كۇنى كەشە 20 جىلدىق مەرەيتويىن اتاپ وتكەن «قازفوسفات» جاۋاپكەرشىلىگى شەكتەۋلى سەرىكتەستىگى ەلىمىزدەگى حيميا ونەركاسىبىنىڭ الىبى سانالادى. ىرگەلى ءوندىرىس وشاعى ۇدەمەلى يندۋستريالدى-يننوۆاسيالىق دامىتۋ باعدارلاماسى اياسىندا ءوز جۇمىسىن نىقتاي تۇسكەن.

– بۇگىندە «قازفوسفات» ءجشس-نىڭ بالانسىندا ءبىرقاتار الەۋمەتتىك نىساندار بار. ولاردى دامىتۋ جانە جەتىلدىرۋ ءۇشىن تەك 2018 جىلدىڭ وزىندە 453،8 ميلليون تەڭگە جۇمسالدى. سونداي-اق 2011 جىلدان باستاپ 52 تۇرعىن ءۇي ۋچاسكەسىندە جاس قىزمەتكەرلەرگە ارنالعان جاتاقحانا پايدالانۋعا بەرىلدى. جىل سايىن 2000-عا جۋىق جۇمىسشى مەن ولاردىڭ وتباسىلارى ارنايى ديسپانسەردە دەمالادى. ال جازعى ماۋسىمدا 1000 بالاعا ارنالعان «جۇلدىز» دەنساۋلىق ساقتاۋ لاگەرى جۇمىس ىستەيدى. اتالعان جەردە جۇمىسشىلارىمىزدىڭ بالالارىنىڭ دەمالۋىنا بارلىق جاعداي جاسالعان. بۇدان وزگە تاراز جانە جاڭاتاس قالالارىندا سپورتتىق كەشەندەر مەن الاڭدار بار. بۇل قىزمەتكەرلەردىڭ بوس ۋاقىتتارىن ءتيىمدى پايدالانۋى ءۇشىن وتە ءتيىمدى. سونىمەن قاتار كومپانيا كاسىپوداق ۇيىمدارىمەن بەلسەندى تۇردە جۇمىس ىستەيدى. ءوز كەزەگىندە جۇمىس بەرۋشى كاسىپوداق قىزمەتكەرلەرىن ءوز وكىلەتتىكتەرىنىڭ مەرزىمى اياقتالعاننان كەيىن بۇرىنعى نەمەسە بالامالى جۇمىسىن قامتاماسىز ەتۋگە كەپىلدىك بەرەدى. ەڭبەكشىلەردىڭ الەۋمەتتىك جانە ەڭبەك كەپىلدىكتەرىن قامتاماسىز ەتۋ ماقساتىندا قولايلى ەڭبەك جاعدايلارىن جاساۋ ءۇشىن وتكەن جىلى «قازفوسفات» ج ش س جانە ەڭبەك ۇجىمى اراسىندا جاڭا ۇجىمدىق شارتقا قول قويىلدى. مۇنىڭ بارلىعى جۇمىسشىلاردىڭ ەش الاڭسىز جۇمىس اتقارۋى ءۇشىن جاسالىنىپ جاتقان جاعداي، – دەيدى سەرىكتەستىكتىڭ باس ديرەكتورى، قازاقستاننىڭ ەڭبەك ەرى مۇقاش ەسكەندىروۆ.

ەل اۋماعىندا د.مەندەلەيەۆ كەستەسىنىڭ بارلىق دەرلىك ەلەمەنتتەرى بار. ونىڭ ىشىندە ءبىزدىڭ ءوڭىردىڭ دە الەۋەتى جوعارى. بۇل وسى سالاداعى قىزمەتكەرلەردىڭ جۇمىستى جەمىستى ەتىپ، ءارى قاراي تەرەڭ عىلىمي زەرتتەۋلەردى جالعاستىرۋلارى قاجەت-اق. سوندىقتان كومپانيا ءوز قىزمەتكەرلەرىنە بارىنشا كوڭىل ءبولىپ، ىلكىمدى ءىس تىندىرۋىنا جول اشىپ وتىر. قىزمەتكەرلەر زاڭنامادا قوسىمشا مەرەكەلەر، مەديسينالىق جانە پروفيلاكتيكالىق تاماقتانۋ، ءسۇت، كيىم، جەكە قورعانىس قۇرالدارى تۇرىندەگى بارلىق جەڭىلدىكتەردى الادى ەكەن. بۇدان باسقا، كومپانيا بارلىق سالالاردا وندىرىسكە جۇمىسكەرلەردى كولىكپەن تاسىمالداۋ بويىنشا شىعىندى ءوز مويىندارىنا العان. وتكەن جىلى وسى شاراعا 220 ميلليون تەڭگەدەن استام قارجى ءبولىنىپتى. سونداي-اق قىزمەتكەرلەرگە ماتەريالدىق كومەك تە كورسەتىلەدى. بۇل باعىتتا جىل سايىن 166 ميلليون تەڭگەدەن استام قارجى قاراستىرىلادى ەكەن.