گەولوگيالىق بارلاۋ جۇمىستارىن جۇرگىزىپ، مينەرالدىق تىڭايتقىشتار، سارى فوسفور جانە ونىڭ قوسىلىستارىن دا وندىرەدى. نەگىزگى باعىتتارىنان باسقا «قازفوسفات» ج ش س فوسفور سالاسىنداعى كاسىپورىنداردىڭ قۇرىلىمىن دامىتۋعا، وندىرىستىك پروسەستەرىن جەتىلدىرۋگە، قۋاتتىلىعىن ارتتىرۋعا باعىتتالعان ۇلكەن ىستەر اتقارۋدا. بۇل ءىس-شارالار قاراتاۋ فوسفوريت الابىنىڭ تابيعي قورلارىن ءتيىمدى پايدالانۋدى قامتاماسىز ەتەدى.

ق ر تۇڭعىش پرەزيدەنتى ن.نازاربايەۆتىڭ ەڭ باستى قاعيداسى – حالقىمىزدىڭ تۇرمىس-تىرشىلىگىنە، ءال-اۋقاتىن ارتتىرۋعا وڭ اسەر ەتەتىن ەكونوميكانىڭ ءتۇرلى سالالارىن دامىتۋ. سوندىقتان ول ءوزىنىڭ وتكەن جىلعى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىندا وسى ماسەلەلەرگە كەڭىنەن توقتالىپ، ونى شەشۋدى تاپسىرعان بولاتىن. ەلباسىنىڭ اتالعان جولداۋداعى تاپسىرماسىنا ساي، كومپانيادا جۇمىسشىلاردىڭ الەۋمەتتىك جاۋاپكەرشىلىگى ءارقاشان دامۋدىڭ نەگىزگى كورسەتكىشتەرىنىڭ ءبىرى بولىپ سانالادى. وسى ورايدا كومپانيا باسشىلىعى ءۇشىن جۇمىسپەن قامتۋ، جالاقىنىڭ ءوسۋى، جۇمىسشىلار مەن ولاردىڭ وتباسىلارىنىڭ دەنساۋلىعى مەن ءال-اۋقاتىن باستى نازاردا. ۇستاپ كەلەدى ماسەلەن، وتكەن جىلى جۇمىسشىلاردىڭ جالاقىسى 2017 جىلعا قاراعاندا 13،4 پايىزعا ارتقان. ال بيىلعى جىلدىڭ 1 قاڭتارىنان باستاپ بۇل كورسەتكىش ورتا ەسەپپەن تاعى 10 پايىزعا كوبەيىپتى.