«ەۆروحيم» كومپانياسىنىڭ جامبىل وبلىسىنا ينۆەستيسيا قۇيۋىمەن ايماقتاعى حيميا ونەركاسىبى قارقىن الا ءتۇستى. ەلباسى ۇسىنعان يندۋستريالاندىرۋ باعىتىنىڭ جەمىسى وسىندا. بۇگىندە «ەۆروحيم» مينەرالدىق-حيميالىق كومپانياسىنىڭ جۇمىسى جۇيەلەنىپ، زاۋىت وندىرىستىك قۋاتتىلىعىن ارتتىرۋ ءۇشىن جاڭا جوبالاردى قولعا الا باستاعان.

كومپانيا تاراپىنان كەن ورىندارىن يگەرۋ بويىنشا ينۆەستيسيالىق جوبانىڭ ءبىرىنشى كەزەڭى اياقتالعان. ناتيجەسىندە فوسفات كەنىن ءوندىرۋ جانە العاشقى وڭدەۋگە ارنالعان جوبالىق قۋاتتىلىققا قول جەتكىزىلدى. اتاپ ايتقاندا، 2017 جىلدىڭ ناۋرىزىندا 1 ميلليون توننا فوسفوريت كەنى وندىرىلسە، وتكەن جىلدىڭ اقپان ايىندا ميلليون توننادان اسا فوسفات الىناتىن ۇن ءوندىرىلىپ، تۇتىنۋشىلارعا جونەلتىلگەن. ەندىگى جەردە ينۆەستيسيالىق جوبانىڭ ەكىنشى كەزەڭىنىڭ ەگجەي-تەگجەيلى جوبالاۋ جۇمىستارى جۇرگىزىلىپ جاتىر ەكەن. ناقتىراق ايتقاندا، بۇل كەزەڭنىڭ 70 پايىزدان استام جۇمىستارى اياقتالىپ، حيميا كەشەنى قۇرىلىسىنىڭ الاڭىن دايىنداۋ ءۇشىن قازبا جۇمىستارى جۇرگىزىلۋدە. جوبانى ىسكە قوسۋ 2021 جىلعا جوسپارلانىپ وتىر.

– اتالمىش جوبا بارىسىندا 500 جۇمىس ورنى قۇرىلدى. كومپانيانىڭ قازاقستاندىق كاسىپورىندارىندا جۇمىس ىستەيتىن قىزمەتكەرلەردىڭ 85 پايىزى جامبىل وبلىسىنىڭ تۇرعىندارى. حيميالىق كەشەننىڭ قۇرىلىسى اياقتالعاننان كەيىن، وندىرىستە مىڭعا جۋىق ادام جۇمىس ىستەيتىن بولادى. وسىعان بايلانىستى سالالاردا 2 مىڭنان استام ادامعا تۇراقتى جۇمىس كوزدەرى پايدا بولماق. وسىنداي جۇمىستار تۇتاستاي العاندا ءوڭىردىڭ دامۋىنا ىقپال ەتىپ، قازاقستاننىڭ حيميالىق كلاستەرىن جاقسارتۋعا ەلەۋلى ۇلەس قوساتىنىنا سەنىمدىمىز، – دەيدى كومپانيا باسشىسىنىڭ ىشكى جانە سىرتقى بايلانىس جونىندەگى كەڭەسشىسى ە.كۇزەن.

جالپى، كومپانيا باسشىسىنىڭ ىشكى جانە سىرتقى بايلانىس جونىندەگى كەڭەسشىسى ەلميرا كۇزەننىڭ ايتۋىنشا «ەۋروحيم» ءوندىرىستى جەتىلدىرۋگە دەن قويۋدا. ماسەلەن، وتكەن اپتادا ەل استاناسى نۇر-سۇلتان قالاسىندا ق ر ۇكىمەتى مەن «ەۆروحيم» كومپانياسىنىڭ باسشىلىعىنىڭ كەزدەسۋى ءوتىپ، وندا كومپانيانىڭ باس ديرەكتورى يگور نەچايەۆ جاھاندىق ينۆەستيسيالار بويىنشا جوسپارلارىمەن ءبولىسىپتى.

سونداي-اق ول اۋديتورياعا «ەۋروحيمنىڭ» وبلىسىمىزداعى قاراتاۋ فوسفات باسسەينىن دامىتۋ جانە مينەرالدى تىڭايتقىشتاردى شىعاراتىن زاۋىت سالۋ بويىنشا ستراتەگيالىق ينۆەستيسيالىق جوبانى ىسكە اسىرۋ تۋرالى بايانداپتى.بۇگىندە بۇل باعىتتا جۇيەلى جۇمىستار جالعاسۋدا.