سان ءتۇرلى سالادان تۇراتىن مەديسينالىق قىزمەت ساپاسىن ارتتىرۋ ماسەلەسى قاشاندا وزەكتى. ءارى بۇل باعىت مەملەكەتتىڭ الەۋمەتتىك-ەكونوميكالىق دامۋ كورسەتكىشتەرىندەگىڭ ەڭ نەگىزگى فاكتور سانالادى. ال بۇل سالاداعى ساپالى قىزمەت جەدەل كومەكتى جۇيەلى ۇيىمداستىرۋدان كورىنەدى. سول سەبەپتەن دە جامبىل وبلىسىندا جەدەل جاردەم كولىكتەرىنە GPS ناۆيگاسيامەن بىرىكتىرىلگەن «كومەك» اۆتوماتتاندىرىلعان باسقارۋ جۇيەسى ورناتىلدى، دەپ جازادى Qamshy.kz اقپارات اگەنتتىگى. 

ءدال وسى جۇيەنىڭ ورناتىلۋىمەن جەدەل جاردەم قىزمەتىنە تۇسكەن شاقىرتۋلار سانى 5000-عا دەيىن ازايدى.

–وتكەن جىلى جەدەل جاردەم قىزمەتى 6 787 شاقىرتۋعا كەشىگىپ قىزمەت كورسەتسە بيىل مۇنداي شاقىرتۋلار سانى 1882-گە دەيىن ازايدى. ال تامىز ايىندا «جامبىل وبلىستىق مەديسينالىق جەدەل جاردەم ستانساسى» قىزمەتىن مونيتورينگىلەۋ بويىنشا 3 جۇمىسشى توبى قۇرىلدى. بۇل شارا كەزىندە 8 شاقىرتۋ جاسالىپ، ناتيجەسىندە ءتورت كەشىگۋ فاكتىلەرى انىقتالدى. جەدەل جاردەم قىزمەتىنىڭ شاقىرتۋعا كەشىگۋىنىڭ نەگىزگى سەبەپتەرى جەدەل ستانساسىنان كەش شىعۋى، ديسپەچەردىڭ جۇمىسى، كوشەلەردىڭ جانە ۇيلەردىڭ نومەرلەرىنىڭ جوقتىعى، جول جوندەۋ جۇمىستارى، ءۇي الدىنداعى كەدەرگىلەر، جۇرگىزۋشىلەردىڭ جول بەرمەۋى سىندى فاكتورلاردان ورىن الىپ وتىر. نەگىزىنىنەن تۇسكەن شاقىرتۋلارعا دەنساۋلىق ساقتاۋ سالاسىنىڭ ماماندارى 1-7 مينۋت ارالىعىندا كەشىگىپ جەتكەن. سايكەسىنشە بۇل ماسەلە وبلىس اكىمىنىڭ سالالىق ورىنباسارىنىڭ ءجىتى باقىلاۋىنا الىندى. دەنساۋلىقتى قورعاۋ جونىندەگى ۇيلەستىرۋ كەڭەسىندە جەدەل جاردەم قىزمەتىنىڭ شاقىرتۋلارعا جەدەل جەتۋىن باقىلاۋ تاراز قالاسى مەن اۋدان اكىمدەرىنىڭ تىكەلەي نازارىندا بولۋى قاجەتتىگى ايتىلدى، –دەيدى وبلىس اكىمدىگىنىڭ دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ.

جادەل جەردەمنىڭ شاقىرتۋعا شۇعىل جەتۋى ناۋقاستىڭ ومىرىنە اراشا بولۋمەن قاتار قاراپايىم حالىقتىڭ سالا ماماندارىنا سەنىمىن دە نىعايتا تۇسەدى. سوندىقتان جەدەل جاردەم قىزمەتىن ءمىنسىز ۇيىمداستىرۋ جەرگىلىكتى بيلىكتىڭ ءجىتى نازارىندا بولادى.بريگادا ماماندارىن قۇرال-جابدىقپەن قامتۋ ىسىنە باسىمدىق تا بەرىلۋى كەرەك. سول سەبەپتەن دە جەدەل كومەك كورسەتەتىن جامبىلدىق مەديسينالىق ۇيىمدارعا فارماسيەۆتيكالىق توڭازىتقىش ساتىپالۋعا 87 ميلليون تەڭگەگە ءوتىنىم بەرىلىپ، ول ءوتىنىم مەملەكەتتىك ساتىپ الۋ زاڭناماسىنا ساي قاناعاتتاندىرىلۋ ۇستىندە.