مەملەكەت باسشىسى قاسىم-جومارت توقايەۆ «سىندارلى-قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ كەپىلى» اتتى حالىققا ارناعان جولداۋىندا «شاعىن، اسىرەسە، ميكروبيزنەس ەلىمىزدىڭ الەۋمەتتىك-ەكونوميكالىق جانە ساياسي ومىرىندە ماڭىزدى ءرول اتقارادى. اتاپ ايتقاندا، ەڭ الدىمەن اۋىل تۇرعىندارىنا تۇراقتى جۇمىس بەرەدى، جۇمىسسىزدىقتى ازايتادى. سونىمەن قاتار سالىق بازاسىن قۇراپ، جەرگىلىكتى بيۋدجەتتى نىعايتادى. سونداي-اق جاپپاي كاسىپكەرلىكتى دامىتۋ ساناعا سىڭگەن پاتەرناليستىك پيعىل مەن ماسىلدىقتان ارىلۋعا مۇمكىندىك بەرەدى. ەلىمىزدە كاسىپكەرلىكتى دامىتۋدىڭ ۇلگى بولارلىق مىسالدارى جەتكىلىكتى. ءبىز شاعىن كاسىپكەرلىكتى بۇكىل قوعام بولىپ قولداۋىمىز كەرەك»،– دەپ اتاپ كورسەتكەن بولاتىن.

بۇگىندە جامبىل وبلىسىندا ءوز ءىسىن اشىپ، جەكە كاسىپكە بەت بۇرعانداردىڭ قاتارى كوبەيىپ كەلەدى. بۇل تۇرعىدا مەملەكەت تاراپىنان دا ءتيىستى قولداۋ-كومەك كورسەتىلۋدە. مىسالى، «دامۋ» كاسىپكەرلىكتى دامىتۋ قورىنىڭ جامبىل وبلىسى بويىنشا ايماقتىق فيليالى جانىنان اشىلعان كاسىپكەرلىكتى قولداۋ ورتالىعى بۇگىنگە دەيىن 21 مىڭنان استام ادامعا كەڭەس بەرىپ ۇلگەرگەن.

سونىمەن قاتار ورتالىق «شاعىن جانە ورتا بيزنەستىڭ توپ-مەنەدجمەنتىن وقىتۋ» كومپونەنتى شەڭبەرىندە ءبىلىم الۋعا 108 كاسىپكەردى «نازاربايەۆ ۋنيۆەرسيتەتىنە» جىبەرگەن. ونىڭ ۇشەۋى بيىلعى جىلى جىبەرىلگەن بولاتىن. سونداي-اق قازىرگى تاڭدا وسى وقۋعا 16 كاسىپكەر ءوتىنىم بەرىپ، ولار قىركۇيەك ايىندا ءبىلىمىن شىڭدادى.

وعان قوسا، ايماقتىق فيليال تاراپىنان ءموبيلدى كاسىپكەرلىكتى قولداۋ ورتالىعى ىسكە قوسىلعان. بۇل حالىققا كەڭەس بەرۋ قىزمەتتەرىن كورسەتۋ ماقساتىندا وڭىرلەرگە بارۋعا ارنالعان ارنايى اۆتوبۋس. ءموبيلدى كاسىپكەرلىكتى قولداۋ ورتالىعى وبلىستىق كاسىپكەرلىك باسقارماسى جانە وڭىرلىك كاسىپكەرلەر پالاتاسىنىڭ كەلىسىمى بويىنشا، كەڭەس بەرۋ ماقساتىندا اي سايىن جامبىل وبلىسىنىڭ اۋداندارىنا شىعىپ وتىرادى.

سونىمەن قاتار جامبىل جەرىندە باسىم جوبالاردى كرەديتتەۋ تەتىگى دە قاراستىرىلعان. بۇل باعدارلاما 2018 جىلدان باستاپ ىسكە اسىرىلۋدا جانە ونى ىسكە اسىرۋ كەزىندە دامۋ قورى كرەديتتەر بويىنشا سىياقى ستاۆكاسىن سۋبسيديالاۋ جانە كرەديتتەرگە ءىشىنارا كەپىلدىك بەرۋ قۇرالدارى بويىنشا جەكە كاسىپكەرلىك سۋبەكتىلەرىنە قارجىلىق قولداۋ كورسەتە وتىرىپ، قارجى اگەنتتىگىنىڭ فۋنكسيالارىن جۇزەگە اسىرادى.