كەلەر جىلدان باستاپ ەلىمىزدە مىندەتتى الەۋمەتتىك مەديسينالىق ساقتاندىرۋ جۇيەسىن ەنگىزىلەتىنى بەلگىلى. سايكەسىنشە وسى جۇيەنى ەنگىزۋگە دايىندىق شارالارى رەسپۋبليكانىڭ بارلىق وڭىرلەرىندە قارقىندى جۇرگىزىلىپ جاتىر. جامبىل وبلىسىندا بۇل جۇمىستار كوممۋنيكاتيۆتىك جوسپار جانە وسى باعىتتا 2019 جىلدىڭ تامىز - جەلتوقسان ايلارىنا ارنالعان جول كارتاسىنا ساي قولعا الىندى، دەپ جازادى Qamshy.kz اقپارات اگەنتتىگى. 

مىندەتتى الەۋمەتتىك مەديسينالىق ساقتاندىرۋ جۇيەسىن ەنگىزۋ بويىنشا اعىمداعى جىلعا بەكتىلگەن ءىس-شارا جوسپارىنا سايكەس وڭىردە نەگىزىنەن اقپاراتتىق ءتۇسىندىرۋ جۇمىستارى جۇرگىزىلىپ جاتىر. جىل باسىنان بەرۋ وبلىستىق، اۋداندىق دەڭگەيدەگى باسىلىمداردىڭ بەتتەرىندە ساقتاندىرۋعا قاتىستى 282 تاقىرىپتىق ماقالا جاريالاندى. سونىمەن قاتار الەۋمەتتىك جەلىلەردە 983 اقپارات ورنالاستىرىلىپ، حالىققا ساقتاندىرۋ شارالارى تۋرالى اقپارات باسىلعان 278 148 بروشيۋرا مەن بۋكلەت قاعازى تاراتىلدى.

–ۇگىت ناسيحات جۇمىستارىن جۇرگىزۋدىڭ ەندىگى ءبىر باعىتى مىندەتتى الەۋمەتتىك مەديسينالىق ساقتاندىرۋ جۇيەسىنە قاتىستى ارنايى دايىندالعان اۋديو جانە ۆيدەوروليكتەر قالا مەن اۋدانداردا حالىقتىڭ كوپ شوعىرلاناتىن ورىندارعا، الەۋمەتتىك نىساندارعا ورنالاستىرۋ بولدى. مۇنان وزگە وبلىس بويىنشا مەديسينالىق ساقتاندىرۋعا قاتىستى 323 باننەر مەن 104 ستەند ورناتىلدى. سالا ماماندارىنىڭ قاتىسۋىمەن مىندەتتى الەۋمەتتىك مەديسينالىق ساقتاندىرۋ جۇيەسىن ەنگىزۋ بويىنشا اقپاراتتىق ءتۇسىندىرۋ جۇمىستارى كەزىندە 1364 كەزدەسۋ وتكىزىلدى. بۇل كەزدەسۋلەرگە 739 284 مىڭ ادام قاتىستى. ياعني بۇل وسىنشاما جامبىلدىقتىڭ اقپاراتتىق ءتۇسىندىرۋ جۇمىسىمەن قامتىلعانىن كورسەتەدى، –دەيدى وبلىس اكىمدىگىنىڭ دەنساۋلىق ساقتاۋ باسقارماسىنىڭ باسشىسى مارات جامانقۇلوۆ.

مىندەتتى الەۋمەتتىك مەديسينالىق ساقتاندىرۋ جۇيەسىن ەنگىزۋدە وبلىستاعى ازاماتتاردىڭ ساقتاندىرۋ قورىنا اۋدارىم جاساۋ مۇمكىندىگىن زەردەلەۋ ءۇشىن ولاردىڭ ساناتى انىقتالىپ جاتىر. ستاتيستيكالىق مالىمەتتەر بويىنشا بۇگىندە 532 739 جامبىلدىق ساقتاندىرۋ قورىنا اۋدارىم جاساۋعا قابىلەتتى. ولاردىڭ ىشىندە 506 921 ادام جۇمىسپەن قامتىلعان. سونىمەن قاتار 329 177 ادام جالدامالى قىزمەت اتقارسا، 177 421 ادام ءوزىن-وزى جۇمىسپەن قامتىعاندار ساناتىنا جاتقىزىلادى. ال 25 818 جامبىلدىق جۇمىسسىز رەتىندە تىركەلسە 213 692 ادام ەڭبەك رەسۋرسىنا جاتپايدى. بۇل دەرەكتەردىڭ بارلىعى ساقتاندىرۋ قورىنا اۋدارىمدار جاساۋ قابىلەتىنە يە تۇلعالاردى تانۋ جانە بولجامدى مالىمەتتەر جيناقتاۋ ءۇشىن زەردەلەنىپ وتىرعانىن ايتا كەتۋ كەرەك.