ەلباسى ن.نازاربايەۆ ازاتتىقتىڭ العاشقى جىلدارىنان ەلىمىزدە قولايلى ينۆەستيسيالىق كليمات قالىپتاستىرۋعا كۇش سالىپ كەلەدى. مۇنداعى باستى ماقسات-پايدالى قازبالاردى ءتيىمدى يەگەر وتىرىپ، جاڭا جۇمىس ورىندارىنىڭ اشىلۋى ىقپال ەتۋ، سول ارقىلى الەۋمەتتىڭ الەۋەتىن كوتەرۋ. مەملەكەت باسشىسى ق.توقايەۆ تا ءوزىنىڭ قازاقستان حالقىنا العاشقى جولداۋىندا وسى ماسەلەگە ايرىقشا توقتالىپ، شەتەلدىك ينۆەستورلارعا قولايلى جاعدايلار جاسالاتىنىن جەتكىزدى.

مىنە، وسىنداي مۇمكىندىكتىڭ ناتيجەسىندە رەسەيلىك «ەۆروحيم» كومپانياسى جامبىل وبلىسىنا ينۆەستيسيا قۇيىپ، جاڭا جوبانى جۇزەگە اسىرۋدا. كومپانيا تاراپىنان كەن ورىندارىن يگەرۋ بويىنشا ينۆەستيسيالىق جوبانىڭ ءبىرىنشى كەزەڭى اياقتالعان. ناتيجەسىندە فوسفات كەنىن ءوندىرۋ جانە العاشقى وڭدەۋگە ارنالعان جوبالىق قۋاتتىلىققا قول جەتكىزىلدى. اتاپ ايتقاندا، 2017 جىلدىڭ ناۋرىزىندا 1 ميلليون توننا فوسفوريت كەنى وندىرىلسە، وتكەن جىلدىڭ اقپان ايىندا ميلليون توننادان اسا فوسفات الىناتىن ۇن ءوندىرىلىپ، تۇتىنۋشىلارعا جونەلتىلگەن. ەندىگى جەردە ينۆەستيسيالىق جوبانىڭ ەكىنشى كەزەڭىنىڭ ەگجەي-تەگجەيلى جوبالاۋ جۇمىستارى جۇرگىزىلىپ جاتىر ەكەن.

بۇل تۋرالى تاياۋدا ەل استاناسى نۇر-سۇلتان قالاسىندا ق ر ۇكىمەتى مەن «ەۆروحيم» كومپانياسىنىڭ باسشىلىعىنىڭ كەزدەسۋىندە كومپانيانىڭ باس ديرەكتورى يگور نەچايەۆ اڭگىمەلەپ بەرگەن بولاتىن. يگور نەچايەۆ جاھاندىق ينۆەستيسيالار بويىنشا جوسپارلارىمەن ءبولىسىپ، «ەۋروحيمنىڭ» وبلىسىمىزداعى قاراتاۋ فوسفات باسسەينىن دامىتۋ جانە مينەرالدى تىڭايتقىشتاردى شىعاراتىن زاۋىت سالۋ بويىنشا ستراتەگيالىق ينۆەستيسيالىق جوبانى ىسكە اسىرۋ تۋرالى بايانداعان-دى.

–ءبىز قازاقستان رەسپۋبليكاسىنىڭ ۇكىمەتى مەن ءتيىستى مينيسترلىكتەرمەن تىعىز قارىم-قاتىناستامىز ءارى ولاردىڭ قولداۋىن ءاردايىم سەزىنىپ كەلەمىز. ءارى مۇنداي قارىم-قاتىناستى جوعارى باعالايمىز. ءقازىردىڭ وزىندە ءبىرقاتار جوبالار ىسكە قوسىلىپ، حيميا ونەركاسىبىندە بارىنشا قولجەتىمدى تەحنولوگيالاردى قولدانا وتىرىپ، بىرەگەي، يننوۆاسيالىق ءوندىرىستى قۇرۋعا كىرىسكەن وندىرىستىك نىسانداردى دامىتامىز. اعىمداعى جىلدىڭ 28 ناۋرىزىندا ۇكىمەتارالىق ماجىلىستە ءبىزدىڭ جوبانىڭ جاڭا كەزەڭىن جان-جاقتى قولداۋ تۋرالى كەلىسىمگە قول جەتكىزىلدى. جانە وسىنىڭ ناتيجەسىندە جازدىڭ باسىندا جامبىل وبلىسىندا 1 ميلليون توننا تىڭايتقىشتار شىعاراتىن حيميا زاۋىتىنىڭ قۇرىلىسىن قولداۋ تۋرالى ءبىرقاتار ماڭىزدى كەلىسىمدەرگە قول قويۋ جوسپارلانىپ وتىر. ونىڭ قۇرىلىسى بيىل باستالادى، – دەدى ي.نەچايەۆ ۇكىمەت باسشىسىنا كەزدەسۋ بارىسىندا.

ءوز كەزەگىندە ق ر پرەمەر-مينيسترى اسقار مامين كومپانيانىڭ جۇمىسىن جوعارى باعالاپ، قولعا الىپ جاتقان جوبالارىنا ساتتىلىك تىلەگەن.

قازىرگى تاڭدا كومپانيا وڭتۇستىك ايماقتىڭ الەۋمەتتىك دامۋىنا، سونداي-اق جاڭاتاس قالاسىنىڭ قۇرىلىسىنا ۇلكەن ۇلەس قوسىپ كەلەدى. سونىمەن قاتار شاھارداعى بارلىق سپورتتىق جارىستار مەن ءىس-شارالارعا بەلسەنە قاتىسىپ، دەمەۋشىلىك جاساپ وتىرادى. ماسەلەن، «جاڭاتاس جۋنيورس» فۋتبول كومانداسىنا ءاردايىم قولداۋ بىلدىرسە، ش.ءۋاليحانوۆ اتىنداعى مەكتەپتىڭ حيميا كابينەتىن سوڭعى ۇلگىدەگى زاماناۋي تەحنيكالارمەن جابدىقتاپ بەرىپتى. بۇل جوبانىڭ دەمەۋشىلىك كولەمى 16 ميلليون تەڭگەنى قۇرادى. بۇدان وزگە شاعىن شاھاردىڭ ينفراقۇرىلىمىن جەتىلدىرۋ، تۇرعىن ءۇي جاعدايىن جاقسارتۋ، جاس مامانداردى جۇمىسقا تارتۋ سىندى ماسەلەلەردىڭ وڭدى شەشىلۋىنە قول ۇشىن سوزىپ كەلەدى. ەندىگى جەردە كومپانيانىڭ بولاشاق جوسپارلارىنىڭ ءبىرى قالادان «جاستار» دەمالىس جانە مادەنيەت ءۇيى سالۋ. بۇل ءوز كەزەگىندە جاستاردىڭ بوس ۋاقىتىن ءتيىمدى وتكىزۋلەرىنە قولايلى ورىن بولماق.