ەلباسى ايقىنداپ بەرگەن يندۋستريالاندىرۋ ساياساتى اۋليەاتا ءوڭىرىن حيميا ونەركاسىبى مىقتاپ دامىعان ايماقتاردىڭ بىرىنە اينالدىرعانى ءسوزسىز. وبلىستا وسى سالا بويىنشا ىلكىمدى ىستەر جاسالىنىپ، ءوڭىر ەكونوميكاسىنىڭ ىلگەرىلەۋىنە وزىندىك سەپتىگىن تيگىزىپ كەلەدى. ماسەلەن، سوڭعى جىلدارى كەنشىلەر قالاسى جاڭاتاستا تاۋەلسىزدىكتىڭ ەلەڭ-الاڭىندا تۇرالاپ قالعان ءوندىرىس وشاقتارىنا جان ءبىتىپ، قايتا جاڭعىرا باستادى. سالاعا سەرپىن اكەلگەن «ەۆروحيم» مينەرالدىق-حيميالىق كومپانياسىنىڭ بۇگىندە جۇمىسى جۇيەلەنىپ، زاۋىت وندىرىستىك قۋاتتىلىعىن ارتتىرۋ ءۇشىن جاڭا جوبالاردى قولعا الا باستاعان.

جالپى، 2010 جىلدىڭ مامىر ايىندا ق ر ۇكىمەتى كوكجون جانە گيممالفاربس فوسفور كەن ورىندارىن يگەرۋ بويىنشا كونكۋرس وتكىزگەن. وسى ورايدا، ەلىمىز ءۇشىن «ەۆروحيم تىڭايتقىشتارى» كومپانياسى ستراتەگيالىق ماڭىزدى جوبالارىن ۇسىنىپ، كەنشىلەر قالاسىندا جۇمىسىن باستاپ كەتكەن ەدى. نەگىزىنەن، اتالعان كومپانيا جوباسىنىڭ دامۋى تۇتاستاي العاندا ءوڭىردىڭ وركەندەۋىنە، سونداي-اق اۋىل شارۋاشىلىعىن ساپالى تىڭايتقىشتارمەن قامتاماسىز ەتىپ، سالاداعى ونىمدىلىكتىڭ ارتۋىنا جاعداي جاساماق.

2012 جىلى ق ر ۇكىمەتى مەن «ەۆروحيم» اراسىندا «قازاقستان رەسپۋبليكاسىنداعى مينەرالدى تىڭايتقىشتار ءوندىرىسى جانە قاراتاۋ فوسفات باسسەينىن يگەرۋ بويىنشا زاۋىت قۇرىلىسى» ينۆەستيسيالىق جوباسىن ىسكە اسىرۋ تۋرالى تاريحي كەلىسىمگە قول قويىلىپ، كەن وندىرۋدەگى جۇمىستارىن باستاپ كەتكەن-تىن.

– 2013 جىلى تۇركىستان جانە جامبىل وبلىستارىنداعى ەكى فوسفات كەنىن يگەرۋدى باستادىق. كەن ورنىندا ءوندىرىس 2014 جىلدىڭ باسىنان باستاپ جۇزەگە اسىرىلۋدا. قازىرگى ۋاقىتتا جۇڭگو جانە ورتالىق ازيا نارىعىنداعى كاليي سۋلفاتى مەن كۇردەلى تىڭايتقىشتاردى وندىرەتىن كاسىپورىن قۇرۋ جوسپارلانىپ وتىر. بۇگىندە كومپانيا كالسيي ءحلوريدى، كالسيي سۋلفاتى جانە كۇكىرت قىشقىلىنىڭ قاجەتتىلىكتەرى ءۇشىن ديكالسيي فوسفاتىن وندىرەدى. ءبىزدىڭ وندىرىستىك اكتيۆتەر رەسەيدە، ليتۆيادا، بەلگيادا، قىتايدا، برازيليادا ورنالاسقان. 25 ەلدەگى ساتۋ كەڭسەلەرى 100-دەن استام ەلدەردىڭ كليەنتتەرىنە قىزمەت كورسەتەدى. وزدەرىنىڭ تەڭىز تەرمينالدارى مەن ۆاگون پاركى لوگيستيكالىق شىعىنداردى ازايتۋعا مۇمكىندىك بەرەدى. سونىمەن قاتار كومپانيا ازوت پەن فوسفات تىڭايتقىشتارىن شىعارىپ، كاليي كەن ورىندارىن يگەرۋدى باستادى. كومپانيانىڭ بارلىق ونىمدەرى ستاندارتتى، ياعني جالپى ماقساتتاعى تىڭايتقىشتار جانە ۇزاق ۋاقىت قولدانىلاتىن تىڭايتقىشتار مامانداندىرىلعان تىڭايتقىشتار، – دەيدى كومپانيا باسشىسىنىڭ ىشكى جانە سىرتقى بايلانىس جونىندەگى كەڭەسشىسى ەلميرا كۇزەن.