«شاعىن، اسىرەسە، ميكروبيزنەس ەلىمىزدىڭ الەۋمەتتىك-ەكونوميكالىق جانە ساياسي ومىرىندە ماڭىزدى ءرول اتقارادى. اتاپ ايتقاندا، ەڭ الدىمەن اۋىل تۇرعىندارىنا تۇراقتى جۇمىس بەرەدى، جۇمىسسىزدىقتى ازايتادى. سونىمەن قاتار سالىق بازاسىن قۇراپ، جەرگىلىكتى بيۋدجەتتى نىعايتادى. سونداي-اق جاپپاي كاسىپكەرلىكتى دامىتۋ ساناعا سىڭگەن پاتەرناليستىك پيعىل مەن ماسىلدىقتان ارىلۋعا مۇمكىندىك بەرەدى. ەلىمىزدە كاسىپكەرلىكتى دامىتۋدىڭ ۇلگى بولارلىق مىسالدارى جەتكىلىكتى. ءبىز شاعىن كاسىپكەرلىكتى بۇكىل قوعام بولىپ قولداۋىمىز كەرەك». مەملەكەت باسشىسى قاسىم-جومارت توقايەۆ «سىندارلى-قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ كەپىلى» اتتى حالىققا ارناعان جولداۋىندا وسىلاي دەپ اتاپ كورسەتىپ، قاداي-قاداۋ مىندەتتەردى ايقىنداپ بەرگەن بولاتىن.

مەملەكەت تاراپىنان جاسالىپ جاتقان قولايلى جاعدايلاردىڭ ناتيجەسىندە جامبىل وبلىسىندا شاعىن جانە ورتا كاسىپكەرلىك سالاسى قارقىندى دامىپ كەلەدى. بۇعان ارينە، مەملەكەتتىك باعدارلامالاردىڭ تيگىزىپ جاتقان شاراپاتى مول. سونىمەن قاتار ايماقتا وڭىرلىك باعدارلامالار دا ءوز ناتيجەسىن بەرۋدە. مىسالى، «بەرەكە-2» باعدارلاماسى اياسىندا 2017 جىلى جامبىل وبلىسىنىڭ اكىمدىگى مەن «دامۋ» قورى قاراجات پۋلىن 1،0 ميلليارد تەڭگەگە دەيىن ۇلعايتۋ تۋرالى شەشىم قابىلدادى. ونىڭ 500،0 ميلليون تەڭگەسى جامبىل وبلىسىنىڭ اكىمدىگىنىڭ قارجى ەسەبىنەن بولسا، ال قالعان 500 ميلليون تەڭگە «دامۋ» قورىنان ءبولىندى. كورسەتىلگەن قاراجات 4 بانككە ورنالاستىرىلدى. ناتيجەسىندە «بەرەكە-2» باعدارلاماسى شەڭبەرىندە 40 كاسىپكەردىڭ جوباسى قارجىلاندىرىلدى.

ال 2018 جىلعى «بەرەكە-3» باعدارلاماسىن ىسكە اسىرۋ ءۇشىن 1،5 ميلليارد تەڭگە مولشەرىندە پۋل قۇرىلدى. وندا 500،0 ميلليون تەڭگە جامبىل وبلىسى اكىمدىگى قاراجاتى ەسەبىنەن، ال 1،0 ميلليارد تەڭگە «دامۋ» قورىنىڭ تاراپىنان ءبولىندى. بولىنگەن قاراجات ەكىنشى دەڭگەيدەگى بانكتەردە ورنالاستىرىلدى. قازىرگى ۋاقىتتا بولىنگەن قاراجاتتىڭ 1 216 ميلليون تەڭگەسى يگەرىلدى، ونىڭ ەسەبىنەن 45 كاسىپكەر جەڭىلدەتىلگەن نەسيەگە يە بولدى.

وڭىرلىك باعدارلامانىڭ تيىمدىلىگىن ەسكەرە وتىرىپ، جامبىل وبلىسى اكىمدىگىمەن وسى باعدارلامانى اعىمداعى جىلى جالعاستىرۋ تۋرالى كەلىسىمگە قول جەتكىزىلدى.

وسىلايشا، بيىلعى جىلى "بەرەكە-4" باعدارلاماسىن ىسكە اسىرۋ ءۇشىن تاعى دا 1،0 ميلليارد تەڭگە مولشەرىندە قارجى پۋلى قۇرىلدى، وندا 500،0 ميلليون تەڭگە اكىمدىك قاراجاتى ەسەبىنەن، ال 500،0 ميلليارد تەڭگە – «دامۋ» قورى ەسەبىنەن ءبولىندى. قازىرگى ۋاقىتتا بولىنگەن قاراجات "قازاقستان حالىق بانكى"اق ورنالاستىرىلدى. جالپى، «بەرەكە-4» بويىنشا وبلىستا شامامەن 40-قا جۋىق كاسىپكەرلەردى قارجىلاندىرۋ جوسپارلانىپ وتىر.