پرەزيدەنت ق.توقايەۆ جۋىردا ءوز جولداۋىندا «شاعىن، اسىرەسە ميكروبيزنەس ەلىمىزدىڭ الەۋمەتتىك-ەكونوميكالىق جانە ساياسي ومىرىندە ماڭىزدى ءرول اتقارادى» دەي كەلە «سوندىقتان مەملەكەت الداعى ۋاقىتتا دا بيزنەسكە قولداۋ كورسەتە بەرەدى. بۇل ماقساتقا ۇلتتىق قوردان 100 ميلليارد تەڭگەگە جۋىق قارجى ءبولىندى. ءبىراق ساراپشىلاردىڭ پىكىرىنشە، قارجىلاي قولداۋدىڭ يگىلىگىن جەرگىلىكتى بيلىكپەن بايلانىسى بار شارۋاشىلىقتار عانا كورىپ وتىر» دەگەن بولاتىن.

وسى ورايدا «دامۋ» كاسىپكەرلىكتى دامىتۋ قورىنىڭ جامبىل وبلىسى بويىنشا ايماقتىق فيليالى شاعىن جانە ورتا بيزنەس وكىلدەرىن قولداۋ باعىتىندا جۇيەلى جۇمىستار اتقارۋدا. جالپى، «دامۋ» قورى مەملەكەتتىك قولداۋدىڭ جان-جاقتى جانە ءتيىمدى قۇرالدارىن ەنگىزۋ ارقىلى قازاقستانداعى ميكرو، شاعىن جانە ورتا كاسىپورىنداردىڭ تۇراقتى دامۋىن قامتاماسىز ەتۋگە ارنالعان مەملەكەتتىك قارجى ينستيتۋتى بولىپ تابىلادى.

قازىرگى تاڭدا، «دامۋ» قورى ەلىمىزدە شاعىن جانە ورتا كاسىپكەرلىكتى دامىتۋعا ارنالعان ءبىرقاتار مەملەكەتتىك باعدارلامالاردى جۇزەگە اسىرۋدا.

اتاپ ايتقاندا، قور «بيزنەستىڭ جول كارتاسى-2020» بيزنەستى دامىتۋ مەن قولداۋدىڭ مەملەكەتتىك باعدارلاماسى، «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى، وڭدەۋشى ونەركاسىپ سالاسىندا جۇمىس ىستەيتىن شاعىن جانە ورتا كاسىپكەرلىك سۋبەكتىلەرىن قولداۋ باعدارلاماسى، باسىمدىق بەرىلگەن جوبالاردى نەسيەلەۋ مەحانيزمى، «بەرەكە» وڭىرلىك قارجىلاندىرۋ باعدارلاماسى سىندى باعىتتار اياسىندا تىڭ باستامالاردى جۇزەگە اسىرۋدا.

بۇل باعدارلامالار شاعىن جانە ورتا بيزنەس ءۇشىن قارجىلىق جانە قارجىلاي ەمەس قولداۋدىڭ ءتۇرلى قۇرالدارىن ۇسىنادى.

مىسالى، «بيزنەستىڭ جول كارتاسى-2020» بيزنەستى دامىتۋ مەن قولداۋدىڭ مەملەكەتتىك باعدارلاماسى 2010 جىلدان بەرى ىسكە اسىرىلىپ كەلەدى جانە ونى جۇزەگە اسىرۋ بارىسىندا دامۋ قورى قارجى اگەنتتىگىنىڭ فۋنكسيالارىن ورىندايدى. اتاپ ايتقاندا جەكە كاسىپكەرلىك سۋبەكتىلەرىنە نەسيە بويىنشا پايىزدىق مولشەرلەمەلەردى سۋبسيديالاۋ جانە نەسيەلەردى ءىشىنارا كەپىلدەندىرۋ قۇرالدارى بويىنشا قارجىلىق قولداۋ كورسەتىپ، سونداي-اق شاعىن جانە ورتا بيزنەس جوبالارىن قارجىلاندىرۋعا ماقۇلداۋ العانعا دەيىن كونسۋلتاسيالىق قىزمەتتەر تۇرىندە قولداۋ كورسەتەدى. باعدارلاما جۇزەگە اسقاننان بەرى جامبىل وبلىسىندا 800-دەن استام كاسىپكەرگە قولداۋ كورسەتىلدى.