جامبىل وبلىسىندا وقۋىن جاڭادان ءبىتىرىپ كەلگەن دەنساۋلىق ساقتاۋ سالاسى ماماندارىنا كوتەرمە اقى تاعايىنداۋ، ۋاقىتشا قىزمەتتىك پاتەرمەن قامتۋ، باسپانالى بولۋىنا لايىقتى جاعداي جاسالىپ كەلەدى، دەپ جازادى Qamshy.kz اقپارات اگەنتتىگى. 

سوڭعى جىلدارى ەلىمىزدەگى مەديسينا سالاسىندا كادر تاپشىلىعى ماسەلەسى بايقالادى. ءوز كەزەگىندە بۇل ماسەلەنىڭ مەديسينالىق قىزمەت ساپاسىنا تىكەلەي اسەر ەتەتىن فاكتور ەكەنىن اڭعارۋ قيىن ەمەس. اسىرەسە وبلىس ورتالىقتارىنان شالعاي ەلدى مەكەندەردەگى بىلىكتى كادر جەتىسپەۋشىلىگى ساپالى مەديسينالىق قىزمەتتى كورسەتۋگە كەرى اسەر ەتەدى. سوندىقتان دا اۋىلدىق جەرلەرگە ارنايى مەملەكەتتىك باعدارلامالاردىڭ شاراپاتىمەن ەڭبەك ەتۋگە كەلگەن دارىگەرلەر مەن مەدبيكەلەردىڭ تۇراقتاپ قالۋى ءۇشىن بارلىق مۇمكىندىكتەردى قاراستىرعان ابزال.

بۇگىندە «ەnbek.kz» ەلەكتروندى پورتالىندا جامبىلدىق مەديسينالىق ۇيىمدارعا 322 مامان قاجەتتىگىن انىقتالعان.

–بۇل قاجەتتىلىكتى جويۋ ماقساتىندا دەنساۋلىق ساقتاۋ مينيسترلىگىنىڭ جانىنداعى كوميسسياسىنىڭ قورىتىندىسىمەن وڭىرگە 185 جاس مامان ءبولىندى. اتالعان بولىنىستەگى 79 جاس مامان قالادا جۇمىس جاساۋدا. ال قالعان 106 جاس مامان اۋىلدىق ەلدى مەكەندەرگە جولداما الدى. مۇنان بولەك جىل باسىنان بەرى وبلىسقا 126 جاس مامان كەلدى. مۇنداعى 60 جاس مامان وبلىس مەديسينا سالاسىنا قىزمەت ەتۋگە ءوز ەركىمەن كەلگەنى انىقتالىپ وتىر. اعىمداعى جىلدىڭ 9 ايىندا وڭىرگە كەلگەن مامانداردىڭ 40-ى قالادان جۇمىس تاپسا، قالعان 86 جاس مامان اۋىلدىق ەلدى-مەكەندەردەگى دەنساۋلىق ساقتاۋ نىساندارىندا جۇمىسقا ورنالاستى،–دەيدى وبلىس اكىمدىگىنىڭ دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ.

باسقارما باسشىسىنىڭ مالىمدەۋىنشە وڭىرگە كەلگەن جاس مامانداردى تۇراقتاندىرۋ ماقساتىندا جەرگىلىكتى بيلىكپەن ءتيىستى الەۋمەتتىك قولداۋ شارالارى قاراستىرىلعان. ماسەلەن اعىمداعى جىل باسىنان بەرى وبلىسقا كەلگەن 126 جاس ماماننىڭ 7-ەۋىنە مامانعا 100 ايلىق ەسەپتىك كورسەتكىش كولەمىندە، ال 46 مامانعا 800 مىڭ تەڭگە كولەمىندە كوتەرمە جاردەماقى بەرىلگەن. سونداي-اق جۋالى اۋدانىنا بارعان 4 مامانعا جاتاقحانادان ورىن بەرىلسە، جامبىل اۋدانىندا 2 جاس مامان، مويىنقۇم اۋدانىندا 1 جاس مامانعا قىزمەتتىك پاتەر بەرىلگەن. ايتا كەتەرلىك ءبىر جايت وڭىردە الەۋمەتتىك كومەك العان جاس ماماندار ۇلەسىن ارتتىرۋ بويىنشا وبلىس اكىمدىگىنىڭ دەنساۋلىق ساقتاۋ باسقارماسى مەن اۋدان اكىمى اراسىندا ارنايى ينديكاتور دا بەكىتىلگەن.